ޔޫއެންޑަބްލިއުޓީއޯގެ އެއްބަސްވުމުގައި ސޮއިކުރުމުގެ ކުރިންވެސް، ފަތުރުވެރިންނަށް ކަމޭހިތައި ބަލަހައްޓާ ގައުމެއްގެ ގޮތުގައި ރާއްޖެ އޮތީ މަޝްހޫރުވެފައި ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީއަށް މިނިސްޓަރު ވިދާޅުވީ، ގައުމަކަށް ފަތުރުވެރިން އަންނައިރު ސަލާމަތާ ރައްކާތެރިކަމަށް ވަރަށް ބޮޑަށް ބަލާކަމަށާއި ކޮންމެ ފަތުރުވެރިޔަކަށް އިންޝުއަރެންސެއް ނުނެގޭނެ ކަމަށެވެ. އަދި ފަތުރުވެރިންނަށް ބޭނުންވާ ހިތްހަމަޖެހުން ހޯދައިދިނުމަށް ސަރުކާރުން އެފަދަ ހާލަތަކަށް ބަލާނެ ކަމަށް ވެސް ވިދާޅުވިއެވެ.
ފަތުރުވެރިކަމަށް ދިމާވާ އެކިއެކި ކާރިސާތަކުގައި ފަތުރުވެރިންނަށް އެހީތެރިވެދިނުމާ ގުޅޭ ޔޫއެންޑަބްލިއުޓީއޯގެ އެއްބަސްވުމުގައި ރާއްޖެއިން ސޮއިކުރީ މިއަހަރުގެ ޖޫން މަހުގައެވެ. މި އެއްބަސްވުމުގެ ދަށުން، ފަތުރުވެރިކަމަށް ބޮޑު ކަމެއް ދިމާވެއްޖެ ހާލަތުގައި އެއް ގައުމު އަނެއް ގައުމާ ގުޅިގެން ފަތުރުވެރިންނަށް ބުރަބޮޑުނުވާނެ ގޮތަކަށް ކަންކަން ކުރިއަށްގެންދާނެއެވެ.
މިނިސްޓަރު ވިދާޅުވީ ފުރަތަމަ އަހަރުގެ ތެރޭގައި މައުލޫމާތު ހިއްސާކޮށް، ގައުމުތަކުން މައުލޫމާތު ބަދަލުކުރާނެ ކަމަށެވެ. އަދި އެކި ގައުމުތަކުން ލިބޭ މައުލޫމާތުގެ އަލީގައި، އަހަރެއް ނުވަތަ ދެ އަހަރެއްގެ ތެރޭގައި މުޅި ދުނިޔޭގައި ޕްރެކްޓިސް ކުރާނެ ކަންތައްތަކަށް އެއްބަސްވެވިދާނެ ކަމަށެވެ.
މި އެއްބަސްވުމުގައި ދުނިޔޭގެ އެހެން ބައެއް ގައުމުތަކުން ވަނީ ސޮއިކޮށްފައެވެ. އަދި ރާއްޖެއާއެކު ކެމްބޯޑިއާއާއި އިންޑޮނޭޝިއާއިން ވެސް ވަނީ މި އެއްބަސްވުމުގައި ސޮއިކޮށްފައެވެ.
އެއްބަސްވުން ބިނާވާނީ ބޮޑުކަމެއް ފަތުރުވެރިކަމުގެ ސިނާއަތައް ދިމާވެއްޖެ ހާލަތުގައި އެއް ގައުމު އަނެއް ގައުމާ ވާހަކަދައްކައިގެން، ފަތުރުވެރިކަމުގެ ޚިދުމަތްދޭ ފަރާތްތަކުގެ މެދުގައި ވާހަކަދެކެވިގެން ޓޫރިސްޓުންނަށް ތަކުލީފު ކުޑަ ގޮތަކަށް، އަދި އެމީހުންނަށް ބުރަ ބޮޑުނުވާނެ ގޮތަކަށް އެމީހުންގެ ކަންތައްތައް ބެލެހެއްޓުމަށް ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ޔޫއެންޑަބްލިއުޓީއޯއިން ބޮޑަށް ބޭނުންވަނީ އެކި ގައުމުތަކުގެ ތަޖުރިބާތައް ހިއްސާކޮށް، ކުރިއަށްއޮތް އަހަރުތަކުގައި ބޮޑަށް ފައިނަލައިޒްކުރަން ކަމަށާއި، ފައިނަލްވެގެންދާއިރު މުޅި ދުނިޔޭގައި ޓޫރިސްޓުންނަށް ގަބޫލުކުރެވޭ އިންޓަނޭޝަނަލް ކޯޑް އޮފް ޕްރޮޓެކްޝަނެއް އޮންނާނެ ކަމަށެވެ. އަދި ބައިވެރިވެފައި އޮންނަ ގައުމުތަކަށް ޓޫރިސްޓުން ދާން މާ ބޮޑަށް ހިތްހަމަޖެހޭނެކަން ފާހަގަކުރައްވައި މައުސޫމް ވިދާޅުވީ، ބައިނަލްއަގުވާމީ ނެޓްވޯރކަކުން ގުޅާލެވިފައިވާ ސިސްޓަމެއްގެ ތެރެއިން އެމީހުންގެ ދަތުރުފަތުރު ރޭވިގެންދާކަން ފަތުރުވެރިންނަށް ޔަގީންކުރެވޭނެ ކަމަށެވެ.
