އުރީދޫ ދިވެހި ޕްރިމިއާ ލީގުގައި ވާދަކުރަމުން އަންނަ ކްލަބް އީގަލްސްގެ ކޯޗަކަށް ކާމިޔާބު ކޯޗު މުހައްމަދު ޝިޔާޒް (މޯހަން) ހަމަޖައްސައިފިއެވެ.
އީގަލްސްގެ ރަސްމީ ފޭސްބުކް ޕޭޖް މެދުވެރިކޮށް އެ ޓީމުން ވަނީ މޯހަން އެ މަގާމަށް އައްޔަނު ކުރިކަން ކަށަވަރު ކޮށްދީފައެވެ. އެ ކްލަބުން ބުނެފައިވަނީ މޯހަންގެ އިރުޝާދާއި ލީޑާޝިޕްގެ ދަށުން މި ސީޒަނަށް އެ ޓީމަށް ކަނޑައަޅާފައިވާ ޓާގެޓުތަކަށް ވާސިލްވުމަށް ކުރަން ހުރި މަސައްކަތްތައް އެ ޓީމުން ފުރިހަމައަށް ކުރާނެ ކަމަށެވެ.
ރާއްޖެއެމްވީއަށް މައުލޫމާތު ދެމުން މޯހަން ބުނީ އީގަލްސްއަކީ ފުރަތަމަ ޑިވިޝަނުގައި ވާދަކުރަމުން އަންނަ މޮޅު ކްލަބެއް ކަމަށާއި އަމާޒަކީ އެ ޓީމުން ކަނޑައަޅާފައިވާ ޓާގެޓްތަކަށް ވާސިލްވުމަށް ކުރެވެން ހުރި ހުރިހާ މަސައްކަތްތަކެއް ކުރުން ކަމަށެވެ. އަދި ޒަމާނުއްސުރެ ވެސް އީގަލްސް މަޝްހޫރުވެފައި ވަނީ ކުޅުންތެރިން އުފައްދާ ޓީމެއްގެ ގޮތުގައި ކަމަށާއި އޭނާގެ ކޯޗުކަމުގައި ވެސް އެންމެ ބޮޑު މަސައްކަތެއް ކުރާނީ ކުޅުންތެރިން އުފެއްދުމަށް ކަމަށް ވެސް މޯހަން ބުނެފައިވެއެވެ.
މިދިޔަ ދެ ސީޒަނުގައި ވެސް އީގަލްސްގެ ކެޕްޓަން ބޭންޑް އަޅައިގެން ކުޅުނު އިމްރާން ނަޝީދު (އިންމަ) އާއި މުޖްތާޒް މުހައްމަދު (މުޖޭ) ވަނީ އެހެން ޓީމުތަކަށް ބަދަލުވެފައެވެ. މިކަމާއި ގުޅޭގޮތުން މޯހަން ބުނީ އެ ކުޅުންތެރިންގެ ބަދަލުގައި ޓީމުން ފެނުން އެންމެ އެކަށީގެން ވަނީ ވެސް ޒުވާން ކުޅުންތެރިން ކަމަށާއި އެހެން ނަމަވެސް ރަނގަޅު ރިޕްލޭސްމަންޓެއް ފެނިއްޖެނަމަ އެ ކުޅުންތެރިޔަކު ގެންނާނެ ކަމަށެވެ. މޯހަން މިހެން ބުނެފައިވާއިރު ވޭތުވެދިޔަ ތިން އަހަރު ވެސް އެފްއޭއެމް ޔޫތް ޗެމްޕިއަންޝިޕްގެ ޗެމްޕިއަންކަން ހޯދީ އީގަލްސްއެވެ.
