މިވަގުތު ކުރިމަވެފައި އޮތް ހަމައެކަނި ބަލިމަޑުކަމަކީ ނަސްލީ ތަފާތުކުރުން ކަމަށް މެންޗެސްޓަރ ސިޓީގެ ފޯވަރޑް ރަހީމް ސްޓާލިން ބުނެފި އެވެ.

ދާދި ފަހުން އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑް ހައްޔަރު ކުރަން އުޅުމުގެ ތެރޭގައި ދޮން ނަސްލުގެ ފުލުހަކު ވަނީ ފްލޮއިޑްގެ ކަރަށް ކަކުލުން އަރައި މަރާލާފަ އެވެ. އެއާއެކު ގިނަ ކުޅިވަރު ތަރިން އަންނަނީ ނަސްލީ ތަފާތުކުރުމާ ދެކޮޅަށް އަޑު އުފުލަމުންނެވެ.

އުމުރުން 25 އަހަރުގެ ސްޓާލިން އަކީ ނަސްލީ ތަފާތުކުރުންތަކާ ދެކޮޅަށް މީގެ ކުރިންވެސް އަޑުއުފުލާފައިވާ ކުޅުންތެރިއެކެވެ. އެގޮތުން މީގެ ކުރިން ސްޓާލިންއާ ވެސް ވަނީ ނަސްލީ ގޮތުން ގިނަ ފަހަރެއްގެ މަތިން ދިމާކޮށްފަ އެވެ.

ދާދި ފަހުން ބީބީސީއަށް ދިން އިންޓަވިއުއެއްގައި ސްޓާލިން ބުނީ ނަސްލީ ތަފާތުކުރުން ނައްތާލުމަކީ މި ވަގުތަށް ބަލާއިރު ވެސް ވަރަށް މުހިންމު ކަމެއް ކަމަށެވެ. އަދި މިއީ އެތަކެއް އަހަރުތަކެއް ވަންދެން ކުރަމުން އަންނަ ކަމެއް ކަމަށާއި، މިވަގުތު ކުރިމަތިވެފައި އޮތް ހަމައެކަނި ބަލިމަޑުކަމަކީ ނަސްލީ ތަފާތުކުރުން ކަމަށްވެސް ސްޓާލިން ބުންޏެވެ. އަދި ބުނީ މިހާރު މި އޮތް ކޮރޯނާވައިރަސް (ކޮވިޑް-19) އާއެކު ނަސްލީ ތަފާތު ކުރުންވެސް ނައްތާލަންޖެހޭ ކަމަށެވެ.

ސްޓާލިންގެ އިތުރުން ސިޓީގެ ފޯވަރޑް ގަބްރިއެލް ޖީސޫސްވެސް ވަނީ ނަސްލީ ތަފާތުކުރުމާ ދެކޮޅަށް ވާހަކަ ދައްކާފަ އެވެ. ޖީސޫސް ބުނީ ނަސްލީ ތަފާތު ކުރުމަކީ މިއަދަކު އިއްޔެއަކު ފެށިގެން އުޅޭ ކަމެއް ނޫން ކަމަށާއި، އެކަން ކުރާ މީހުންނާއި، އެކަމަށް ހިތްވަރުދޭ މީހުންގެ ސިކުނޑި މުޅިއަކުން ހަމައެއް ނޫން ކަމަށެވެ.

ނަސްލީ ތަފާތުކުރުމާ ދެކޮޅަށް އެކި ކުޅިވަރު ތަރިން އަޑު އުފުލަމުން އަންނައިރު، މީގެ ކުރިން ދުނިޔޭގެ ފުޓްބޯޅައާ ބެހޭ މައި އިދާރާ، ފީފާ އާއި އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ވެސް ވަނީ ނަސްލީ ތަފާތުކުރުން ހުއްޓުމަށް ޝުއޫރު ފާޅުކުރާ ކުޅިވަރު ކުޅުންތެރިންނަށް ތައުރީފު ކޮށްފަ އެވެ.

ޔޫރަޕްގެ ގިނަ ފުޓުބޯޅަ މުބާރާތްތަކުގެ މެޗުތަކުގައި ކުޅުންތެރިން ނަސްލީ ތަފާތުކުރުންތަކާ ދެކޮޅަށް އެކި ޝުއޫރުތައް ފާޅުކުރަމުން އަންނައިރު، ދާދި ފަހުން ޖަރުމަން ލީގުގައި ވެސް ބައެއް ކުޅުންތެރިން ވަނީ ނަސްލީ ތަފާތުކުރުމާ ދެކޮޅަށް އަޑުއުފުލުމުގެ އިތުރުން ފްލޮއިޑަށް އިންސާފު ހޯދައިދޭންވެސް ގޮވާލާފައެވެ.

ފުޓުބޯޅަ މެޗުގެ ތެރެއިން އެފަދަ ކަމަކާ ގުޅޭގޮތުން ޚިޔާލު ފާޅުކުރުމުގެ ޖާގައެއް ނޯންނާނެ ކަމަށް ބުނެ، ޖަރުމަން އެފްއޭއިން މީގެ ކުރިން ވަނީ މެޗުގެ ތެރެއިން ޝުއޫރުފާޅުކުރި ކުޅުންތެރިންގެ މައްސަލަތައް ބަލަމުން އަންނަ ކަމަށް ބުނެފަ އެވެ. އެއާއެކު ގިނަ ބައެއްގެ ފާޑު ކިޔުން އަމާޒުވުމުން، ޖަރުމަން އެފްއޭއިން ވަނީ ޝުއޫރު ފާޅުކުރި ކުޅުންތެރިންނަށް ފިޔަވަޅު ނާޅަން ނިންމާފަ އެވެ. މީގެ އިތުރުން ޕްރިމިއަރ ލީގުގެ ކްލަބުތަކުގެ ކުޅުންތެރިންވެސް އަންނަނީ ފްލޮއިންޑަށް އިންސާފު ހޯދައިދޭން ގޮވާލަމުންނެވެ. މީގެ ކުރިން އިނގިރޭސި އެފްއޭއިން ވަނީ ޕްރިމިއަރ ލީގުގައި ނަސްލީ ތަފާތުކުރުމާ ދެކޮޅަށް އަޑުއުފުލާ އެއްވެސް ކުޅުންތެރިއަކަށް ފިޔަވަޅު ނާޅާނެކަން ހާމަކޮށްފަ އެވެ.