މަަސައްކަތްކުރަނީ ވޯޓުލުމުގައި ޚާއްސަ އެހީތެރިކަން ބޭނުންވާ ހުރިހާ ފަރާތްތަކަށްވެސް ފަސޭހަގޮތްތަކެއް ހޯދައިދިނުމަށް: ފުއާދު
13 ޖުލައި 2023 | ބުރާސްފަތި 22:30ލޯފަން މީހުންނަށް އަމިއްލައަށް ވޯޓުލެވޭ އިންތިޒާމު ވަނީ ހަމަޖައްސާފައި
އީސީގެ ރައީސް ފުއާދު ތައުފީގު
ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލުމުގައި ޚާއްސަ އެހީތެރިކަން ބޭނުންވާ ހުރިހާ ފަރާތްތަކަށްވެސް ފަސޭހަ ގޮތްތަކެއް ހޯދުމަށް މަސައްކަތްކުރައްވާކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
ރިޔާސީ އިންތިޚާބަށް އީސީން ވަމުން އަންނަ ތައްޔާރީތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން ފުއާދު ވިދާޅުވީ ފެނުމުން މަހުރޫމްވެފައިވާ މީހުންނަށް އަމިއްލައަށް ވޯޓުލެވޭގޮތަށް އިންތިޚާބުތަކާއި ބެހޭ އާންމު ގާނޫނަށް ގެނެސްފައިވާ އިސްލާހާ ގުޅިގެން ކުރަންޖެހޭ މަސައްކަތްތައް ކުރަމުން ގެންދާކަމަށެވެ. ކޮންމެ ކަމެއްވެސް އަލަށްކުރާއިރު އުނދަގޫތަކެއް ހުންނަކަމަށާއި އެގޮތުގެ މަތިން ފެނުމުން މަހުރޫމްވެފައިވާ ފަރާތްތަކަށް އަމިއްލައަށް ވޯޓުލެވޭގޮތް ހެދުމަށް ކުރަމުންދާ މަސައްކަތުގައިވެސް އުނދަގޫތަކެއް އެބަހުރިކަމަށް ފުއާދު ވިދާޅުވިއެވެ.
ނަމަވެސް މިކަމުގައި އެސޯސިއޭޝަންތަކާއި ގުޅިގެން ކަމާގުޅޭ މައުލޫމާތު އެމީހުންނަށް ފޯރުކޮށްދެވިއްޖެނަމަ އެކަން ވަރަށް ބޮޑަށް ފަސޭހަވެގެންދާނެކަމަށް ފުއާދު ވިދާޅުވިއެވެ. އަދި މިކަމަކީ އެމީހުންގެ ހައްގުތައް ކަށަވަރުކޮށްދިނުމަށްވެސް ލިބޭ ވަރަށް ބޮޑު ކުރިއެރުމެއްކަމަށް ފުއާދު ވިދާޅުވިއެވެ.
ފުއާދު އިތުރަށް ވިދާޅުވީ ވީލްޗެއަރ ބޭނުންކުރާ ފަރާތްތަކަށްވެސް ފަސޭހަ އިންތިޒާމުތަކެއް ހަމަޖެއްސުމުގެ ގޮތުން ވޯޓުލާ މަރުކަޒުތައް ހުންނާނީ ގްރައުންޑް ފްލޯރ ގައިކަމަށެވެ. ނޫނީ އެއަށްވުރެ މަތި ފްލޯރ އެއްގައި ވޯޓު ފޮށި ހުންނަނަމަ އެތަނެއްގައި ލިފްޓް ހުރިތޯ އީސީން ބަލާނެކަމަށް ފުއާދު ވިދާޅުވިއެވެ.
މީގެއިތުރުން ވީލްޗެއަރގައި އަންނަ މީހުންނަށް އަތްފޯރާ ހިސާބުގައި ވޯޓުފޮށި ބެހެއްޓުމަށް މިފަހަރު އިންތިޒާމުތަކެއް ހަމަޖެހިފައި ހުންނާނެކަމަށް ފުއާދު ވިދާޅުވިއެވެ.
މީގެއިތުރުން ވޯޓުލުން އޮންނަ ދުވަހު މާބަނޑު މީހުންނަށް އުމުރުން ދުވަސްވީ މީހުންނަށް ކިޔުގައި ނުޖެހި ވޯޓުލެވޭނެކަމަށް ފުއާދު ވިދާޅުވިއެވެ.
ފުއާދު ވިދާޅުވީ ޚާއްސަ އިމްތިޔާޒުތަކެއް ލިބެންޖެހޭ ބަޔަކު އުޅޭކަން އެއީ ގަބޫލުކުރަންޖެހޭ ކަމެއްކަމަށާއި އެއީ އެމީހުންނަށް ލިބިގެންވާ ހައްގެއްކަމަށެވެ. އެހެންކަމުން އެއިންތިޒާމު އީސީން ހަމަޖައްސާނެކަމަށް ފުއާދު ވިދާޅުވިއެވެ.
