އާބަންކޯ މިސްޓަރ މޯލްޑިވްސް 2023: ޗެމްޕިއަން ޓީމަކަށް އެމްއެންޑީއެފް، ސިފައިންގެ އެތުލީޓުންނަށް ފުރިހަމަ ކާމިޔާބެއް

އާބަންކޯ މިސްޓަރ މޯލްޑިވްސް 2023ގެ ޓީމް އިވެންޓްގެ ޗެމްޕިއަންކަން އެމްއެންޑީއެފުން ހޯދައި، ސިފައިންގެ އެތުލީޓުން ރަން ވަނަތަކެއް ހާސިލުކޮށްފިއެވެ.

މިއީ، އެމްއެންޑީއެފުން މި މުބާރާތުގެ ޓީމު އިވެންޓްގެ ޗެމްޕިއަންކަން ވިދިވިދިގެން ހޯދި ތިންވަނަ ފަހަރެވެ. މިއަހަރުގެ އިތުރުން އެމްއެންޑީއެފުން ވަނީ 2021 އަދި 2022 ވަނަ އަހަރުގެ ޗެމްޕިއަންކަން ހޯދާފައެވެ.

އިޖުތިމާއީ މަރުކަޒުގައި ޖުލައި 3 ވަނަ ދުވަހުގެ ރޭ ބޭއްވި މިސްޓަރ މޯލްޑިވްސް މުބާރާތުގެ "މެންސް އެތުލެޓިކް ފިޒީކް (އަޕް ޓު 170 ސެންޓިމީޓަރ)" ކެޓަގަރީން، ސާޖަންޓް ފަތުހުﷲ މުހައްމަދު ރަން މެޑަލް ހާސިލުކުރިއިރު، "މެންސް އެތުލެޓިކް ފިޒީކް (އަޕް ޓު 175 ސެންޓިމީޓަރ)" ކެޓަގަރީގައި ވާދަކުރި ޕްރައިވެޓް އަބްދުﷲ އަހްސަން ވެސް ވަނީ އެ ކެޓަގަރީން ރަން މެޑަލް ހާސިލުކޮށްފައެވެ. އޭގެ އިތުރުން، މެންސް ސްޕޯޓްސް ފިޒީކް (އަޕް ޓު 180 ސެންޓިމީޓަރ) ކެޓަގަރީން ރަން މެޑަލް ހާސިލުކޮށްފައި ވަނީ ވެސް ސިފައިންގެ އެތުލީޓެއް ކަމުގައިވާ ސާޖަންޓް އަހުމަދު ނައީމެވެ.

މުބާރާތުގައި ސިފައިންގެ އެތުލީޓުން ހޯދި އިތުރު ކާމިޔާބީތަކުގެ ތެރޭގައި، "އެތުލެޓިކް ފިޒީކް" އޯވަރޯލް ޗެމްޕިއަންކަން ވިދިވިދިގެން ދެވަނަ ފަހަރަށް ހޯދައި، ޕްރައިވެޓް އަބްދުﷲ އަހްސަން ރަން މެޑަލް ހާސިލުކުރިއެވެ. އަދި، "މެންސް ސްޕޯޓްސް ފިޒީކް" ކެޓަގަރީން އޯވަރޯލް ތިންވަނަ މަގާމު ހޯދައި، ސާޖަންޓް އަހުމަދު ނައީމް ވަނީ ލޯ މެޑަލް ހާސިލުކޮށްފައެވެ.

ސިފައިންގެ އެތުލީޓުން ވަނީ މުޅި މުބާރާތުގައި ހަތަރު ރަން މެޑަލާއި، ދެ ރިހި މެޑަލް، އަދި ފަސް ލޯ މެޑަލް ހާސިލުކޮށްފައެވެ. މިގޮތުން ވަކިވަކި ކެޓަގަރީތަކަށް ބަލާއިރު، މުބާރާތުގެ "މެންސް އެތުލެޓިކް ފިޒީކް (އަޕް ޓު 175 ސެންޓިމީޓަރ)" ކެޓަގަރީގައި ވާދަކުރި ސިފައިންގެ އެތުލީޓުންގެ ތެރެއިން، ސާޖަންޓް އިބްރާހީމް ނަބީލް، ރިހި މެޑަލް ހާސިލުކުރިއިރު، އެ ކެޓަގަރީން ލޯ މެޑަލް ހާސިލުކުރީ ސާޖަންޓް މަނާފް ވަހީދެވެ. އަދި މުބާރާތުގެ "މެންސް އެތުލެޓިކް ފިޒީކް (އަޕް ޓު 170 ސެންޓިމީޓަރ)" ކެޓަގަރީގައި ވާދަކުރި ސިފައިންގެ ސާޖަންޓް އަބްދުﷲ މުހައްމަދު ވަނީ އެ ކެޓަގަރީން ލޯ މެޑަލް ހާސިލުކޮށްފައެވެ.

"މެންސް ސްޕޯޓްސް ފިޒީކް (އަޕް ޓު 180 ސެންޓިމީޓަރ)" ކެޓަގަރީން ސިފައިންގެ ކޯޕްރަލް އަލީ ސަލާމް، ރިހި މެޑަލް ހާސިލުކުރިއިރު، "މެންސް ސްޕޯޓްސް ފިޒީކް (އަޕް ޓު 175 ސެންޓިމީޓަރ)" ކެޓަގަރީގައި ވާދަކުރި ސިފައިންގެ އެތުލީޓުުންގެ ތެރެއިން، ސާޖަންޓް ހުސައިން ޝާޒް ވަނީ ލޯ މެޑަލް ހާސިލުކޮށްފައެވެ. "މެންސް ސްޕޯޓްސް ފިޒީކް (އަޕް ޓު 170 ސެންޓިމީޓަރ)" ކެޓަގަރީން، ސިފައިންގެ ޕްރައިވެޓް ވިރާމް އިސްމާއީލް ލޯ މެޑަލް ހާސިލުކުރިއިރު، އެ ކެޓަގަރީގައި ވާދަކުރި ޕްރައިވެޓް އަބްދުﷲ ސައީދު ވަނީ ހަތަރުވަނަ ހޯދާފައެވެ.

އޭގެ އިތުރުން، "މެންސް ބޮޑީބިލްޑިންގ އޯޕަން" ކެޓަގަރީގައި ވާދަކުރި ސިފައިންގެ ސާޖަންޓް އިބްރާހީމް އައްސަދު ވަނީ އެ ކެޓަގަރީން ލޯ މެޑަލް ހާސިލުކޮށްފައެވެ.

މި މުބާރާތުގައި ދިވެހި ސިފައިންގެ ކުލަބުގެ 11 އެތުލީޓުން ވާދަކޮށްފައި ވެއެވެ. މި އަހަރުގެ މިސްޓަރ މޯލްޑިވްސް މުބާރާތުގައި ވާދަކުރި ދިވެހި ސިފައިންގެ ކުލަބުގެ ޓީމުގެ ކޯޗަކީ، ސްޓާފް ސާޖަންޓް މުހައްމަދު އިބްރާހީމެވެ. އަދި އެ ޓީމުގެ މެނޭޖަރަކީ ސްޓާފް ސާޖަންޓް މަހުމޫދު ޒިޔާދުއެވެ.