ނަސްލީ ތަފާތުކުރުން ހުއްޓުވުމުގެ ގާނޫނަށް ރިއޯ ސަރުކާރުން ވިނީޝިއަސް ޖޫނިއާގެ ނަމުން ނަން ދީފި
7 ޖުލައި 2023 | ހުކުރު 02:43އެ ގާނޫނަށް ކިޔާފައިވަނީ "ވިނީ ޖޫނިއާ ލޯ"
ވިނީޝިއަސް ޖޫނިއާ
ބްރެޒިލްގެ ސްޓޭޓެއް ކަމުގައިވާ ރިއޯ ޑި ޖެނީރޯގެ ސަރުކާރުން ރެއާލް މެޑްރިޑްގެ ފޯވާޑް ވިނީޝިއަސް ޖޫނިއާގެ ނަމުގައި ނަސްލީ ތަފާތުކުރުމާ ދެކޮޅަށް ގާނޫނެއް ހެދުމަށް ނިންމައިފިއެވެ.
މި ގާނުނުގެ ދަށުން ފުޓުބޯޅަ ނުވަތަ އެހެނިހެން ކުޅިވަރު ހަރަކާތެއްގެ ތެރެއިން ނަސްލީ ތަފާތު ކުރުމުގެ އަމަލެއް ހިނގައިފިނަމަ އެ ކުޅިވަރު ހަރަކާތެއް ހުއްޓާލުން ނުވަތަ ސަސްޕެންޑް ކުރާނެއެވެ.
މިދިޔަ މެއި މަހު މެޑްރިޑުން ވެލެންސިއާއާ ދެކޮޅަށް ކުޅުނު މެޗުގައި ބްރެޒިލްގެ ފޯވާޑް ވިނީސިއަސްއަށް ސަޕޯޓަރުން ނަސްލީ ގޮތުން ފުރައްސާރަ ކުރި އިރު، މިއީ އެ ސީޒަނުގައި ސްޕެނިޝް ލީގުން ޕްރޮސެކިއުޓަރުންނަށް ރިޕޯޓްކުރި 22 އަހަރުގެ ވިނީސިއަސްއާ ގުޅޭ މިފަދަ 10 ވަނަ ހާދިސާ އެވެ.
އެ ގައުމުގެ މީޑިއާތަކުން ބުނެފައިވަނީ އެ ގާނޫނަކީ ވެލެންސިއާގެ މެސްޓަލާ ސްޓޭޑިއަމްގައި ހިނގި ހާދިސާއާ ގުޅިގެން އެ ކުޅުންތެރިޔާ ދިން ޖަވާބުން ހިތްވަރު ލިބިގެން ހަދާފައިވާ ގާނޫނެއް ކަމަށެވެ. ސްޓޭންޑްތަކުގައި އޭނާއަށް ނަސްލީ ގޮތުން ގޯނާކުރާ މީހުންނަށް ކުޅުންތެރިޔާ އިޝާރާތް ކުރިއިރު، މެޗު އެތައް މިނެޓަކަށް މެދުކަނޑާލާފައިވެއެވެ.
މިދިޔަ ޖޫން މަހު ރިއޯ ސަރުކާރުގެ އިއްތިފާގުން ފާސްކުރި "ވިނީ ޖޫނިއާ ލޯ" ގައި ނަސްލީ ތަފާތުކުރުމާ ގުޅޭ ޝަކުވާތައް ޕްރޮސެސް ކުރާނެ ގޮތާއި މަޖުބޫރު ތައުލީމީ ކެމްޕޭންތަކާ ބެހޭ ޕްރޮޓޮކޯލް ހިމަނާފައިވެއެވެ.
ރިއޯގެ ލެޖިސްލޭޓިވް އެސެމްބްލީ އާއި ސިޓީ ކައުންސިލްގެ އެވޯޑްތައް ވެސް ވިނީޝިއަސް އަށް ލިބިފައިވާއިރު، ޕެލޭ، ގަރިންޗާ އަދި ރޮނާލްޑޯ ފަދަ ބްރެޒިލްގެ ލެޖެންޑުންގެ އިތުރުން، ސްޓޭޑިއަމްގެ ވޯކް އޮފް ފޭމްގައި އޭނާގެ ފައިގެ ނިޝާން ވަނީ އިތުރުކޮށްފައެވެ.
