ބާރަށު ނެރު ފުންކުރުމުގެ މަސައްކަތް މިމަހުގެ ވިއްސަށް ނިންމާލެވޭނެ: އާޒިމް

ހއ. ބާރަށު ނެރު ފުންކުރުމުގެ މަސައްކަތް މިމަހުގެ 20 ވަނަ ދުވަހާ ހަމައަށް ނިންމާލެވޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް މިފަދައިން ވިދާޅުވީ ބާރަށުގައި އެކުންފުނިން ކުރިއަށްގެންދާ މަސައްކަތްތައް ބައްލަވާލެއްވުމަށް މިމަހުގެ 10 ވަނަ ދުވަހު އެ ރަށަށް ވަޑައިގެން ނޫސްވެރިންނަށް މައުލޫމާތުދެއްވަމުންނެވެ.

އާޒިމް ވިދާޅުވީ ބާރަށުގައި އެކުންފުނިން މައިގަނޑު 2 ޕްރޮޖެކްޓެއް ކުރިއަށްދާކަމަށެވެ. އެއީ ބާރަށުގެ ނެރު ފުންކުރުމުގެ މަސައްކަތާއި، އެރަށުގެ ގިރާ ސަރަހައްދުތައް ހިމާޔަތްކުރުމުގެ މަސައްކަތް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ އެރަށު ނެރަކީ ޒަމާނުއްސުރެވެސް ބޭނުންކުރަން އުނދަގޫ ނެރެއް ކަމަށާއި، އެހެންކަމުން ނެރު ފުންކުރުމުގެ މަސައްކަތް ކުރިއަށްދާއިރު، ފުދޭވަރަކަށް ބޮޑަށް ނެރު ފުންކުރެވިގެންދާކަމަށެވެ. އަދި މި މަސައްކަތް 10 ވަރަކަށް ދުވަހުގެ ތެރޭގައި ނިންމާލެވޭނެ ކަމަށް އެދުވަހު އާޒިމް ވިދާޅުވިއެވެ.

ބާރަށު ނެރު އަދި ބަނދަރު ސަރަޙައްދު ފުންކުރުމުގެ މަޝްރޫޢުގެ ދަށުން 28،101 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމަށް ހަމަޖެހިފައިވެއެވެ. އަދި ނެރު ބައްތި ހަރުކުުރުމުގެ މަސައްކަތް ކުރުމަށްވެސް ހަމަޖެހިފައިވެއެވެ.

މި މަޝްރޫޢުއަކީ 12.17 މިލިއަން ރުފިޔާގެ މަޝްރޫޢޫއެކެވެ.