މިއަދަކީ ޖުޑީޝަރީ އާއި ޑިމޮކްރެސީ ފުނޑިގެން ދިޔަ ކަޅު އަނދިރި ދުވަހެއް: ޑރ. ޖަމީލް
މިއަދަކީ ޑިމޮކްރެސީ އާއި ޖުޑިޝިއަރީ ފުނޑިގެން ދިޔަ ދުވަހެއް
ޕީޕީއެމް ސަރުކާރުގެ ފުރަތަމަ ނައިބުރައީސް ޑރ.މުހައްމަދު ޖަމީލް އަހުމަދު
މިއަދަކީ ޖުޑީޝަރީއާއި ޑިމޮކްރަސީ ފުނޑިގެންދިޔަ ކަޅު އަނދިރި ދުވަހެއްކަމަށް ޕީޕީއެމް ސަރުކާރުގެ ފުރަތަމަ ނައިބުރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.
ޕާޓީއިން ވަކިވުމުން މަޖިލީހުގެ މެންބަރުކަމުގެ ގޮނޑި ގެއްލޭނެކަމަށް ސުޕްރީމް ކޯޓުން ބުރާސްފަތި ދުވަހު ކަނޑައެޅުމާއި ގުޅިގެން ޑރ. ޖަމީލު ކުރެއްވި ޓްވީޓެއްގައި ވިދާޅުވީ، މިއީ ޑިމޮކްރަސީ ފުނޑިގެން ދިޔަ ކަޅު ދުވަހެއް ކަމަށާއި، މިކަމުގެ ހިތި ނަތީޖާ އެންމެން ދެކޭނޭ ކަމަށެވެ.
މިގައުމުގެ ޖުޑީޝަރީ މިއަދު ފުނޑިގެން ހިނގައްޖެކަމަށް ޑރ. ޖަމީލު ވިދާޅުވިއެވެ. ޑރ. ޖަމީލުގެ ޓްވީޓްގައި ވަނީ "އިހުތިޖާޖްއަށް ތެދުވަމާތޯއެވެ" މި ގޮތަށް އައްސަވާ ސުވާލުކުރައްވާފައެވެ.
މެންބަރުން ޕާޓީން ވަކިވުމުން ގޮނޑިގެއްލޭގޮތަށް ހުށައެޅި މައްސަލައިގައި ސުޕްރީމް ކޯޓުން ނިންމި ހުކުމުގައި ވަނީ "އެންޓި ޑިފެކްޝަން ގާނޫނެއް" ވުޖޫދަށް ގެނައުމަށް އެންމެހާ ކަމާގުޅޭ ފަރާތްތަކަށް އަމުރުކޮށްފައެވެ. އަދި އެ ގާނޫނު ފާސްވަންދެން މިއަދުން ފެށިގެން ޕާޓީއިން ވަކިވާ މެންބަރުންގެ ގޮނޑި ގެއްލޭނެކަމަށް ވަނީ ކަނޑައަޅައިފައެވެ. މީގެ އިތުރަށް މެންބަރަކު ޕާޓީއިން ވަކިވެއްޖެ ކަމަށް ބަލާނީ، ޕާޓީއިން ވަކިވުމަށް އެދި ޕާޓީގެ އޮފީހަށް ސިޓީ ހުށަހެޅުމުން އިލެކްޝަންސް ކޮމިޝަނުން އެ މެންބަރަކު ޕާޓީއިން ވަކިކުރުމުން ކަމަށް ހުކުމުގައި ބުނެފައިވެއެވެ.
ސަރުކާރުން މި މައްސަލަ ހުށަހަޅާފައި މިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް، ސަރުކާރުން ހިންގާ ޕީޕީއެމްގެ 11 މެންބަރަކު ހިމެނޭ ގޮތަށް، ޖުމްލަ 45 މެންބަރުންގެ ސޮޔާއެކު އިދިކޮޅު ފަރާތްތަކުން ހުށަހަޅާފައިވަނިކޮށެވެ. މީގެ އިތުރުން، މައްސަލަ ހުށަހަޅާފައި މިވަނީ މަސީހުގެ އިތުބާރުގެ ގަރާރުގައި ސޮއިކުރެއްވި މެންބަރުންތައް ޕީޕީއެމުން ވަކިވަމުންދާ ދަނޑިވަޅެއްގައެވެ.
