ޑިސެމްބަރު މަހު ނިމުނު ވޯލްޑްކަޕް ފުޓްބޯޅަ މުބާރާތުން އެންމެ ގިނަ ފައިސާ ލިބުނު ކުލަބަކަށް މެންޗެސްޓާ ސިޓީވެއްޖެ އެވެ.
ކުޅުންތެރިން ނިސްބަތްވާ ކުލަބަށް ފީފާއިން ދޭން ހަމަޖައްސާފައިވަނީ 209 މިލިއަން ޑޮލަރެވެ. މީގެ ތެރެއިން އިނގިރޭސި އަދި ޔޫރަޕުގެ ޗެމްޕިއަން ސިޓީ އަށް ލިބިފައިވަނީ 4.6 މިލިއަން ޑޮލަރެވެ. ސިޓީގެ ފަހަތުން އެންމެ ގިނަ ފައިސާ ލިބިފައިވަނީ ސްޕޭނުގެ ބާސެލޯނާ އާއި ރެއާލް މެޑްރިޑް އަދި ޖަރުމަނުގެ ބަޔާން މިއުނިކަށެވެ.
ނަމަވެސް އެންމެ ގިނަ ފައިސާ ލިބިފައިވަނީ އިނގިރޭސި ކުލަބުތަކަށް ކަމުގައި ފީފާއިން ވަނީ ބުނެފަ އެވެ. އެއީ 37 މިލިއަން ޕައުންޑެވެ. އެކި ބައްރުތަކަށް ބަލާއިރު އެންމެ ގިނަ ފައިސާ ލިބުނީ ޔޫރަޕުގެ ކުލަބުތަކަށެވެ. އެއީ 158 މިލިއަން ޕައުންޑްއެވެ.
ނޮވެމްބަރު 20 އިން ޑިސެމްބަރު 18 އަށް ގަތަރުގައި ބޭއްވި ވޯލްޑްކަޕުގައި ކުޅުނު ކުޅުންތެރިން ނިސްބަތްވި ކުލަބުތަކަށް ފައިސާ ބަހާފައިވަނީ ކުޅުންތެރިން ވޯލްޑްކަޕުގައި ހޭދަކުރި މުއްދަތަށް ބަލާފަ އެވެ.
ފީފާގެ ރައީސް ޖިއާނީ އިންފަންޓީނޯ ވަނީ 2026 ވަނަ އަހަރު އޮންނަ ވޯލްޑްކަޕުގައި މިދިޔަ މުބާރާތަށްވުރެ ގިނަ ފައިސާ ކުލަބުތަކަށް ބަހަން ނިންމައިފަ އެވެ. މިއީ ކުލަބުތަކުން ކުޅުންތެރިން ގައުމީ ޓީމަށް ބާރު އެޅުމަށާއި ކުލަބުތަކުން ކުރާ މަސައްކަތުގެ އަގުވަޒަންކުރުމުގެ ގޮތުން ދޭ ފައިސާ އެވެ.
