ގައުމީ ބެޑްމިންޓަން ޓީމުގައި ތަފާތުކުރުން ގެންގުޅޭ: ކުރީގެ މެނޭޖަރ

ބެޑްމިންޓަން އެސޯސިއޭޝަންގެ ބައެއް ނިންމުންތައް ނިންމަވަމުން ގެންދަވަނީ ގައުމީ ޓީމުގެ ކުޅުންތެރިންގެ "ބެސްޓް އިންޓްރެސްޓް" ގައި ނޫންކަމާއި، އެކި އުސޫލުތައް އަދި ނިންމުންތައް ތަންފީޒުކުރުމުރުގައި ވެސް ވަކިވަކި ކުޅުންތެރިންނަށް ތަފާތުކުރުންތައް ގެންގުޅޭ ކަމަށް ގައުމީ ބެޑްމިންޓަން ޓީމުގެ ކުރީގެ މެނޭޖަރ ނީޒާ ޝަރީފް ބުނެފިއެވެ.

ނީޒާ ޝަރީފް ނެރުނު ބަޔާނެއްގައި ބުނީ، 2017 އިން ފެށިގެން ގައުމީ ބެޑްމިންޓަން އަންހެން ޓީމުގެ މެނޭޖަރުގެ މަގާމުގެ ބުރަ މަސްއޫލިއްޔަތު އަދާކުރަމުން ގެންގޮސްފައިވާނީ އިހްލާސްތެރިކަމާއި ތެދުވެރިކަމާ އެކު ގައުމަށް ރީތި ނަމެއް ހޯދައިދިނުމުގެ ފޮނި އުންމީދުގައި ކަމަށާއި، ބެޑްމިންޓަނަށް ހިތްޖެހި ގައުމަށް ހިދުމަތްކޮށްދީ ކުޅުންތެރިން ކުރިއަށް ގެންގޮސްދިނުމަށް ބެޑްމިންޓަން އެސޯސިއޭޝަންނަށް އެހީތެރިވެދީ ބެޑްމިންޓަން ކުރިއެރުވެމުގެ މަގްސަދުގައި ކަމަށެވެ.

އެގޮތުން ނީޒާ ބުނީ، ރާއްޖެ އާއި ރާއްޖެއިން ބޭރުގައި ވެސް އަންހެން ޓީމު ގޮވައިގެން މަގާމު އަދާކޮށްފައި ވާނީ، ކުޅުންތެރިންގެ މަސްލަހަތާއި ހައްގުތަކަށް އުނިކަމެއް ނާންނާނޭހެން ހަވާލުކޮށްފައިވާ ވާޖިބު އަދާކުރުމަށް ބޮޑު އިސްކަމެއް ދީގެންނެވެ.

ނަމަވެސް ނީޒާ ބުނީ، ބެޑްމިންޓަން އެސޯސިއޭޝަނުން ފަހަކަށް އައިސް ގައުމީ ބެޑްމިން ޓީމުގެ ކުޅުންތެރިން، ވަކިން ހާއްސަކޮށް ހަވާލުގައި ތިބި ބައެއް އަންހެން ކުޅުންތެރިން ބަދުނާމުކުރުމުގެ ނިޔަތުގައި އެކިކަހަލަ އިލްޒާމްތައް އަޅުވަން މަސައްކަތްކޮށް، ކުޅިވަރުގެ ރޫހާއި، ގުޅުމެއް ނެތް މަގްސަދުތަކެއް ހާސިލުކުރުމަށް ބެޑްމިންޓަން އެސޯސިއޭޝަން ހިންގުމުގެ ދާއިރާގައި މަސައްކަތްކުރާ ފަރާތްތަކުން ކުރަމުން ގެންދާކަން ފާހަގަކުރެވިފައިވާ ކަމަށެވެ.

