މިހާތަނަށް މިހާ ހުދުމުހުތާރުކޮށް ރައްޔިތުންގެ މަޖިލީހުގެ ޖަލްސާތައް ކުރިއަށް ގެންގޮސްފައިނުވާ ކަމަށް އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ހޯމަ ދުވަހު ރައްޔިތުން މަޖިލީހުގައި އެމްޑީޕީގެ ޕާލަމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި މެންބަރު މުޙައްމަދު ރަޝީދު ހުސެއިން ވިދާޅުވީ ގިނަ ދައުރުތައް ފެނިފައިވާ ކަމަށާއި، މިހާތަނަށް މިހާ ހުދުމުހުތާރުކޮށް މަޖިލިސް ޖަލްސާތައް ކުރިއަށް ގެންދިޔަތަނެއް ނުފެންނަ ކަމަށެވެ.

އޭނާ ވިދާޅުވީ މަޖިލީހުގެ ގަވާއިދަށް އެއްވެސް ވަރަކަށް ހުރުމަތްތެރިކޮށް ހިތުމެއްނެތި މަޖިލީހުގެ ރިޔާސަތުން ދައުލަތުގެ ތިން ބާރުގެތެރެއިން އެއްބާރު އެބިއުސްކުރަމުން ގެންދާ ކަމަށެވެ. މިއީ ދިވެހި ރައްޔިތުން މަޖިލީހުގެ މެންބަރުންނާއި ހަވާލުކުރި ޒިންމާއެއް ނޫން ކަމަށާއި، މަސައްކަތްތައް ކުރިއަށް ގެންދިއުމަށް ޖަގާ ދޭންޖެހޭ ކަމަށެވެ. މިހާރު މަޖިލީހުގައި ހުރި މަސައްކަތްތަކަކީ ވެސް ރައްޔިތުންނާއި ވަރަށް ބޮޑަށް ގުޅިފައިވާ މަސައްކަތްތަކެއްކަން މެންބަރު މުޙައްމަދު ރަޝީދު ހުސެއިން ފާހަގަކުރެއްވިއެވެ.

މެންބަރު ވިދާޅުވީ މަޖިލިސް ކުރިއަށް ގެންދިއުމަށް ޖާގަ ނުދެނީ އިދިކޮޅު ވާދަވެރިން ކަމަށެވެ. ނަމަވެސް އެބޭފުޅުން އެމަންޒަރު އޮޅުވާލުމަށް މަސައްކަތް ކުރާ ކަމަށާއި، މަޖިލިސް ޑެޑްލޮކަށް ގޮސްފައިވާ ކަމަށް ވާހަކަތައް ދައްކަވަމުން ގެންދަވާ ކަމަށް މެންބަރު ވިދާޅުވިއެވެ. އަދި ވިދާޅުވީ ޖެއްސުން ކުރެއްވި ނަމަވެސް މަސައްކަތްތައް ކުރިއަށް ގެންދާނެ ކަމަށާއި، މަސައްކަތްތައް ފުޑާލުމުގެ ޖާގަ ނުދޭނެ ކަމަށެވެ.

މެންބަރު މުޙައްމަދު ރަޝީދު ހުސެއިން ވިދާޅުވީ މަސައްކަތްތައް ކުރިއަށް ގެންދިއުމުގައި އޮތް ހުރިހާ މަގެއް ބަލާނެ ކަމަށެވެ. އަދި ވިދާޅުވީ ކުއްލިކުއްލިއަށް ޖަލްސާތަކަށް ގޮވާލި ނަމަވެސް މަޖިލީހުގެ އިދާރާއަށް ހާޒިރުވާނެ ކަމަށެވެ.