އެމްއެމްސީން ދޭ ނޫސްވެރިކަމުގެ އިނާމަށް ނަން ހުށަހެޅުމުގެ މުއްދަތު އިތުރުކޮށްފި
2 ޖުލައި 2023 | އާދީއްތަ 06:50އިއުލާނުގެ މުއްދަތު 23 ޖުލައި 2023 ވާ އާދިއްތަ ދުވަހުގެ 13:00 އަށް އިތުރު ކުރެވިފައިވޭ
ނޫސްވެރިކަމުގެ އިނާމު 2020 ގެ ތެރެއިން
މޯލްޑިވްސް މީޑިއާ ކައުންސިލް (އެމްއެމްސީ)ން ދޭ ނޫސްވެރިކަމުގެ އިނާމަށް ނަން ހުށަހެޅުމުގެ މުއްދަތު އިތުރުކޮށްފިއެވެ.
އެމްއެމްސީން ނޫސްވެރިކަމުގެ އިނާމަށް ނަން ހުށައެޅުމަށް ހުޅުވާލީ 08 ޖޫން 2023 ގައެވެ. އެ އިއުލާނުގެ މުއްދަތު 23 ޖުލައި 2023 ވާ އާދިއްތަ ދުވަހުގެ 13:00 އަށް އިތުރު ކުރެވިފައިވާކަމަށް މީޑިއާ ކައުންސިލުން މައުލޫމާތު ދެއެވެ.
އިނާމު ދިނުމަށް ކަނޑައަޅާފައިވަނީ ދެ ކެޓަގަރީއަކުންނެވެ. އެއީ ނޫސްމަޖައްލާ ކެޓަގަރީއާއި ބްރޯޑްކާސްޓިންގ ކެޓަގަރީއެވެ.
އެމްއެމްސީން ވަނީ މައިގަނޑު 12 ދާއިރާއަކުން އެވޯޑު ދިނުމަށް ނިންމާފައެވެ.
މި އިނާމުތަކަށް ކުރިމަތިލާނީ ނޫސްވެރިކަމުގެ އިނާމަށް ނަން ހުށަހަޅާ ފޯމު، އުންމީދީ ނޫސްވެރިޔާގެ އިނާމަށް ނަން ހުށަހަޅާ ފޯމު އަދި އަހަރުގެ އެންމެ މޮޅު ނޫސްވެރިޔާގެ އިނާމަށް ނަން ހުށަހަޅާ ފޯމުންނެވެ.
މި ތިން ފޯމާއި، މާކުސް ދިނުމުގައި ބަލާނެ މިންގަނޑުތައް "މޯލްޑިވްސް މީޑިއާ ކައުންސިލުން ދޭ ނޫސްވެރިކަމުގެ އިނާމު ދިނުމުގެ އުސޫލު" ގައި ބަޔާންކޮށްފައިވެއެވެ.
އިނާމުތަކަށް ކުރިމަތިލާ ފަރާތްތަކުން ޖުލައި 23 ވާ އާދިއްތަ ދުވަހު ގެ މެންދުރުފަހު 1 ގެ ކުރިން އިނާމަށް އެދި ހުށަހަޅާ ފޯމު، ކައުންސިލަށް ހާޒިރުވެގެން ނުވަތަ އީމެއިލުން މެދުވެރިކޮށް ހުށަހެޅުމަށް އެމްއެމްސީން ވަނީ އެދިފައެވެ.
