އިންތިިޚާބުވީ އެމްޑީޕީއިން، ރުޖޫއަ ވާނީ އެމްޑީޕީއަށް: މުސްތަފާ
13 ޖުލައި 2017 | ބުރާސްފަތި 18:26އިންތިޚާބުވީ އެމްޑީޕީގެ ޓިކެޓުގައި
ތިމަރަފުށީ ދާއިރާގެ މެންބަރު މުހައްމަދު މުސްތަފާ
އިންތިޚާބުވެވަޑައިގަތީ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ކަމަށާއި އެނބުރި ރުޖޫއަ ވެވަޑައިގަންނަވާނީ ވެސް އެމްޑީޕީއަށް ކަމަށް ތިމަރަފުށީ ދާއިރާގެ މެންބަރު މުހައްމަދު މުސްތަފާ ވިދާޅުވެއްޖެ އެވެ.
އެމްޑީޕީގެ ޓިކެޓުގައި މަޖިލިސް އިންތިޚާބް ކާމިޔާބު ކުރެއްވި މުސްތަފާ މިފަދައިން ވިދާޅުވެފައި މިވަނީ، އިންތިޚާބުވި ޕާޓީން ވަކިވުމުން މެންބަރުކަމުގެ ގޮނޑި ގެއްލޭ ގޮތަށް ސުޕްރީމް ކޯޓުން ހުކުމް ކޮށްފައިވަނިކޮށެވެ.
އެ ހުކުމް ކޮށްފައިވާ ގޮތުން މުސްތަފާގެ ގޮނޑިއެއް ނުގެއްލޭނެ އެވެ. ހުކުމުގައިވާ ގޮތުން އިންތިޚާބުވާ ޕާޓީއަކުން ވަކިވާ، ވަކިކުރާ އަދި ބަދަލުކުރާ މެންބަރުންގެ، މެންބަރުކަމުގެ ގޮނޑި ގެއްލޭނީ ބުރާސްފަތި ދުވަހުން ފެށިގެންނެވެ.
މުސްތަފާ ޕީޕީއެމްއާ ގުޅިވަޑައިގަތީ 2014 ވަނަ އަހަރުގެ މާޗް 31 ވަނަ ދުވަހު އެވެ. އެއަށްފަހު މިދިޔަ އަހަރުގެ ފަހުކޮޅު ޕީޕީއެމް ދެފަޅިވުމުން މުސްތަފާ އިޚްތިޔާރު ކުރެއްވީ ރައީސް މައުމޫން އަބްދުލްގައްޔޫމްގެ ފެކްޝަނެވެ.
މުސްތަފާ ވިދާޅުވެފައިވާ ގޮތުގައި ޕީޕީއެމްގައި މަސައްކަތް ކުރައްވަމުން ގެންދެވީ "ކޮންޓްރެކްޓް އުސޫލުން" ނެވެ.
