ރައީސް ވިދާޅުވިގޮތަށް، ޝަރުތު ހަމަވާ ކޮންމެ މީހަކަށް ގޯތި ކަނޑައި، ލިސްޓު ހުސްކުރާނެ: މިނިސްޓަރު އަސްލަމް
މިސަރުކާރުން މާލޭގެ ބޯހިޔާވަހިކަމުގެ މައްސަލައަށް ބޮޑު ހައްލެއް ގެނެސްދޭނެ
ގުޅީފަޅު ބިން ހިއްކުން އިފްތިތާހުކުރުމުގެ ރަަސްމިއްޔާތުގެ ތެރެއިން
ރައީސް އިބްރާހިމް މުހައްމަދު ސާލިހު ވިދާޅުވި ގޮތަށް ޝަރުތު ހަމަވާ ކޮންމެ މީހަކަށް ގޯތި ކަނޑައި، ލިސްޓު ހުސްކުރާނެ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
އާދިއްތަ ދުވަހުގެ ހަވީރު ގުޅިފަޅު ބިންހިއްކުމުގެ މަޝްރޫއު ފެށުމަށް ބޭއްވި ޚާއްސަ ރަސްމިއްޔާތުގައި މިނިސްޓަރު އަސްލަމް ވިދާޅުވީ، މާލެއަށް ދިމާވެފައިވާ ތޮއްޖެހުމުގެ މައްސަލައާއި ބޯހިޔާވަހިކަމުގެ މައްސަލައަށް ހައްލު ހޯދުމަށް 1997 ވަނަ އަހަރުން ފެށިގެން މަސައްކަތް ކުރާކަމަށެވެ. ނަމަވެސް މިއަދާ ހަމައަށް އައިއިރު ހައްލެއް ނުލިބުމަކީ ސުވާލު އުފެދޭ ކަމެއް ކަމަށް މިނިސްޓަރު އަސްލަމް ވިދާޅުވިއެވެ.
މިނިސްޓަރު އަސްލަމް ވިދާޅުވީ އެހެން ސަރުކާރުތަކުގައި މި ބޮޑު މައްސަލައަށް ހައްލު ގެނައުމަށް މަސައްކަތްކުރީ އެކަށީގެންވާ ސްޕީޑެއްގައި ނޫން ކަމަށާއި، ގޯއްޗާއި ފްލެޓްތައް ދީފައިވަނީ މަދު ބަޔަކަށް ކަމަށެވެ. ބޮޑު މައްސަލައަކަށް ބޮޑު ހައްލެއް ގެނެސްދީފައި ނުވާކަމަށް މިނިސްޓަރު އަސްލަމް ވިދާޅުވިއެވެ.
މިނިސްޓަރު އަސްލަމް ވިދާޅުވީ މިސަރުކާރުން މާލޭގެ ބޯހިޔާވަހިކަމުގެ މައްސަލައަށް ބޮޑު ހައްލެއް ގެނެސްދޭނެ ކަމަށާއި، ތަރައްގީގެ ބޮޑު ޕްލޭނެއް އެބަ އޮތް ކަމަށެވެ. ރައީސް ސާލިހު ނިންމަވާފައިވާ ގޮތަށް މަސައްކަތްތައް ކުރިއަށް ގޮސް އޮގަސްޓު މަހުގެ ތެރޭގައި ބިންވެރިޔާ ސްކީމްގައި ގޯތި ލިބޭނެ ކަމަށް ކަނޑައެޅިފައިވާ މީހުންނަށް ގޯތި ދޫކުރާނެ ކަމަށް މިނިސްޓަރު އަސްލަމް ވިދާޅުވިއެވެ.
ގުޅީފަޅުގެ ބިން ހިއްކުމުގެ މަޝްރޫއަށް އިޝާރާތް ކުރައްވައި މިނިސްޓަރު އަސްލަމް ވިދާޅުވީ، ބިން ހިއްކުމުގެ މަސައްކަތް ފުރަތަމަ ފެށީ 2019ގައި ކަމަށާއި، ކޮވިޑް-19އާ ގުޅިގެން ދެ އަހަރު މަސައްކަތްތައް މަޑު ޖެހުނު ކަމަށެވެ. އެއީ ބަދުނަސީބު ދެއަހަރުގެ ގޮތުގައި މިނިސްޓަރު އަސްލަމް ސިފަކުރެއްވިއެވެ. ނަމަވެސް ވިދާޅުވީ މިހާރު ހާލަތު ބަދަލުވެ، މަސައްކަތްތައް ފެށިފައިވާކަމަށެވެ.
ފާޑުކިޔުންތަކަށް ރިއެކްޓްނުކުރާނެކަން ފާހަގަކުރައްވައި މިނިސްޓަރު އަސްލަމް ވިދާޅުވީ، މަސައްކަތްތައް ކުރުމަށް މާގިނަ ވާހަކަތަކެއް ނުދައްކާނެ ކަމަށާއި، ފައިސާ ހަމަޖެހި ވަގުތު ޖެހުމުން މަސައްކަތްތައް ކުރިއަށްދާތަން ރައްޔިތުންނަށް ފެންނާނެ ކަމަށެވެ.
