ދިވެހިބަހުގެ ޒަމާންވީ ހަމަތަކަށް ނުފެތޭ އިބާރާތްތަކާއި ލިޔުންތައް ދަނީ ގިނަވަމުން، އިތުރަށް ސަމާލުވޭ: ޑރ.އަޝްރަފް
8 ޖުލައި 2023 | ހޮނިހިރު 07:48އަބަދުވެސް ގައުމުގެ ހެވާއި ލާބައަށް އިސްކަންދޭންޖެހޭ
ދިވެހިބަހުގެ އެކަޑަމީގެ ރައީސް ޑރ. އަޝްރަފު އަބްދުއްރަހީމް
މިހާރު ދިވެހިބަހުގެ ޒަމާންވީ ހަމަތަކަށް ނުފެތޭ އިބާރާތްތަކާއި ލިޔުންތައް ގިނަވަމުންދާކަމަށާއި، އިތުރަށް ސަމާލުވާންޖެހޭ ކަމަށް ދިވެހިބަހުގެ އެކަޑަމީގެ ރައީސް ޑރ. އަޝްރަފު އަބްދުއްރަހީމް ވިދާޅުވެއްޖެއެވެ.
ޑރ. އަޝްރަފް މިހެން ވިދާޅުވީ ލިޔުންތެރީންގެ ދުވަހާ ގުޅިގެން ދެއްވި ޚިތާބުގައެވެ. އޭނާ ވިދާޅުވީ މިއަދުގެ ލިޔުންތެރިންނަކީ މި ގައުމު ބައްޓަންކޮށްދީ، އަންނާން އޮތް ޖީލުތަކަށް ސަލާމަތާއި ރައްކާތެރިކަމާއެކު ގައުމު ގެންގޮސްދިނުމުގައި މުހިންމު ދައުރެއް އަދާކުރާ ބަޔެއްކަމެއް ކަަމަށެވެ. އަދި ގައުމުގެ ބޮޑެތި މައްސަލަތަކަށް އަލިއަޅުވާލައި ލިޔުންތައް ލިޔެވިދާނެ ކަމަށާއި, ނަމަވެސް ލިޔަންވާނީ ފިތުނައާއި ހަސަދައިން އެއްކިބާވެ، ތެދުވެރިކަމާއެކު ކަމަށެވެ. ސިޔާސީ ކޯޅުންތަކަށާއި، ޚިޔާލު ތަފާތުވާ ބޮޑެތި މައްސަލަތަކުގައި އިތުރަށް ހުޅުހިފައި އަނދައިގަންނާނޭ ގޮތަށް ދަރުގަނޑު ހެޔޮވަރުކޮށްލައިދޭ ލިޔުންތެރިއަކަށް ވެގެން ނުވާނެކަމަށްވެސް އޭނާ ވިދާޅުވިއެވެ. އޭނާ ވިދާޅުވީ އަބަދުވެސް ގައުމުގެ ހެވާއި ލާބައަށް އިސްކަންދޭންޖެހޭ ކަމަށާއި، ލިޔުންތެރީން ސަމާލުވާންޖެހޭ ކަމަށެވެ.
ޑރ. އަޝްރަފް ވިދާޅުވީ މިއަދު ނުކުންނަނީ އެންމެ މަޖައްލާއެއް އެންމެ ނޫހެއް ނޫން ކަމަށެވެ. އޭރުގެ ހާލަތާއި މިހާރުގެ ހާލަތު ނުހަނު ތަފާތު ކަމަށާއި، މިއީ އޮންލައިނުގެ ޒަމާންކަން އޭނާ ފާހަގަކުރެއްވިއެވެ. އޭނާ، ވިދާޅުވީ ޗާޕުކޮށްގެން ނެރެވޭ ނޫހާއި މަޖައްލާގެ އަދަދު މަދު ނަމަވެސް އޮންލައިނުގެ ހޮޅުއަށިތަކުގައި ޒަމާނީ ވަސީލަތުގެ ބޭނުން ހިފައިގެން ތައްޔާރުކޮށްފައިވާ ނޫސްތަކާއި މަޖައްލާތަކާއި އަމިއްލަ ބުލޮގުތަކާއި ބޮޑެތި ވެބުސައިޓުތައް އިންތިހާއަށް ގިނަ ކަމަށެވެ. އަދި އަމިއްލަ ފޯނު މެދުވެރިކޮށް މިއިން ކޮންމެ ވަސީލަތެއްގައި ހުންނަ ލިޔުންތަކަށް ފަސޭހަކަމާއެކު ވާސިލުވެވޭ ކަމަށާއި، އިތުރު ބުރައެއް އުފުލާން ނުޖެހި ލިޔުންތައް ކިޔާން ބޭނުންވާ ބަޔަކަށް ކިޔައިލުމުގެ ފުރުސަތު ހުޅުވާލެވިފައިވާ ކަމަށެވެ.
