ޗެލްސީގެ އާ ކޯޗު މަައުރީސިއޯ ޕޮޗެޓީނޯ, ބާބަކިޔުއަކުން، ކްލަބާއެކު މަސައްކަތް ފަށައިފިއެވެ.
ޕޮޗެޓީނޯ ރަސްމީކޮށް ޗެލްސީއާއެކު މަސައްކަތް ފެށީ ހޯމަ ދުވަހުއެވެ. މަސައްކަތް ފެށުމުގެ ގޮތުން އޭނާ ވަނީ ޓެކްނިކަލް ސްޓާފުންނަށް ބާބަކިޔުއެއް ދީފައެވެ. އޭނާގެ ޓީމް ރަނގަޅަށް ދެނެގަނެ, ގުޅުން ބަދަހިކުރުމުގެ ގޮތުން އާޖެންޓީނާގެ ކޯޗު ދިނީ އާޖެންޓީނާ ސްޓައިލްގެ ބާބަކިޔުއެކެވެ. އެގޮތުން ތަފާތު ވައްތަރުގެ މަހާއި, ތަރުކާރީއާއި, އަލަނާސި މި ބާބަކިޔުގައި ހިމެނެއެވެ. އެކަންވީ ކޯޗިންގ ޓީމްގެ މެންބަރުންނަށް ލިބުނު ސަޕްރައިޒަކަށެވެ.
އެކުގައި މަސައްކަތްކުރަން އޮތް ޓީމަށް ޕޮޗެޓީނޯގެ ފެށުން ކަމުދިޔައެވެ. ޗެލްސީގެ މުވައްޒަފަކު ބުނީ ޕޮޗެޓީނޯ އަމިއްލައަށް ތައާރަފްވުމަށް އިޚްތިޔާރުކުރީ ރަނގަޅު ގޮތެއް ކަމަށެވެ. އިހުސާސްކުރެވެނީ އާއިލީ ގުޅުންކަމަށް އޭނާ ބުންޏެވެ.
ޕޮޗެޓީނޯ ޗެލްސީގެ ކޯޗުކަމާ ހަވާލުވިއިރު ޓީމްގެ މުހިއްމު ބައެއް ކުޅުންތެރިން ވަނީ ޓީމް ދޫކޮށްލާފައެވެ. އެކަމަކު ބަދަލުގައި އާ ކުޅުންތެރިން ހޯދުމުގެ މަސައްކަތް ޗެލްސީން ދަނީ ކުރަމުންނެވެ.
