ކްލަބް އީގަލްސްގެ ޑިފެންޑަރު އަހުމަދު ނޫމާން (ހެލްމެޓް) ގެ ކަކުލަށް ލިބިފައިވާ އަނިޔާއިން އަރައިގަނެ، ފަރިތަކުރުންތަކުގައި އޭނާ ބައިވެރިވާން ފަށައިފިއެވެ.

އެކުލަބުގެ ރަސްމީ ފޭސްބުކް ޕޭޖްގައި އާންމުކޮށްފައިވާ ޕޯސްޓެއްގައި އެކުލަބުން ބުނެފައިވަނީ، ހެލްމެޓްގެ ކަކުލަށް ލިބިފައިވާ އަނިޔާއިން ރަނގަޅުވެ ފަރިތަކުރުންތަކުގައި އޭނާ ބައިވެރިވާން ފަށާފައި ވާކަމަށާއި، ފިޓްނެސް ލެވެލް ރަނގަޅު ކުރުމުގެ މަސައްކަތް ކުރަމުން އަންނަ ކަމަށެވެ.

ފައިތުވި އަހަރުގެ އުރީދޫ ދިވެހި ޕްރެމިއާ ލީގުގައި ޓީސީއާ ދެކޮޅަށް، އޯގަސްޓް 18 ވަނަ ދުވަހު ކުޅުނު މެޗުގައި ހެލްމެޓުގެ ފަޔަށް ލިބުނު އަނިޔާއިން އަރައިގަތުމަށް އޭނާ ވަނީ ކަކުލުގެ ސާޖަރީއެއްވެސް ހަދާފައެވެ. އެގޮތުން 10 މަހާއި 23 ދުވަހު ކުޅުމާއި ދުރުގައި ހުރުމަށްފަހު އަލުން ފަރިތަކުރުންތަކުގައި ބައިވެރިވާން ފަށާފައިވާއިރު، އޭނާ އަންނަނީ އޭނާގެ ކުރީގެ ފޯމަށް އައުމަށްޓަކާ މަސައްކަތް ކުރަމުންނެވެ.

މިފަހަރުގެ އެސްޓީއޯ މާލެ ލީގުގެ ގަދަ 4 ގެ ޖާގައެއް ކަށަވަރުކޮށް ދިވެހި ޕްރެމިއާ ލީގަށް ކޮލިފައިވުމުގެ ރޭހުގައި އޮތް އީގަލްސްއިން ބުނެފައިވަނީ، އަނިޔާއިން އަރައިގަނެ ހެލްމެޓު ފަރިތަކުރުންތަކުގައި ބައިވެރިވާން ފެށުމަކީ ކުލަބަށް ލިބުނު އިތުރު މޯޓިވޭޝަނެއް ކަމަށާއި، އަމާޒަށް ވާސިލުވެ ކާމިޔާބީތަކެއް ހޯދުމަށް ލިބުނު އިތުރު ހިތްވަރެއް ކަމަށެވެ.