ލިޔުންތެރީންގެ ދުވަހަކީ ދިވެހީންނަށް ޚާއްސަ ދުވަހެއްކަން ފާހަގަކުރައްވައި ޑރ. އަޝްރަފް ވިދާޅުވީ، ލިޔުންތެރީންގެ ލިޔުންތައް ހުންނަންވާނީ ދިވެހިބަހުން، ބަހުގެ ހަމަތަކާއި ބަހުގެ ނަލަކަން ފެންނަ ގޮތަށް ކަމަށެވެ. ނަމަވެސް ބައެއްގެ ލިޔުންތެރީންގެ ވިސްނުން ހުންނަ ގޮތުން ދިވެހިބަހާ ބީރައްޓެހި، ދިވެހިބަހުގެ ޒަމާންވީ ހަމަތަކަށް ނުފެތޭ އިބާރާތްތަކާއި ލިޔުންތައް ގިނަވަމުންދާ ކަމަށް ޑރ. އަޝްރަފް ވިދާޅުވިއެވެ. އަދި ވިދާޅުވީ ބަހުގެ އުސްތާޒުން ޒަމާނުއްސުރެ ގެންގުޅުނު ބަހުގެ ރީތި ހަމަތައް ދޫކޮށްލައި އަމިއްލަ ގޮތްތަކެއް އިހުތިޔާރުކޮށްގެން ނުވާނެ ކަމަށެވެ.
އެހެންކަމުން ބަހުގެ ހަމަތަކާ އެއްގޮތަށް ލިޔުންތައް ލިޔުމަށް ޑރ. އަޝްރަފް ވަނީ އިލްތިމާސްކުރައްވާފައެވެ. އޭނާ ވިދާޅުވީ ދިވެހި ގައުމާއި، ރާއްޖޭގެ ލިޔުންތެރިކަން އެއް ދުވަހުން އަނެއް ދުވަހަށް ތަރައްގީވެ ކުރިއަރައިގެން ދިއުމުގައި އެގޮތަށް އަމަލުކުރަންޖެހޭ ކަމަށެވެ.
ކޮންމެ އަހަރެއްގެ ޖުލައި މަހުގެ 8 ވަނަ ދުވަހަކީ ދިވެހި ލިޔުންތެރީންނަށް ޚާއްސަކޮށްފައިވާ ދުވަހެވެ.
ދިވެހި ސަރުކާރުން ލިޔުންތެރީންގެ ދުވަހެއް ކަމުގައި ހަމަޖައްސާފައިވަނީ މީގެ 90 އަހަރު ކުރިން ނެރުނު ''އަލްއިސްލާހް'' މަޖައްލާ ދުނިޔެއަށް ނޭވާލީ ދުވަހެވެ. ޚިދުމަތްތެރި ބޭފުޅުންކޮޅެއްގެ މިންނެތް އަދި ބުރަ މަސައްކަތްޕުޅުން ވުޖޫދަށް އައި މި މަޖައްލާ ނެރެފައިވަނީ 1933 ޖުލައި 08 ގައެވެ. އެކަމުގައި އެންމެ އިސް މޭސްތިރިއެއްގެ ގޮތުގައި ހުންނެވީ ރާއްޖޭގެ ފުރަތަމަ ދުސްތޫރީ ވެރިކަމުގެ ވަޒީރުއްދާޚިލިއްޔާ އަދި ވަޒީރުލްމައާރިފު އަލްއުސްތާޒު އަހުމަދު ކާމިލުދީދީ (ރަހިމަހުﷲ)އެވެ.
