މިއަހަރު އޮސްޓްރޭލިއާ އާއި ނިއުޒިލެންޑުގައި ބާއްވާ އަންހެނުންގެ ވޯލްޑް ކަޕަކީ ބްރެޒިލްގެ ލެޖެންޑު މާޓާގެ އެންމެ ފަހު ވޯލްޑް ކަޕު ކަމަށް އޭނާ ބުނެފިއެވެ.

2003 ވަނަ އަހަރު ވޯލްޑް ކަޕަށް ނުކުތް އުމުރުން 37 އަހަރުގެ މާޓާ އަކީ 117 ގޯލާއެކު ބްރެޒިލްގެ އެންމެ ގިނަ ލަނޑު ޖެހި ކުޅުންތެރިޔާއެވެ. ތިން ފަހަރެއްގެ މަތިން ކޮޕާ އެމެރިކާ ކާމިޔާބުކުރި ނަމަވެސް ވޯލްޑް ކަޕް އަދި އުފުލާލެވިފައެއް ނުވެއެވެ. މި މުބާރާތުގައި ބްރެޒިލުން ހޯދި އެންމެ ރަނގަޅު ނަތީޖާއަކީ 2007 ވަނަ އަހަރު ރަނަރަޕް ކަމެވެ.

ބްރެސިލްގައި ހޯމަ ދުވަހު ނޫސްވެރިންނާ ވާހަކަ ދައްކަމުން މާޓާ ބުނީ މިއީ އޭނާގެ އެންމެ ފަހު ވޯލްޑް ކަޕް ކަމަށެވެ. އަދި އެހެން ކަންކަމަށް އިސްކަންދޭންވީ ވަގުތެއް އަންނަކަން ވިސްނަން ޖެހޭކަމަށެވެ. ބްރެޒިލްގެ ކޯޗު ޕިއާ ސުންދަގޭ ބުނީ ފީފާގެ ދުނިޔޭގެ މޮޅު ކުޅުންތެރިޔާގެ އެވޯޑް ހަ ފަހަރު ހޯދާފައިވާ މާޓާގެ ކަކުލަށް ލިބުނު އަނިޔާއިން ރަނގަޅުވަމުން އަންނާތީ ބެންޗުގައި މުބާރާތް ފަށަންޖެހިދާނެ ކަމަށެވެ.

އެންޑަބްލިއުއެސްއެލްގެ އޯލަންޑޯ ޕްރައިޑަށް ކުޅެމުން އަންނަ މާޓާ ވަނީ މިދިޔަ އަހަރު ލިގަމެންޓަށް ލިބުނު އަނިޔާގެ ސަބަބުން ސާޖަރީއެއް ހަދައި، 11 މަސް ދުވަސް ވަންދެން ގައުމީ ޓީމާ ދުރުގައި ހުރުމަށްފަހު ގައުމީ ޓީމަށް އެނބުރި އައިސްފަ އެވެ.

މިދިޔަ އޭޕްރީލް މަހު އިންގްލެންޑާއި ޖަރުމަނާ ދެކޮޅަށް ކުޅުނު އެކުވެރިކަމުގެ މެޗުތަކުގައި ނުކުޅެވުނު ނަމަވެސް އާދީއްތަ ދުވަހު ޗިލީ އަތުން 4-0 އިން މޮޅުވި މެޗުގައި ބަދަލު ކުޅުންތެރިއެއްގެ ގޮތުގައި މާޓާ ވަނީ ކުޅެން ނިކުމެފައެވެ.

ވޯލްޑް ކަޕުގައި މި މަހުގެ 24 ވަނަ ދުވަހު ޕެނަމާއާ ދެކޮޅަށް ބްރެޒިލް ފަށާއިރު، ގުރޫޕުގައި އިތުރަށް ހިމެނެނީ ފްރާންސާއި ޖެމެއިކާއެވެ.