މިނިސްޓްރީން ކަނޑައަޅައިފައިވާ ގަވާއިދުތަކަށް ނުފެތޭ ތަންތަނުގައި ފަތުރުވެރިން ނުބޭތިއްބުމަށް އިލްތިމާސް ކޮށްފި
ލައިސަންސްނެތި ފަތުރުވެރިން ބޭތިއްބިކަމުގެ ހެކި ލިބިފައިވާ ދެ ތަނެއްގެ މައްސަލަ ތަހްގީގުކުރުމަށް ހުށަހަޅާއިފައިވޭ
ރިސޯޓް
ޓުއަރިޒަމް މިނިސްޓްރީން ކަނޑައަޅައިފައިވާ ގަވާއިދުތަކަށް ނުފެތޭ ތަންތަނުގައި ގަވާއިދާއި ހިލާފަށް ފަތުރުވެރިން ނުބޭތިއްބުމަށް އެ މިނިސްޓްރީން އިލްތިމާސް ކޮށްފިއެވެ.
އަންގާރަ ދުވަހުގެ ރޭ ޓުއަރިޒަމް މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ ދިވެހި ރާއްޖޭގެ އެއްވެސް ޓުއަރިސްޓް ރިޒޯޓެއް ، ޓުއަރިސްޓް ހޮޓަލެއް ނުވަތަ ނުވަތަ ގެސްޓް ހައުސްއެއް ހިންގަންވާނީ އެ މިނިސްޓްރީގައި ރެޖިސްޓްރީކޮށް ހިންގުމަށް ދޫކުރާ ހުއްދަ ހޯދުމަށް ފަހުގައި ކަމަށެވެ. އަދި އެތަންތަން ހިންގުމުގެ ހުއްދަ ދޫކުރާނީ މިނިސްޓްރީން ކަނޑައަޅާ މިންގަނޑުތަކަށް އިމާރާތާއި އެފަދަ ތަންތަނުން މިނިސްޓްރީން ކަނޑައަޅާ ހިދުމަތްތައް އެތަންތަނުން ލިބެން ހުންނަ ނަމައެވެ.
މީގެއިތުރުން އެ ބަޔާނުގައި އިތުރަށް ބުނެފައިވަނީ ކައުންސިލްތަކަށް އަންގާރަ ދުވަހުގެ ރޭ އޮޕަރޭޓިންގެ ލައިސަންސް ނެތި މީހުން އުޅޭ ރަށްރަށުގައި ފަތުރުވެރިން ބައިތިއްބާނަމަ އެފަރާތްތަކުގެ މައުލޫމާތު 30 ދުވަހުގެ ތެރޭގައި މިނިސްޓްރީއަށް ހުށަހެޅުމަށް އަންގާފައިވާ ކަމަށެވެ. އަދި އޮޕަރޭޓިންގް ލައިސަންސް ހަމަވެފައިވާ ތަންތަން ، ލައިސަންސެއް ދެވޭ ފެންވަރަށް އިސްލާހުކުރުމަށް ފުރުސަތުދީ އެކަންކަން ރަނގަޅުކުރުމުގެ ޕްލޭނަކާއި ޕްރޮޕޯސަލް ހުށަހެޅުމަށް ވެސް 30 ދުވަހުގެ މުއްދަތެއް ދީފައިވާ ކަމަށެވެ. ނޫސްބަޔާނުގައި އިތުރަށް ބުނެފައިވަނީ ވަގުތީ ހުއްދައެއް ދޫކުރުމުގައި އެ ތަނެއްގެ ސަލާމަތާއި ރައްކާތެރިކަމަށް ބެލުމުގެ އިތުރުން މުވައްޒަފުންގެ ހައްގުތަކާއި ދައުލަތަށް ދައްކަން ހުރި ފައިސާއާއި މިނިސްޓްރީން ބަލާ މިންގަޑުތައް ހިމެނޭނެ ކަމަށެވެ.
ގާނޫނާއި ގަވާއިދާއި ހިލާފަށް އޮޕަރޭޓިންގް ލައިސަންސްނެތި ފަތުރުވެރިން ބޭތިއްބިކަމުގެ ހެކި ލިބިފައިވާ ދެ ތަނެއްގެ މައްސަލަ ތަހްގީގުކުރުމަށް މޯލްޑިވިސް ޕޮލިސް ސާރވިސްއަށް ހުށަހަޅާފައިވާކަމަށް ވެސް ބަޔާނުގައިވެއެވެ،