އެގޮތުން އަންހެން ޓީމުގެ ކުޅުންތެރިންނާ ހަވާލުވެ، ރާއްޖެއިން ބޭރަށް ކޮށްފައިވާ ދަތުރެއްގައި ބައެއް ކުޅުންތެރިންގެ ނަން ކިލަނބުކޮށް ކުޅުންތެރިންގެ ހައްގަށް އުނިކަން އަންނަ ފަދަ ކަންކަން، ހިންގާފައިނުވާ ކަންތައްތަކެއް ހިނގާފައިވާ ކަމަށް ބުނެ ވާހަކަތަކެއް ފަތުރައި ވަރަށް ބޮޑެތި އިލްޒާމްތަކެއް އެކުދިންގެ ބޮލުގައި އަޅުވާފައިވާ ކަމަށް ވެސް ނީޒާ ވަނީ ބުނެފައެވެ.

"އަޅުގަނޑުގެ މަގާމުގެ މަސްއޫލިއްޔަތުގެ ދަށުން އެކުޅުންތެރިން ބެޑްމިންޓަން އެސޯސިއޭޝަންގެ ވެރިން ހީފުޅުކުރައްވާފަދަ ބޭއަދަބީ ނުވަތަ ކުޅިވަރުގެ ރޫހާއިހިލާފު އެއްވެސް އަމަލެއް ހިންގާފައިނުވާކަމަށް އެތައްފަހަރެއްގެމަތިން ބެޑްމިންޓަން އެސޯސިއޭޝަންގެ ވެރިންނަށް، ދަންނަވައި ސަމާލުކަމަށް ގެނެވިފައިވާނެ" ނީޒާ ބުނިއެވެ.

ނީޒާ ބުނީ، އެންމެ ފަހުން ގައުމީ ބެޑްމިންޓަން ޓީމު ރާއްޖެއިން ބޭރަށް ކުރި ދަތުރުގައި ވެސް ކުޅުންތެރިންގެ ނަން ކިލަނބުވާ ފަދަ ވާހަކަތަކެއް ދެކެވިފައިވާ ކަމަށާއި، އެ ދަތުރުތަކުގައި އަންހެން މެނޭޖަރެއް ޓީމުގައި ނުހިމަނައި، ފިރިހެނަކު ޓީމާ ހަވާލުވެގެންދިޔަ ދިއުމާއި، މުބާރާތް ނިމިގެން މާލެ އައުމަށް ފަހު ވަކި މުއްދަތެއްގެ ތެރޭގައި ދަތުރާ ބެހޭ ރިޕޯރޓް ހުށަހަޅަން ކުޅުންތެރިންނަށް އަންގައި ކުޅުންތެރިން ރިޕޯރޓް ހުށަހެޅުމުން ވެސް މިއަދާ ހަމައަށް ވެސް ރިވިއު މީޓިންގއެއް ނުބާއްވައި މިފަދަ ގޮތަކަށް އަމަލުކުރުމުން އެކަމަކީ ނުރަނގަޅު ނިޔަތެއްގައި ދުރާލާ ރޭވިގެން ކޮށްފައިވާ ކަމެއް ކަމުގައި ދެކޭ ކަމަށެވެ.

ރާއްޖޭގެ ބެޑްމިންޓަން މުސްތަގްބަލަށްޓަކައި މިހާރު ހިންގަމުންދާ ނޭދެވޭ ކަންކަން ހުއްޓާލައި، ހަމަހަމަކަމާ އެކު ގަވާއިދުތަކާއި، އުސޫލުތައް ތަންފީޒުކޮށްދިނުމަށް ބެޑްމިންޓަން އެސޯސިއޭޝަނުގެ ވެރިންނަށް ނީޒާ ވަނީ އިލްތިމާސްކޮށްފައެވެ.

ނީޒާ ވަނީ މިދިޔަ ހަފްތާގައި ގައުމީ ބެޑްމިންޓަން ޓީމުގެ މެނޭޖަރު ކަމުން އިސްތިއުފާދީފައެވެ.