އަންހެނުންގެ ވޯލްޑްކަޕް ފަށަނީ ކޮންއިރަކު؟ ކޮންތާކު؟

ދުނިޔޭގެ ފުޓްބޯޅަ ޖަމިއްޔާ ފީފާއިން އިންތިޒާމްކުރާ އަންހެނުންގެ ވޯލްޑްކަޕް ފުޓްބޯޅަ މުބާރާތް ނުވަ ވަނަ ފަހަރަށް މި މަހު ބާއްވަން ތައްޔާރުވެއްޖެ އެވެ.

ކޮންމެ ތިން އަހަރަކުން އެއްފަހަރު ބާއްވާ މި މުބާރާތް ފަށާނީ އަންނަ ބުރާސްފަތި ދުވަހު އެވެ. މުބާރާތުގެ މެޗުތައް ކުޅޭނީ އޮސްޓްރޭލިޔާ އާއި ނިއުޒީލޭންޑްގަ އެވެ.

މުބާރާތުގެ ފުރަތަމަ މެޗުގައި އޯކްލޭންޑްގައި ބައްދަލުކުރާނީ ނިއުޒީލޭންޑާއި ނޯވޭ އެވެ. އެދުވަހު އޮސްޓްރޭލިޔާ ނުކުންނާނީ ރިޕަބްލިކް އޮފް އަޔަލޭންޑާ ދެކޮޅަށެވެ.

މި ފަހަރުގެ މުބާރާތުގައި 32 ގައުމު ވާދަކުރާނެ އެވެ. މީގެ ކުރިން މި މުބާރާތް ބާއްވަމުން އައީ 24 ޓީމުގެ މެދުގަ އެވެ. މި ބަދަލަކީ ފީފާގެ ރައީސް ކަމަށް ޖިއާނީ އިންފަންޓީނޯ އައުމަށްފަހު ދެ ޖިންސް ހަމަހަމަކުރުމުގެ ގޮތުން ގެނެސްފައިވާ ބަދަލެކެވެ. މުބާރާތުގައި ކުޅޭ 32 ގައުމު އަށް ގްރޫޕަކަށް ވަނީ ބަހާލައިފަ އެވެ. ދެ ވަނަ ބުރަށްދާނީ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެ ގައުމެވެ. ފައިނަލް މެޗާއެކު ޖުމުލަ 64 މެޗު ކުޅޭނެ އެވެ.

މި ފަހަރުގެ މުބާރާތަކީ އަލަށް ވޯލްޑްކަޕުގައި އަށް ގައުމެއް ވާދަކުރާ ފަހަރެކެވެ. އެ ގައުމުތަކަކީ މޮރޮކޯ، ހައިޓީ، ޕެނަމާ، ޕިލިޕީންސް، ޕޯޗުގަލް، އަޔަލޭންޑް، ވިއެޓްނާމް އަދި ޒެމްބިއާ އެވެ.

މުބާރާތުގެ މެޗުތައް ކުޅޭނީ 10 ސްޓޭޑިއަމެއްގަ އެވެ. އެއީ އޮސްޓްރޭލިޔާގެ 6 ސްޓޭޑިއަމަކާއި ނިއުޒީލޭންޑްގެ ހަތަރު ސްޓޭޑިއަމެއްގަ އެވެ. އޮސްޓްރޭލިޔާގައި މެޗުތައް ކުޅޭނީ ސްޓޭޑިއަމް އޮސްޓްރޭލިޔާ އާއި ސިޑްނީ ފުޓްބޯޅަ ސްޓޭޑިއަމާއި، ބްރިސްބޭން ސްޓޭޑިއަމާއި، މެލްބަން ރެކްޓޭންގިއުލާ ސްޓޭޑިއަމް އަދި ޕާތް ރެކްޓޭންގިއުލާ ސްޓޭޑިއަމާއި ހިންޑްމާޝްގަ އެވެ.

ނިއުޒީލޭންޑްގައި މެޗުތައް ކުޅޭނީ އޯކްލޭންޑްގެ އެޑެން ޕާކާއި ވެލިންގްޓަން ރީޖަނަލް ސްޓޭޑިއަމާއި ފޯސީތްބާ އާއި ވައިކާޓޯގަ އެވެ. މުބާރާތުގެ މެޗުތައް ވަގުތުން ދުރަށް ދައްކާނެ އެވެ. ރާއްޖެ އަށް ވެސް މެޗުތައް ފެންނާނެ އެވެ.