ދަތުރުފަތުރުގެ ތާށިކަން ހުރި ރަށްތަކުގައި ރަށު ފަތުރުވެރިކަން ތައާރަފުކުރަން އުނދަގޫ: ޓޫރިޒަމް މިނިސްޓަރު
29 ޖޫން 2023 | ބުރާސްފަތި 14:30އާރްޓީއެލް ފެރީގެ ނިޒާމާއި އެއަރޕޯޓްތައް ތަރައްގީވެގެން ދިޔުމާއެކު މި ކަންތައް ހައްލުވާނެ
ދިއްގަރު ހޯމް ސްޓޭ ފަތުރުވެރިން
ދަތުރުފަތުރުގެ ތާށިކަން ހުރި ރަށްތަކުގައި ރަށު ފަތުރުވެރިކަން ތައާރަފުކުރަން އުނދަގޫ ކަމަށް، ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީއަށް މިނިސްޓަރު ވިދާޅުވީ، އާރްޓީއެލް ފެރީގެ ނިޒާމާއި އެއަރޕޯޓްތައް ތަރައްގީވެގެން ދިޔުމާއެކު މި ކަންތައް ހައްލުވެގެން ދާނެކަމަށް އުންމީދުކުރައްވާ ކަމަށެވެ.
ރަށު ފަތުރުވެރިކަން މިއަހަރު ނިމެންވާއިރަށް ރާއްޖޭގެ ހުރިހާ ރަށަކަށް ފުޅާކުރެވޭނެ ކަމަށް އުންމީދުކުރައްވާ ކަމަށާއި، އޭރުން ލިބިގެންދާނީ ވަރަށް ބޮޑު ކާމިޔާބީއެއް ކަމަށްވެސް ވިދާޅުވިއެވެ. އަދި ހަނިމާދޫ އެއަރޕޯޓާއި ގަން އިންޓަރނޭޝަނަލް އެއަރޕޯޓް ތަރައްގީކުރެވިގެން ދިޔުމުން ދަތުރުފަތުރުގެ ތާށިކަމަށް ލުޔެއް ލިބިގެންދާނެ ކަމަށް ވިދާޅުވިއެވެ.
ރާއްޖޭގައި ފުރަތަމަ ފަހަރަށް ހޯމްސްޓޭ ޓުއަރިޒަމް ފެށީ މީގެ ދެ އަހަރު ކުރިންނެވެ. ހޯމްސްޓޭގެ ގޮތުގައި ހިންގާ ޓޫރިސްޓް ގެސްޓްހައުސްއެއް ހިންގުމުގައި، ރަށު ޓޫރިޒަމް ޑެސްކުގެ ދައުރުގެ ގޮތުގައި ކަނޑައަޅާފައިވަނީ، އެ ރަށެއްގައި ރަޖިސްޓަރީކޮށްގެން ހިންގާ ހޯމްސްޓޭތަކާއި، ފަތުރުވެރީންނަށް ކެއިންބުއިމާއި، ދަތުރުފަތުރާއި، އެކިއެކި ހަރަކާތްތައް ރާވައި ހިންގުމާއި، މިފަދަ އެހެނިހެން ޚިދުމަތްތައް އެ ރަށެއްގައި ފޯރުކޮށްދޭ ހަރަކާތްތަކާއި، ރަށަށް ފަތުރުވެރީންގެ ގޮތުގައި އައިސް ގޮސް ވާ ފަރާތްތަކުގެ އެންމެހައި ކަންކަން ރަށު ފެންވަރުގައި ބަލަހައްޓާ މަސްއޫލުވެރި ފަރާތުގެ ގޮތުގައެވެ.
ރަށު ޓޫރިޒަމް ޑެސްކުން ކަނޑައަޅާ ތަނެއްގައި ޓޫރިސްޓް އިންފޮމޭޝަން ޑެސްކް ގާއިމުކުރަންވާނެއެވެ. އަދި ޓޫރިސްޓް އިންފޮމޭޝަން ޑެސްކަކީ، ފަތުރުވެރީންނަށް ފަސޭހައިން ޚިދުމަތް ލިބިގަނެވޭނެ ފަދަ ތަނެއްގައި ހުންނަ ތަނަކަށް ވެފައި، ރަށުގައި ފަތުރުވެރީން އުޅޭ ހުރިހާ ވަގުތެއްގައި ޚިދުމަތް ދޭންވާނެއެވެ. މިގޮތުން، ސީދާ ޑެސްކުގައި މީހަކު ހުރެގެން ޚިދުމަތްދޭނެ ވަގުތުތަކާއި، ވަރޗުއަލްކޮށް ޚިދުމަތްދޭނެ ވަގުތުތައް ކަނޑައެޅިދާނެއެވެ. އެހެންނަމަވެސް، 24 ގަޑިއިރު ގުޅޭނެ ހޮޓްލައިނެއް އޮންނަންވާނެއެވެ.
ޓޫރިޒަމް ޑެސްކުގެ މަސައްކަތުގެ ތެރެއިން އެ ރަށެއްގައި ފަތުރުވެރިކަމުގެ ހަރަކާތްތައް ހިންގޭ މިންވަރަކުން، މިކަމާ ގުޅުންހުރި ވަކިވަކި ދާއިރާތަކަށް ފޯކަލް ޕޮއިންޓުންގެ ގޮތުގައި މީހުން ހަމަޖެއްސިދާނެއެވެ. މި އަހަރު ނިމުމުގެ ކުރިން 100 ރަށުގައި ހޯމް ސްޓޭ ތައާރަފުކުރުމަކީ އަމާޒު ކަމަށްވެސް މިނިސްޓަރު ވަނީ ވިދާޅުވެފައެވެ.
