ފޮތް ކިއުމުގައި ދިވެހިބަހުން ހުރި ފޮތްތައް ކިޔަން އިސްކަންދީ: ދިވެހިބަހުގެ އެކަޑަމީ
މިއަހަރުގެ ޝިޢާރުން ބާރު އަޅަނީ ދިވެހި ބަހުން ލިޔެފައިވާ ފޮތްތައް ކިއުމަށް
ސާފު ދިވެހި ބަހުން ވާހަކަ ދެއްކުމުން ކުދިންގެ ބަސްމޮށުންތެރިކަމާއި ބަހުގެ ޤާބިލިއްޔަތު ތަނަވަސް ވެގެންދާނެ
ފޮތް ކިއުމުގައި ދިވެހިބަހުން ލިއެފައި ހުންނަ ފޮތް ކިއުމަށް އިސްކަން ދިނުމަށް ދިވެހި ބަހުގެ އެކަޑަމީން އިލްތިމާސްކޮށްފިއެވެ.
އަންގާރަ ދުވަހު ފާހަގަކުރަމުންދާ ދިވެހި ބަހުގެ ދުވަހުގެ މުނާސަބަތުގައި ދިވެހި ބަހުގެ އެކަޑަމީން ނެރުނު ނޫސް ބަޔާނެއްގައި ބުނީ، މި އަހަރުގެ ދިވެހިބަހުގެ ދުވަހުގެ ޝިޢާރަކީ" ފޮތް ކިޔުމާއި މުއާމަލާތު ކުރުން: އިސްކަން ދިވެހިބަހަށް” ކަމަށެވެ. އެގޮތުން މި ޝިޢާރުން ބާރު އަޅަނީ ދިވެހި ބަހުން ލިޔެފައިވާ ފޮތްތައް ކިއުމާއި ދިވެހިބަހުން މުއާމަލާތު ކުރުމަށް ކަމަށް ބަޔާނުގައި ބުނެފައިވެއެވެ. އަދި ދިވެހީންގެ މަޞްލަޙަތު އޮންނަ ހުރިހާ ކަމެއްގައި ލިއެވޭ ލިއުންތައްވެސް ދިވެހި ބަހުން ލިއުމަށް އިސްކަން ދިނުމަށް ގޮވާލާފައިވެއެވެ.
އޭގެ އިތުރުން، މިއީ ކޮވިޑް-19 ފެތުރެމުންދާ ދުވަސްވަރެއްކަން ފާހަގަކޮށް ބަޔާނުގައި އިތުރަށް ބުނީ، ދުނިޔޭގެ ސިއްޙަތު ޖަމުޢިއްޔާއިން އިލްތިމާސް ކުރައްވާފައިވާ ގޮތަށް އެކަކު އަނެކަކާ އިޖުތިމާޢީ ގައިދުރުކަން ބެހެއްޓުމާއި، އުޅޭ އުޅުމުގައި ޖިސްމާނީ ގައިދުރުކަން ވެސް ބެހެއްޓުމަށް އިސްކަންދޭން ޖެހޭނެ ކަމަށެވެ. އަދި ގޭގައި ގިނަ ވަގުތު ހޭދަކުރަން ޖެހޭއިރު، ފޫހިފިލުވުމަށް ކިޔާ ފޮތަކީ ދިވެހިބަހުން ލިޔެފައިވާ ފޮތަކަށް ހެދުމަށް ޢަމާޒު ހިފުމަށް އެކަޑަމީން އިލްތިމާސްކޮށްފައިވެއެވެ.
ވަކީން ޚާއްޞަކޮށް މައިންބަފައިންނާއި، ބެލެނިވެރިން ދަރީންނާ ދިވެހިބަހުން ވާހަކަ ދެއްކުމަކީ އުފަލަކަށް ހަދަންޖެހޭކަން ފާހަގަކޮށް ބަޔާނުގައި އިތުރަށް ބުނީ، ކުޑަކުދީންނާ ސާފު ދިވެހިބަހުން ވާހަކަ ދެއްކުމަކީ އެކުދީންގެ ތަރުބިއްޔަތު ހަރުދަނާ ވުމުގެ އިތުރަށް ބަހުގެ ހުނަރު ވަރުގަދަކޮށްދޭނެ ކަމެއް ކަމަށެވެ. އަދި އެކަމުގެ ސަބަބުން ކުދިންގެ ބަސްމޮށުންތެރިކަމާއި ބަހުގެ ޤާބިލިއްޔަތު ތަނަވަސްވެގެންދާނެ ކަމަށް ބަޔާނުގައި ބުނެފައިވެއެވެ.
ކޮންމެ އަހަރެއްގެ އޭޕްރީލް މަހުގެ 14 ވަނަ ދުވަހަކީ ރާއްޖޭގައި ފާހަގަކުރާ ދިވެހިބަހުގެ ދުވަހެވެ.
