ފަލަސްތީނުގެ ރައީސް މަހުމޫދު އައްބާސް ފަލަސްތީނުގެ ހުޅަނގު އައްސޭރީގެ ރެފިޔުޖީ ކޭމްޕަށް ވަޑައިގެންފިއެވެ.
މަހުމޫދު އައްބާސް ޖެނިން ރެފިޔުޖީ ކޭމްޕަށް މިވަޑައިގެންނެވީ ޖެނިންގައި ކުރިޔަށްދިޔަ ޖަނާޒާއެއްގައި މަހުމޫދު އައްބާސްގެ އިސް ތިން އޮފިޝަލަކަށް އެސަރަހައްދު ދޫކޮށް ދާން މަޖުބޫރުވި ހާދިސާއާއި ގުޅިގެން މަޝްރަހު ފިނިކުރުމަށެވެ. ޖަނާޒާގައި ބައިވެރިވި މީހުން ރުޅި އައިސްފައިވަނީ އިސްރާއީލުން ޖެނިން ރެފިޔުޖީ ކޭމްޕްގައި 48 ގަޑިއިރުގެ މުއްދަތަށް ހިންގި ރެއިޑާއި ގުޅިގެންނެވެ.
ޖަނާޒާގައި ބައިވެރިވި މީހުންގެ ރުޅިވެރިކަމަކީ ފަލަސްތީނުގެ ސަރުކާރާމެދު ރައްޔިތުން ދެކޭގޮތް އެންމެ ބޮޑަށް މިފަހުން ހާމަވެގެންދިޔަ ހާދިސާއެވެ. ފަލަސްތީނު ސަރުކާރުގެ މަގުބޫލުކަން ކުޑަވަމުންދާއިރު ފަލަސްތީނުގައި އުފެދިފައިވާ އެކި ޖަމާއަތްތަކުގައި އުފެދިފައިވާ ދެބަސްވުންވެސް ވަނީ އިތުރުވަމުންނެވެ.
އައްބާސްގެ ފަތަހަ ޕާޓީއަށް ނިސްބަތްވާ ތިން މެންބަރުން ޖަނާޒާއިން ފައްސާލަމުން އެތައް ހާސް ބަޔަކު ގޮވަމުންދިޔައީ ތަންދޫކޮށް ދިޔުމަށެވެ.
އުމުރުފުޅުން 87 އަހަރުގެ އައްބާސް ފަހުން ވަނީ ޖަނާޒާ ކުރިޔަށްދިޔަ ގަބުރުސްތާނަށް ވަޑައިގަންނަވާފައެވެ. މިގަބުރުސްތާނު އޮންނަނީ ޖެނިން ރެފިޔުޖީ ކޭމްޕަށް ވަންނަ ތަނުގައެވެ.
ފާއިތުވި 20 އަހަރުގެ ތެރޭގައި އިސްރާއީލުން ޖެނިން ރެފިޔުޖީ ކޭމްޕްގައި ކުރިޔަށްގެންދިޔަ އެންމެ ވަރުގަދަ ރެއިޑްގައި ވެއްޓިފައިވާ އެތައް ސަތޭކަ އިމާރާތްތަކާއި ހަލާކުވެފައިވާ މަގުތައް ކުރިމަތީ ހުންނަވާ އެއްވެފައިވާ މީހުންނާ މުޚާތަބުކުރައްވާ އައްބާސް ވަނީ ވާހަކަފުޅުދައްކަވާފައެވެ. ގާޑުންގެ ފައުޖަކާއެކު ސަލާމަތީ ފިޔަވަޅުތައް އަޅުއްވައިގެން ހުންނަވާ އައްބާސް ވިދާޅުވީ ފަލަސްތީނުގެ ބިމުގެ ދިފާއުގައި ކުރެވެން ހުރި ހުރިހާ މަސައްކަތެއް، ވާންޖެހުނު ކޮންމެ ގުރުބާނީއެއް އިސްރާއީލާ ދެކޮޅަށް ޖެނިން ކޭމްޕް ކޮށްފައިވާކަމަށެވެ. އަދި ޖެނިން ކޭމްޕް އަލުން ބިނާކުރެވޭނެކަމަށް އައްބާސް ވިދާޅުވިއެވެ.
އައްބާސް ވަނީ އިސްރާއީލުން ޖެނިންގައި ކުރިޔަށްގެންދިޔަ ރެއިޑް ކުށްވެރިކުރައްވާ އިސްރާއީލާއެކު ސަލާމަތީގޮތުން އެއްބާރުލުން ދިނުން ހުއްޓާލެއްވީކަމަށް ވިދާޅުވެފައެވެ.
ނަމަވެސް ފަލަސްތީނުގެ ރައްޔިތުން ގަބޫލުކުރާ ގޮތުގައި އެމީހުންނާ މެދު އެއްވެސް ބަޔަކު އަޅައެއް ނުލައެވެ. އިސްރާއީލުން އަންނަނީ ފާއިތުވި އަހަރުތަކުގައި މިފަދަ ރެއިޑްތައް ފަލަސްތީނުގެ އެކި ސިޓީތަކުގައި ހިންގަމުންނެވެ. މިފަދަ ރެއިޑްތަކުގައި ފަލަސްތީނުގެ އެތައް ސަތޭކަ ހަނގުރާމަވެރިންގެ އިތުރުން އާންމުންވެސް ވަނީ މަރުވެފައެވެ.
މީގެ 30 އަހަރު ކުރިން އެއްބަސްވެފައިވާ އޮސްލޯ މުއާހަދާގެ ދަށުން ފަލަސްތީނުގެ ސަރުކާރުގެ ބާރު ހުޅަނގު އައްސޭރީގެ ގިނަ ހިސާބުތަކުގައި ނޯވެއެވެ. އޭގެތެރޭގައި ޖެނިން ރެފިޔުޖީ ކޭމްޕް ހިމެނޭއިރު ފަލަސްތީނު ސަރުކާރަށް ވަނީ އިސްރާއީލުން ހިންގަމުން އަންނަ ރެއިޑްތައް ހުއްޓުވާލުމުގަޔާއި ފަލަސްތީނުގައި ހަރަކާތްތެރިވާ އަސްކަރީ ގްރޫޕްތައް ކޮންޓްރޯލްކުރުމުގައި ނުކުޅެދިފައެވެ.
މިދިޔަ ހަފްތާގައި ޖެނިން ރެފިޔުޖީ ކޭމްޕްގެ ޖަނާޒާގައި ހިނގާ ދިޔަ ކަންތައްތަކާއި ގުޅިގެން ފަލަސްތީނުގެ ސެކިޔުރިޓީ ފައުޖުތަކާއި އައްބާހުގެ ގާޑުން ވަނީ އެސަރަހައްދުގައި އިތުރުކޮށްފައެވެ.
