ކައުންސިލް އިންތިޚާބުގައި މާލޭގައި ވޯޓުލީ މީހުން އަލުން ރަޖިސްޓްރީ ކުރާކަށް ނުޖެހޭނެ
މާލެ ނޫން ރަށްރަށުގައި ރީ ރަޖިސްޓްރީ ކުރި ފަރާތްތައް ރިޔާސީ އިންތިޚާބުގައި ރަޖިސްޓްރީ ވެފައި އޮންނާނީ އެ މީހެއްގެ ދާއިމީ އެޑްރެހުގައި
އީސީގެ ރައީސް (ވ) އާއި ނައިބު ރައީސް (ކ)
އެންމެ ފަހުން ބޭއްވި ލޯކަލް ކައުންސިލް އިންތިޚާބުގައި މާލެ ސިޓީގައި ވޯޓުލުމަށް ރީ ރަޖިސްޓަރ ކުރި ފަރާތްތަކުން މިއަހަރުގެ ރިޔާސީ އިންތިޚާބުގައި އަލުން މާލޭގައި ވޯޓުލާން ރަޖިސްޓްރީ ކުރަން ނުޖެހޭ ގޮތަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އިލެކްޝަންސް ކޮމިޝަނުން މިގޮތަށް ނިންމާފައިވަނީ ބުރާސްފަތި ދުވަހު ބޭއްވި އެ ކޮމިޝަނުގެ ބައްދަލުވުމެއްގައެވެ.
މިކަމާ ގުޅޭ ގޮތުން "ރާއްޖެ ޓީވީ" އަށް މައުލޫމާތު ދެއްވަމުން އިލެކްޝަންސް ކޮމިޝަނުގެ ނައިބު ރައީސް، އިސްމާއިލް ހަބީބު ވިދާޅުވީ ކޮންމެ އަހަރެއްގެވެސް ރިޔާސީ އިންތިޚާބުގައި ރީ ރަޖިސްޓްރީ ކުރުމުގެ މަރުހަލާ ފަށަނީ ސުމަކުން ކަމަށެވެ. އެހެންކަމުން ކޮންމެ ރިޔާސީ އިންތިޚާބެއްގައި ވޯޓުލުމުގެ ޙައްގު ލިބިފައިވާ ފަރާތްތައް ރަޖިސްޓްރީވެފައި އޮންނާނީ އެ މީހެއްގެ ދާއިމީ އެޑްރެހުގުއި ކަމަށާއި އެކަން ބަދަލު ކޮށްދިނުމަށް ލަފާ ދޭ ކޮމިޓީގައި ބުދަ ދުވަހު މަޝްވަރާ ކުރެވުނު ކަމަށެވެ.
ބުދަ ދުވަހު ބޭއްވީ ރިޔާސީ އިންތިޚާބުގެ ޤައުމީ ލަފާދޭ ކޮމިޓީގެ ދެވަނަ ބައްދަލުވުމުގައި ސިޔާސީ ޕާޓީތަކުން ބޭފުޅުންނާއި އަދި އިންތިޚާބާ ގުޅުންހުރި އެހެނިހެން އިދާރާތަކުން ވެސް ވަނީ ރީ ރަޖިސްޓްރޭޝަންގެ މަރުހަލާ ސުމަކުން ނުފެށުމަށް އީސީއަށް ލަފާ ދީފައެވެ. އެގޮތުން، މީގެ ސަބަބުން ބައެއް ފަރާތްތަކަށް ވޯޓުލުމުގެ ޙައްގު ގެއްލިދާނެ ކަމުގެ ކަންބޮޑުވުން ވަނީ ފާޅުކޮށްފައެވެ.
ހަބީބު ވިދާޅުވީ ކޮމިޓީގައި ކުރެވުނު މަޝްވަރާތަކަށް ރިއާޔަތްކޮށް ބަދަލު ގެންނަން ނިންމީ މާލެއަށް އެކަނި ކަމަށެވެ. އެގޮތުން، 2021 ވަނަ އަހަރު ބޭއްވި ލޯކަލް ކައުންސިލް އިންތިޚާބުގައި މާލޭގައި ވޯޓުލުމަށް ރީ ރަޖިސްޓްރީ ކުރި ފަރާތްތަކުން މިއަހަރުގެ ރިޔާސީ އިންތިޚާބުގައި މާލޭގައި ވޯޓުލުމަށް ރީ ރަޖިސްޓަރ ކުރަން ނުޖެހޭނެ ކަން އޭނާ ފާހަގަކުރެއްވިއެވެ. މިއީ އެކި ރަށްރަށުން މާލެއަށް ބަދަލުވެގެން ތިބި ގިނަ ބަޔަކަށާއި ސިޔާސީ ޕާޓީތަކަށް ވެސް ލިބިގެންދާނެ ލުޔެއް ކަމަށް އޭނާ ވިދާޅުވިއެވެ.
އީސީން މި ބަދަލު ގެނައި ނަމަވެސް ލޯކަލް ކައުންސިލް އިންތިޚާބުގައި މާލެ ނޫން ރަށްރަށުގައި ރީ ރަޖިސްޓްރީ ކުރި ފަރާތްތައް ރިޔާސީ އިންތިޚާބުގައި ރަޖިސްޓްރީ ވެފައި އޮންނާނީ އެ މީހެއްގެ ދާއިމީ އެޑްރެހުގައި ކަމަށާއި އެހެންކަމުން އެ ފަރާތްތައް އެ ރަށް ނޫން އެހެން ރަށެއްގައި ވޯޓުލާނަމަ ރީ ރަޖިސްޓަރ ވާން ޖެހޭނެ ކަމަށެވެ. މިއީ ފަރުދީ ޒިންމާއެއްކަން ފާހަގަކުރައްވައި އޭނާ ވަނީ އެ ޒިންމާ އަދާ ކުރުމަށް ވޯޓުލުމުގެ ޙައްގު ލިބޭ ހުރިހާ ފަރާތްތަކަށް އިލްތިމާސްކުރައްވާފައެވެ.
މީގެ އިތުރުން ކައުންސިލް އިންތިޚާބުގައި މާލޭގައި ރަޖިސްޓްރީ ކޮށްފައި އޮތް ނަމަވެސް ރިޔާސީ އިންތިޚާބުގެ ރަޖިސްޓްރީ ނުކުންނައިރު ވޯޓުލާން އޮތީ މާލޭގައި ކަން ކަށަވަރު ކުރުމަށް ވެސް ހަބީބު އިލްތިމާސްކުރެއްވިއެވެ.
މިއަހަރުގެ ރިޔާސީ އިންތިޚާބަށް ރީ ރަޖިސްޓްރޭޝަނަށް މި މަހުގެ 16 ވަނަ ދުވަހު ހުޅުވާލާނެއެވެ. މި ފުރުސަތު އަންނަ އޮގަސްޓް މަހުގެ ފަސް ވަނަ ދުވަހާ ހަމައަށް ހުޅުވާލާއިރު މި މަހުގެ 16 އިން 29 ގެ ނިޔަލަށް، އޮންލައިންކޮށް ރީ ރަޖިސްޓަރ ކުރެވޭނެއެވެ. އަދި ޖުލައި 30 އިން އޮގަސްޓު 5 އަށް ރީރަޖިސްޓްރީ ކުރަން ޖެހޭނީ ފޯމު ހުށަހަޅައިގެންނެވެ.
މިއަހަރުގެ ރިޔާސީ އިންތިޚާބު ސެޕްޓެމްބަރު 9 ގައި ބާއްވާއިރު މި އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވެއެވެ.
