މޯދީގެ ދަތުރުގައި ދިވެހި ސަރުކާރުން އިންޑިއާ އާއި މޯދީ ކިބައިން މައާފަށް އެދެން ޖެހޭނެ: މަޚްލޫފް
24 ޖުލައި 2025 | ބުރާސްފަތި 04:47އިންޑިއާ އާއި ރާއްޖެއާ ދެމެދު އަބަދު ވެސް ގާތް ގުޅުމެއް އޮންނާނެކަން ފާހަގަކޮށް މަޚްލޫފް ވިދާޅުވީ، މިފަހަރު މޯދީ ކުރައްވާ ދަތުރުފުޅުން ސާފު އަދި ވަރުގަދަ މެސެޖެއް ލިބިގެންދާ ކަމަށް.
ކުރީގެ ކުޅިވަރު ވަޒީރު އަޙުމަދު މަޚްލޫފް
އިންޑިއާގެ ބޮޑު ވަޒީރު ނަރެންދްރަ މޯދީ ރާއްޖެ އަށް ކުރައްވާ ދަތުރުފުޅުގައި، ދިވެހި ސަރުކާރުން އިންޑިއާ އާއި މޯދީގެ ކިބައިން މައާފަށް އެދެން ޖެހޭނެ ކަމަށް، ކުރީގެ މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.
ހުކުރު ދުވަހު މޯދީ ރާއްޖެ ވަޑައިގަންނަވަނީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ދައުވަތަކަށެވެ. އެއީ ރާއްޖޭގެ މިނިވަން ދުވަހާ ދިމާކޮށް، މިނިވަން ދުވަހުގެ ޚާއްސަ މެހުމާނެއްގެ ގޮތުގަ އެވެ.
އެކަމާ ގުޅިގެން މަޚްލޫފް އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ، ސަރުކާރުގައި ތިއްބެވި ބޭފުޅުން އިދިކޮޅުގައި ތިބިއިރު، ބޮޑު ވަޒީރު މޯދީ އާއި އިންޑިއާގެ ރައްޔިތުންނަށް ފުރައްސާރަކޮށް، ނަފުރަތު އުފައްދައި، ހަޑި ހުތުރު ބަސްތައް ބޭނުން ކޮށްފައިވާ ކަމަށެވެ.
މީގެ އިތުރުން މަޚްލޫފް ވިދާޅުވީ އޭރު ކުރިއަށް ގެންދިޔަ އިންޑިއާ އައުޓް ކެމްޕެއިން އަކީ، 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކުރުމަށް ހިންގި އެންމެ ބޮޑު ސްކޭމް ކަމަށެވެ. އަދި އެއީ އެތައް ދޮގެއްގެ މައްޗަށް އެކުލެވިގެންވާ ކަމެއް ކަމަށް ވެސް މަޚްލޫފް ވިދާޅުވެފައިވެ އެވެ.
ހަމަ އެހެންމެ، ރައީސް މުޢިއްޒު ވެރިކަމަށް ވަޑައިގެންނެވުމަށް ފަހު ވެސް އިންޑިއާ ލޭބަލް ކޮށްފައި ވަނީ ރާއްޖެ އަށް އެންމެ ބޮޑަށް ބުލީ ކުރާ ޤައުމުގެ ގޮތުގައި ކަމަށާއި، ސަރުކާރަށް ހަގީގަތް އެނގެންދެން އެކަން ކުރިއަށް ގެންދިޔަ ކަމަށެވެ.
އިންޑިއާ އާއި ރާއްޖެއާ ދެމެދު އަބަދު ވެސް ގާތް ގުޅުމެއް އޮންނާނެކަން ފާހަގަކޮށް މަޚްލޫފް ވިދާޅުވީ، މިފަހަރު މޯދީ ކުރައްވާ ދަތުރުފުޅުން ސާފު އަދި ވަރުގަދަ މެސެޖެއް ލިބިގެންދާ ކަމަށެވެ.
މަޚްލޫފްގެ އެ ޕޯސްޓުގައި ހިމަނާފައި ވަނީ، އިދިކޮޅުގައި ތިބެގެން އޭރު ކުރިއަށް ގެންދިޔަ އިންޑިއާ އައުޓް ކެމްޕެއިންގެ ރެލީއެއްގައި، އިންޑިއާގެ ބޮޑު ވަޒީރު މޯދީގެ ކާޓޫނު ބޭނުން ކޮށްގެން، މަލާމާތްކޮށް އަދި ފުރައްސާރަ ކުރަމުން އަންނަ މަންޒަރު ފެންނަ ވީޑިއޯ އެކެވެ.
ރައީސް މުޢިއްޒު އާއި މި ސަރުކާރުގެ ގިނަ ވަޒީރުން އަދި އިސް ބޭފުޅުން ހިމެނޭހެން އޭރު އިންޑިއާ އައުޓް ކެމްޕެއިން ކުރިއަށް ގެންގޮސް، މޯދީ އާއި އިންޑިއާ އަށް ވަރަށް ބޮޑަށް ފުރައްސާރަ ކުރުމަށް ފަހު، ރާއްޖޭގެ މިނިވަން ދުވަހުގެ ޚާއްސަ މެހެމާނެއްގެ ގޮތުގައި މޯދީ ގެންނާތީ ގިނަ ބަޔަކު އަންނަނީ ސަރުކާާރަށް ފާޑު ކިޔަމުންނެވެ.
އެގޮތުން އޭރު ކުރިއަށް ގެންދިޔަ އިންޑިއާ އައުޓް ކެމްޕެއިން އާއި، އިންޑިއާއާ ގުޅުވައިގެން ދައްކަމުން ގެންދިޔަ ވާހަކަތަކަކަކީ ދޮގު ވާހަކަތަކެއްކަން މިއަދު ސާފުވަމުން އަންނަ ކަމަށާއި، ރައްޔިތުންނަށް ބޮޑު އޮޅުވާލުމެއް އޮޅުވާލާފައިވާ ކަމަށް ގިނަ ބަޔަކު އަންނަނީ ބުނަމުންނެވެ.
މީގެ އިތުރުން އިންޑިއާ އިން ރާއްޖޭގެ މިނިވަންކަމާއި ސިޔާދަތު ނަގާލުމަށް މަސައްކަތް ކުރަމުން އައި ކަމަށް ވިދާޅުވުމަށް ފަހު، ރާއްޖޭގެ މިނިވަން ދުވަހާ ދިމާކޮށް މާލޭގެ މަގު ތަކުގައި އިންޑިއާގެ ދިދަ ހަރުކުރަމުން އަންނާތީ ވެސް، ގިނަ ބަޔަކު އަންނަނީ ރައީސް މުޢިއްޒު އާއި ސަރުކާރަށް ވަރަށް ބޮޑަށް ފާޑު ކިޔަމުންނެވެ.
