އައިސީޔޫގައި ފަރުވާދެމުންދާ ދެ ހައްޖާޖީންގެ ހާލު އަދިވެސް ރަނގަޅެއްނޫން: މިނިސްޓްރީ
އެކެއްގެ ހާލު ކޮންމެސް ވަރަކަށް ރަނގަޅުނަމަވެސް އަނެކަކުގެ ހާލު ކުރިއެކޭ އެއްގޮތް
ދިވެހި ހައްޖުވެރިން
މިއަހަރުގެ ޙައްޖުގެ އަޅުކަން އަދާކުރުމަށް ދިޔަ ދިވެހި ޙައްޖާޖީންގެ ތެރެއިން ދެ ޙައްޖާޖީއެއްގެ ހާލު ސީރިއަސްވެގެން އައިސީޔޫގައި ފަރުވާމެދުން އަންނައިރު އަދިވެސް އެ ދެ ހައްޖާޖީންގެ ހާލު ރަނގަޅު ނޫންކަމަށް އިސްލާމިކް މިނިސްޓްރީގެ ޕާމަނަންޓް ސެކްރެޓަރީ އަހްމަދު އަދީލް ވިދާޅުވެއްޖެއެވެ.
ހާލު ދެރަވެގެން އައިސީޔޫގައި ފަރުވާ ދެމުން އަންނަނީ އުމުރުން ދުވަސްވީ ދެ މީހަކަށެވެ. އެއީ އަންހެނަކާއި ފިރިހެނެކެވެ. އެ ދެ މީހުންގެ ހާލާއި ގުޅޭގޮތުން "ރާއްޖެއެމްވީ"ން ކުރި ސުވާލަކަށް ޖަވާބު ދެއްވަމުން އަދީލް ވިދާޅުވީ ފިރިހެން މީހާގެ ހާލު ބުރާސްފަތި ދުވަހު ކޮންމެވެސް ވަރަކަށް ރަނގަޅު ކަމަށެވެ. ނަމަވެސް އަންހެން މީހާގެ ހާލު ކުރިއެކޭ އެއްގޮތްކަމަށް އަދީލް ވިދާޅުވިއެވެ.
ސައޫދީ އަރައްބިޔާގައި ހުންނަވައިގެން ރާއްޖޭގެ މީޑިއާއަކަށް މައުލޫމާތު ދެއްވަމުން އިސްލާމިކް މިނިސްޓްރީގެ ސްޓޭޓް މިނިސްޓަރު މުޙައްމަދު އަނިލް މިމަހުގެ 27 ވަނަ ދުވަހު ވިދާޅުވެފައިވަނީ އައިސީޔޫގައި ތިބި ނަމަވެސް އެ ދެ މީހުން އަރަފާތު ބިމަށް ގެންދިއުމަށް މަސައްކަތްކުރައްވަމުން ގެންދަވާކަމަށެވެ. ހައްޖު ދުވަހަކީ ޖެހިގެން އައި ދުވަހެވެ. މައުލޫމާތުލިބިފައިވާ ގޮތުގައި އެ ދެ މީހުންގެ ހާލަތަށް ބަލާ ސައުދީގެ ހެލްތު މިނިސްޓްރީން ވަނީ އަރަފާތު ބިމަށް ނުގެންދިޔުމަށް ނިންމާފައެވެ.
މިއަހަރުގެ ޙައްޖުގެ އަޅުކަން އަދާ ކުރުމަށް ސައުދީން ރާއްޖެއަށް 1000 ކޯޓާދިނެވެ. އޭގެތެރެއިން ޙައްޖު ކޯޕަރޭޝަނާއި އަދި އަމިއްލަ ތިން ކުންފުންޏެއްގެ ބެލުމުގެ ދަށުން ދިވެހި ޙައްޖުވެރިން ވަނީ ސައޫދީއަށް ގޮސްފައެވެ. ހައްޖުވެރިން އެނބުރި ރާއްޖެ އައުމަށް ހަމަޖެހިފައިވަނީ ޖުލައި މަހުގެ 6 ވަނަ ދުވަހުން ފެށިގެން ކަމަށް އިސްލާމިކް މިނިސްޓްރީން ބުނެއެވެ.
މިއަހަރު އަމީރުލް ޙައްޖުގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވަނީ، ރައީސުލްޖުމްހޫރިއްޔާގެ ނާއިބު ފައިޞަލް ނަސީމެވެ.
