ރަސްމީ ފުޓްބޯޅަ ސްޓޭޑިއަމްގެ މަސައްކަތް މިދައުރުގައި ފެށޭނެކަމުގެ ޔަގީންކަން ދީފި

ގަލޮޅު ރަސްމީ ފުޓްބޯޅަ ސްޓޭޑިއަމް ތަޅާލައި, އާ ސްޓޭޑިއަމެއް އެޅުމުގެ އަމަލީ މަސައްކަތް މިދައުރުގެ ތެރޭގައި ފަށާނެ ކަމުގެ ޔަގީންކަން، ޔޫތު މިނިސްޓަރ އަހުމަދު މަޚުލޫފް ދެއްވައިފިއެވެ.

މަސައްކަތް ފަށަން މީގެކުރިން ކަނޑައެޅި ތާރީޚުތައް ފަހަނައެޅިނަމަވެސް މިނިސްޓަރު އެދިވަޑައިގަތީ އެމަސައްކަތް މިދައުރުގެ ތެރޭގައި ފެށޭނެކަމާމެދު ޝައްކު ނުކުރެއްވުމަށެވެ. ގަލޮޅު ދަނޑުގެ އިތުރުން، ސިންތެޓިކް ޓްރެކާއި ތިން ކޯޓުގެ ވޮލީބޯލް އިންޑޯއާއި, 3 ކޯޓްގެ ގައުމީ ބާސްކެޓްބޯޅަ އެރީނާއާއި, ނެޝަނަލް ޓޭބަލް ޓެނިސް ސެންޓަރުގެ މަސައްކަތްވެސް މިދައުރުގެ ތެރޭގައި ފައްޓަވާނެކަމުގެ ޔަގީންކަން މިނިސްޓަރު ދެއްވިއެވެ. މިއީ އިންޑިޔާގެ އެލްއޯސީގެ ދަށުން ކުރިއަށް ގެންދާ މަޝްރޫއުތަކެވެ.

މިނިސްޓަރު ވިދާޅުވީ ގަލޮޅު ދަނޑު ތަޅާލާނީ ހުޅުމާލޭގައި ކުޅެވޭނެގޮތް ހެދުމަށްފަހު ކަމަށެވެ. ސިންތެޓިކް ހަތަރު ޓްރެކް އަޅަނީ ތިނަދުއާއި, ފުވައްމުލަކާއި, ހިތަދުއާއި, ކުޅުދުއްފުށީގައެވެ. މިނިސްޓަރު ވިދާޅުވީ ކުޅިވަރު ވަސީލަތްތައް ގާއިމްކުރުމުގައި މިސަރުކާރު މިއޮތީ މުޅިން އެހެން ލެވެލެއްގައި ކަމަށެވެ.