އަންނަ އޮގަސްޓު މަހު އާރްޓީއެލް ފެރީގެ ނިޒާމުން އައްޑޫ، ފުވައްމުލަކު އަދި ހުވަދޫ އަތޮޅު ގުޅުވާލުމަށް ދަނީ މަސައްކަތްކުރަމުން: އާޒިމް

އަންނަ އޮގަސްޓު މަހު އާރްޓީއެލް ފެރީގެ ނިޒާމުން އައްޑޫ، ފުވައްމުލަކު އަދި ހުވަދޫ އަތޮޅު ގުޅުވާލުމަށް މަސައްކަތް ކުރައްވަމުންގެންދަވާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް ވިދާޅުވީ މިހާރު އިންފްރާސްޓްރަކްޗަރުގެ މަސައްކަތް ނިމިފައިވާ ކަމަށާއި ކުރިއަށް އޮތީ ފެރީތައް ބަނުމުގެ މަސައްކަތް ކަމަށެވެ.

‏އާޒިމް ވިދާޅުވީ މި މަޝްރޫއުގެ ދެވަނަ ފިޔަވަހީގެ ދަށުން ނ، ރ، ބ، ޅ، ގއ، ގދ، ޏ އަދި ސ އަތޮޅު ހިދުމަތް ފެށުމަށް ހަމަޖެހިފައިވާއިރު މިމަހުގެ 13 ވަނަ ދުވަހު ޓެސްޓް ދަތުރުތައް ފަށާނީ ގއ. އަދި ގދ. ގައި ކަމަށެވެ. އަދި އޮގަސްޓް މަހު ދެވަނަ ފިޔަވަހީގެ ދަށުން ހުވަދޫ އަތޮޅާއި އައްޑޫ އަދި ފުވައްމުލަކު އާރްޓީއެލް ފެރީގެ ނިޒާމުން ގުޅުވާލެވޭނެ ކަމަށެވެ.

މީގެއިތުރުން އާންމު ރައްޔިތުންގެ އެއްބާރުލުން ބޭނުންވާނެކަން ފާހަގަކުރައްވާ އާޒިމް ވަނީ ފެރީތަކުގައި ދަތުރުކުރާއިރު ސާފުތާހިރު ކަމަށް ސަމާލުކަމަށް ދިނުމަށް އިލްތިމާސް ކުރައްވާފައެވެ.

‏އާޒިމް ވިދާޅުވީ ނިމިދިޔަ 2022 ވަނަ އަހަރު އެމްޓީސީސީގެ އެންމެ ބޮޑު އެއް ކާމިޔާބީއަކީ އާރްޓީއެލް ފެރީގެ ނިޒާމު ތައާރަފު ކުރެވިގެން ދިއުންކަމަށެވެ. އަދި ވިދާޅުވީ އަމާޒަކީ 2024 ވަނަ އަހަރު ނިމެންވާއިރު، މުޅި ރާއްޖެ އާރްޓީއެލްގެ ނިޒާމަކުން ގުޅާލުން ކަމަށެވެ. އެގޮތުން އާރްޓީއެލްގެ ސަބަބުން ޕަބްލިކް ޓްރާންސްޕޯޓް ނިޒާމު އިތުރަށް ހަރުދަނާވެފައިވާ ކަމަށާއި ކުރިއަށް އޮތް ތަނުގައި އިޤްތިސާދީ ގޮތުންނާއި އިޖުތިމާއީ ގޮތުން ޤައުމަށް އިތުރު ކުރިއެރުންތައް ލިބިގެންދާނެކަމަށް އުއްމީދު ކުރައްވާކަމަށް އާޒިމް ވިދާޅުވިއެވެ.