ދިއްދޫ ރައްޔިތުން ބޭނުންވާ ޒަމާނީ ބަނދަރު ނޮވެންބަރު މަހުގެ ތެރޭގައި ލިބޭނެ: އާޒިމް
މިހާރު ކުރިއަށްދަނީ ޕޭމަންޓުގެ މަސައްކަތް
ހއ. ދިއްދޫ ބަނދަރު
ހއ. ދިއްދޫ ރައްޔިތުން ބޭނުންވާ ޒަމާނީ ބަނދަރު ނޮވެންބަރު މަހުގެ ތެރޭގައި ލިބޭނެ ކަމަށް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެރަށުގައި ކުރިއަށްގެންދާ ތަރައްގީގެ މަޝްރޫއުތައް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ، އެމްޓީސީސީގެ ފަރާތުން ދިއްދޫގައި ތަރައްގީގެ ދެ މަޝްރޫއުއެއްގެ މަސައްކަތްތައް ކުރިއަށް ގެންދިޔަ ކަމަށެވެ. އެއީ ޒަމާނީ ފެންވަރަށް ބަނދަރު ތަރައްގީކުރުމުގެ މަޝްރޫއާއި، ގޮނޑުދޮށް ހިމާޔަތް ކުރުމުގެ މަޝްރޫއު ކަމަށެވެ. އަދި މިހާރު ގޮނޑުދޮށް ހިމާޔަތް ކުރުމުގެ މަސައްކަތް ނިމިފައިވާކަމަށް އާޒިމް ވިދާޅުވިއެވެ.
ބަނދަރުގެ މަޝްރޫއުގެ މަސައްކަތްތައް ބާރު ސްޕީޑްގައި ކުރިއަށްދާކަން ފާހަގަކުރައްވައި އާޒިމް ވިދާޅުވީ، ބަނދަރަށް އަލަށް އިތުރުކުރެވުނު ބައިގެ ހުރިހާ މަސައްކަތެއް ނިމިފައިވާ ކަމަށެވެ. މިހާރު ކުރިއަށްދަނީ ޕޭމަންޓުގެ މަސައްކަތް ކަމަށާއި، ދާދި އަވަހަށް އެމަސައްކަތްވެސް ނިމޭނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މި ބަނދަރަކީ އެހެން ރަށްރަށުގައި ތަރައްގީކުރާ ބަނދަރުތަކަށްވުރެ ބޮޑު ހޭދައެއް ކޮށްގެން ތަރައްގީކުރާ ބަނދަރެއް ކަމަށާއި، ގާތްގަނޑަކަށް 88 މިލިއަން ރުފިޔާ މި ބަނދަރަށް ހޭދަވާނެ ކަމަށެވެ. މި ބަނދަރަކީ ރައްޔިތުންނާއި، ކައުންސިލުން ބޭނުންވާ ބަދަލުތައް ގެނެސްގެން ތަރައްގީކުރެވޭ ބަނދަރެއް ކަމަށް އާޒިމް ވިދާޅުވިއެވެ. އަދި ވިދާޅުވީ މިގޮތަށް މަސައްކަތްތައް ކުރިއަށްދާނަމަ ނޮވެންބަރު މަހުގެ ތެރޭގައި ބަނދަރުގެ މަސައްކަތްތައް އެއްކޮށް ނިންމައި ރައްޔިތުންނާ ހަވާލުކުރެވޭނެ ކަމަށެވެ.
މި މަޝްރޫއުގެ ދަށުން 78،000 ކިއުބިކް މީޓަރުގެ ސަރަހައްދެއްގައި ބަނދަރު ފުން ކޮށްފައިވާއިރު، 616 މީޓަރު ސަރަހައްދެއްގައި ބޭރުތޮށި ލުމާއި 185 މީޓަރު ސަރަހައްދެއްގައި ރިވެޓްމަންޓް ޖެހުމާއި 326 މީޓަރު ސަރަހައްދެއްގައި އެއްގަމު ތޮށިލާފައިވެއެވެ. އަދި 4320 އަކަމީޓަރު ސަރަހައްދެއްގައި ޕޭވްމަންޓް ހެދުމާއި ބަނދަރު ބައްތި ހަރުކުރުމުގެ މަސައްކަތް ހިމެނޭކަމަށް އެމްޓީސީސީން ބުނެއެވެ.
ދިއްދޫ ބަނދަރު ބޮޑުކުރުމާއި ޖެޓީ ހެދުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 2021 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހުއެވެ.