ރާއްޖެއެމްވީއާ ވާހަކަ ދައްކަމުން މޯހަން ވަނީ އީގަލްސްގެ ކުރީގެ ކޯޗު އިހުސާން އަބްދުލްޢަނީ (ސާންތީ) ގެ މަސައްކަތް ފާހަގަކޮށް ސާންތީއަށް ޝުކުރު އަދާކޮށްފައެވެ. މޯހަން ބުނީ ސާންތީގެ އިރުޝާދުގެ ދަށުން އީގަލްސްއިން ހޯދާފައިވާ ކާމިޔާބުތައް ތަކުރާރުކުރުން ވެގެންދާނީ ޗެލެންޖަކަށް ކަމަށާއި އެހެނަސް އެ ކާމިޔާބުތައް ތަކުރާރު ކުރުމަށް އޭނާ މަސައްކަތް ކުރާނެ ކަމަށެވެ.
އީގަލްސްގެ ކޯޗުގެ މަގާމު ހުސްވީ މިދިޔަ ސީޒަނުގައި އެ ޓީމަށް އިރުޝާދުދިން ސާންތީ އެ މަގާމު ދޫކޮށް ރާއްޖޭގެ 19 އަހަރުން ދަށުގެ ޓީމާއި ހަވާލުވުމުންނެވެ. ސާންތީ މިހާރު ފުރަމުން އަންނަނީ އެފްއޭއެމްގެ ޑެޕިއުޓީ ޓެކްނިކަލް ޑިރެކްޓަރެއްގެ މަގާމެވެ.
އިންމަ އާއި މުޖޭ ފިޔަވައި އެ ޓީމަށް މިދިޔަ ސީޒަނުގައި ކުޅުނު ހުރިހާ ކުޅުންތެރިން ވެސް އެ ޓީމުން މި ސީޒަނުގައި ފެނިގެންދާނެއެވެ.
މިދިޔަ ސީޒަނުގައި މޯހަން ފެނިގެން ގޮސްފައިވަނީ ދ. ކުޑަހުވަދޫ ޓީމުގެ ބެންޗުންނެވެ. އޭނާ ވަނީ އެ ޓީމަށް މިނިވަން ޗެމްޕިއަންޝިޕް މުބާރާތް ކާމިޔާބުކޮށްދީ އުރީދޫ ދިވެހި ޕްރިމިއާ ލީގުން ޖާގަ ހޯދައިދީފައެވެ. އެހެން ނަމަވެސް އުރީދޫ ދިވެހި ޕްރިމިއާ ލީގުގައި އެ ޓީމަށް މާ އެދެވޭ ނަތީޖާތަކެއް ހޯދިފައެއް ނުވެއެވެ.
ގައުމީ ޓީމުގެ އެސިސްޓަންޓް ކޯޗުގެ މަގާމު ވެސް ފުރި މޯހަން ވަނީ މީގެކުރިން ވެލެންސިއާ އަދި އޭނާގެ ބައްޕަ ކުއީން އަހުމަދު ވަހީދުގެ ކްލަބް ކަމަށްވާ ނިއު ރޭޑިއަންޓް ސްޕޯޓްސް ކްލަބަށް ވެސް ކޯޗުކަންކޮށްދީފައެވެ. މޯހަންގެ ކޯޗިން ކެރިއަރުގައި އެންމެ ކާމިޔާބު ދުވަސްވަރުގެ ގޮތުގައި ފާހަގަކުރެވެނީ އޭނާ ނިއުގެ ކޯޗަކަށް ހުރި ދުވަސްވަރެވެ. އޭނާ ވަނީ އެ ޓީމަށް 2012 ވަނަ އަހަރުގެ ލީގު އެއްވެސް މެޗަކުން ބަލިނުވެ ހޯދައިދީ އެ ޓީމާއެކު އެ އަހަރުގެ ޕްރެޒިޑެންޓްސް ކަޕް ވެސް ކާމިޔާބުކޮށްފައެވެ. މި ކާމިޔާބީގެ ސަބަބުން އެ އަހަރު ހޮވި އެންމެ މޮޅު ކޯޗުގެ މަގާމު ވެސް ލިބުނީ މޯހަން އަށެވެ.
