ހޮޅުދޫގައި މަގު ކޮންނަނިކޮށް ފާރެއް ވެއްޓި، 3 މީހުންނަށް އަނިޔާވެއްޖެ
11 ޖުލައި 2023 | އަންގާރަ 17:21އަނިޔާވެފައިވަނީ ހޮޅުދޫގެ ތިން މީހުންނަށް
ނ. ހޮޅުދޫގައި ހިނގި ހާދިސާއެއްގައި ފާރު ވެއްޓިފައި
ނ. ހޮޅުދޫގައި މަގު ހެދުމުގެ މަސައްކަތް ކުރަނިކޮށް ފާރެއް ވެއްޓި ތިން މީހަކަށް އަނިޔާވެއްޖެއެވެ.
އެ ރަށު ކައުންސިލްގެ ރައީސް ރިޟުވާން މުޙައްމަދު "ރާއްޖެއެމްވީ"އަށް ވިދާޅުވިގޮތުގައި މި ހާދިސާ ހިނގާފައިވަނީ އަންގާރަ ދުވަހުގެ ހަވީރު 5:45 އެހާއިރުއެވެ. ހާދިސާ ހިނގާފައިވަނީ މަގު ހެދުމުގެ މަސައްކަތުގައި، ފާރާ ކައިރިން މަގު ކޮނުމަށްފަހު ހޮޅި ވަޅުލަމުން ދަނިކޮށްކަމަށް އޭނާ ވިދާޅުވިއެވެ.
ރިޟުވާން ވިދާޅުވީ މި ހާދިސާގައި އަނިޔާވެފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގައި މަސައްކަތްކުރާ އެ ރަށުގެ ތިން ފިރިހެނުންނަށް ކަމަށެވެ. އެ ތިން މީހުންގެ ގައިމައްޗަށް ފާރު ވެއްޓިފައިވާއިރު، ލިބުނު އަނިޔާއަށް ފަރުވާ ދިނުމަށް ރ. އަތޮޅު އުނގޫފާރު ރީޖަނަލް ހޮސްޕިޓަލަށް ގެންގޮސްފައިވާ ކަމަށްވެސް އޭނާ ވިދާޅުވިއެވެ.
މި ހާދިސާގައި އަނިޔާވެފައިވާ ތިން މީހުންގެ ތެރެއިން އެކަކުގެ ކޮނޑު ކަށިގަނޑު ބިނދިފައިވާކަމަށާއި އަނެކަކުގެ ފުރަގަހުގެ ކަށިގަނޑެއް ހަތަރު ތަނަކުން ބިންދައިގެން ގޮސްފައިވާކަމަށް ވެސް ރިޟުވާނު ވިދާޅުވިއެވެ. އަދި ތިންވަނަ މީހާއަށް މާބޮޑު އަނިޔާއެއް ނުވާކަމަށް އޭނާ ވިދާޅުވިއެވެ.
