މެސީ އާއި ރޯނާލްޑޯއަށް ވުރެ އަހަރެން މޮޅު: ރޮމާރިއޯ

ލިއޮނެލް މެސީ އާއި ކްރިސްޓިއާނޯ ރޮނާލްޑޯއަށް ވުރެ މޮޅު ކަމަށް ބްރެޒިލްގެ ކުރީގެ ފުޓްބޯޅަ ކުޅުންތެރިޔާ ރޮމާރިއޯ ޑަސޫޒާ ބުނެފިއެވެ.

ބްރެޒިލްގެ ސެނެޓުގައި ރިއޯޑެ ޖެނީރޯގެ ގޮނޑި މިހާރު ފުރަމުންދާ ރޮމާރިއޯ ސްޕެއިންގެ މަޝްހޫރު ފުޓްބޯޅަ ނޫހެއް ކަމަށްވާ "މާސާ" އަށް ދިން އިންޓަވިއުއެއްގައި ބުނެފައިވަނީ ރޮނާލްޑޯ އާއި މެސީ އަކީ މިވަގުތު ދުނިޔޭގައި ތިބި އެންމެ މޮޅެތި ކުޅުންތެރިން ކަމަށާއި އެކަމާ ދެބަސް ވެވެން ނެތް ކަމަށެވެ. އެ ދެ ކުޅުންތެރިންނާ އޭނާއާއި ވަރަށް ބޮޑެތި ތަފާތުތަކެއް އެބަހުރި ކަމަށާއި އެ ދެ މީހުންނަކީ ވެސް ތަފާތު މޮޅު ހުނަރުތަކެއް ލިބިފައިވާ ކުޅުންތެރިން ކަމަށް ރޮމާރިއޯ ބުނެފައިވެއެވެ.

އެހެނަސް ރޮމާރިއޯ ބުނެފައިވަނީ މެސީ އާއި ރޮނާލްޑޯ ކިތަންމެ ގިނަ ގޯލު ތަކެއް ޖެހި ކަމުގައި ވިޔަސް އޭނާ ޖަހާފައިވާ އަދަދާ އެއްވަރަކަށް ގޯލު ނުޖެހޭނެ ކަމަށާއި އޭނާ މި ޒަމާނުގައި ފުޓްބޯޅަ ކުޅޭނަމަ އެ ދެ ކުޅުންތެރިންނަށް ވުރެ ދެ ގުނަ އިތުރަށް ލަނޑު ޖަހާނެ ކަމަށެވެ.

ރޮމާރީއޯ މިހެން ބުނެފައިވާ އިރު އޭނާއަކީ ދުނިޔެ މިހާތަނަށް ދުށް އެންމެ މޮޅު އެއް ފޯވާޑުގެ ގޮތުގައި ގިނަ ބަޔަކު ދެކެއެވެ. އެގޮތުން ޑިއޭގޯ މަރަޑޯނާ ވެސް ބުނެފައި ވަނީ ރޮމާރީއޯއަކީ އޭނާ ދެކުނު ކުޅުންތެރިންގެ ތެރެއިން އެންމެ މޮޅު ކުޅުންތެރިޔާ ކަމަށެވެ. އަދި ދުނިޔޭގެ ފުޓްބޯޅައަށް އިންގިލާބެއް ގެނުވި ޔޯހާން ކްރަޔަފް ވެސް ބުނެފައި ވަނީ ރޮމާރިއޯއަކީ ޕެނަލްޓީ އޭރިއާގައި އެފަދަ ދެވަނައެއް ނުވާ ކުޅުންތެރިއެއް ކަމަށެވެ.

ބްރެޒިލްއިން 1994 ވަނަ އަހަރު ވޯލްޑްކަޕް ކާމިޔާބު ކުރިއިރު އެ މުބާރާތުގެ މޮޅު ކުޅުންތެރިޔާގެ މަގާމު ހޯދި ރޮމާރިއޯ ވަނީ ބްރެޒިލްގެ ގައުމީ ޓީމަށް 70 މެޗު ކުޅެދީ 55 ލަނޑު ޖަހައިދީފައެވެ. އަދި އޭނާގެ 24 އަހަރުގެ ކެރިއަރުގައި ރޮމާރިއޯ ވަނީ ރަހުމަތްތެރިކަމުގެ މެޗުތަށް ހިމެނޭގޮތަށް 1003 މެޗު ކުޅެދީ 768 ލަނޑު ޖަހާފައެވެ. ހަމައެހެންމެ އޭނާއަކީ ފީފާއިން 1994 ވަނަ އަހަރު ހޮވި ދުނިޔޭގެ އެންމެ މޮޅު ކުޅުންތެރިޔާއެވެ.