ޕޯޗުގަލްގެ ލުއިސް ކާސްޓްރޯ ބްރެޒިލްގެ ކްލަބް ބޮޓަފޯގޯ ދޫކޮށް ސައުދީ ޕްރޯ ލީގުގެ އަލް ނަސްރުގެ ކޯޗުކަމާ ހަވާލުވާންއުޅޭ ކަމަށް ރިޕޯޓްތައް ބުނެފިއެވެ.

ޕޯޗުގަލްގެ ތަރި ކްރިސްޓިއާނޯ ރޮނާލްޑޯގެ ކެޕްޓަންކަން ކުރަމުން އަންނަ އަލް ނަސްރަށް އިރުޝާދު ދިނުމަށް އުމުރުން 61 އަހަރުގެ ކާސްޓްރޯ އަށް އެ ކުލަބުގެ ފަރާތުން ވަނީ ފައިދާ ހުރި ހުށަހެޅުމެއް ހުށަހަޅާފައެވެ. މިދިޔަ އޭޕްރީލް މަހު ރުޑީ ގާސިއާ މަގާމުން ވަކިކުރި ފަހުން އަލް ނަސްރު އަންނަނީ ކޯޗެއް ހޯދުމަށް މަސައްކަތް ކުރަމުންނެވެ.

ރިޕޯޓްތައް ބުނާ ގޮތުން ރޮނާލްޑޯ އަމިއްލައަށް އެގައުމުގެ އެކުވެރިޔާ ކާސްޓްރޯއަށް ގުޅައި، އަލް ނަސްރުގެ ވަޒީފާ އަދާކުރަން އޭނާ އަށް ވިސްނައިދިނެވެ. އަލް ނަސްރާއެކު އޭނާ ސޮއިކުރާނީ ދެ އަހަރު ދުވަހުގެ އެއްބަސްވުމެއްގައެވެ.

ކޮޕާ ސުޑަމެރިކާނާގައި ބުރާސްފަތި ދުވަހު މަގަލޭންސްއާ ދެކޮޅަށް ކުޅޭ މެޗަކީ ބޮޓަފޯގޯއާ ހަވާލުވެ ކާސްޓްރޯ އިރުޝާދުދޭ ފަހު މެޗެވެ. ރިއޯ ޑި ޖެނީރޯގެ ކުލަބާއެކު ކާސްޓްރޯ ހަދާފައިވާ އެއްބަސްވުން މި އަހަރުގެ ނިޔަލަށް ހަމަވާއިރު، އަލް ނަސްރު އޭނާގެ ރިލީޒް ކްލޯޒްގެ ދަށުން ބޮޓަފޯގޯއަށް 2.3 މިލިއަން ޔޫރޯ ދޭނެއެވެ.

ގަތަރުގެ އަލް ދުހައިލް ވަގުތީ ގޮތުން ބެލެހެއްޓުމަށް ފަހު ވިޓޯރިއާ ގުއިމަރޭސްގެ ކުރީގެ ކޯޗު ބޮޓަފޯގޯގެ ކޯޗުކަމާ ހަވާލުވީ 2022 ވަނަ އަހަރުގެ މާޗް މަހުގެ ތެރޭގައެވެ.

ލީގުގައި ކުޅުނު 12 މެޗުގެ ތެރެއިން 10 މެޗުން މޮޅުވެ ބޮޓަފޯގޯ އިން ވަނީ ސީޒަންގެ ފެށުން ވަރުގަދަކޮށްފައެވެ. ބްރެޒިލްގެ އެއްވަނައިގައި އޮތް އެ ޓީމު އޮތީ އެންމެ ގާތުން ވާދަކުރާ ގްރެމިއޯ އަށްވުރެ ހަތް ޕޮއިންޓް ކުރީގައެވެ.