ހޯމްސްޓޭ ފަތުރުވެރިކަމާއެކު އެންމެ ބޮޑަށް ދެކެވިގެން ދިޔަ އެއް ވާހަކައަކީ އެކަމަކީ ރާއްޖޭގެ އާދަކާދައާއި ސަގާފަތް މުގުރާލާނެ، ދީނާއި އިސްތިގުލާލު ހަސްފަސްކޮށްލާނެ އެއްޗެއްގެ ގޮތުގައެވެ. ދުވަސްކޮޅަކުން ފަތުރުވެރިން ހެދުން އަޅައި އުޅޭގޮތަށް ހެދުން އަޅައި، އެމީހުންގެ ދިރިއުޅުމުގެ ވައްޓަފާޅީގެ ތެރެއަށް ދިވެހިން ވެއްޓި ގެނބިގެންދާނެކަމަށް ބުނެ ފާޑުކީ މީހުންވެސް މަދެއް ނޫނެވެ.
އެކަމާ ވާހަކަދެއްކި އަނެއްބަޔަކު ބުނަމުންދިޔައީ ދިވެހިންނަކީ ހަމަ އެހާވެސް އަގީދާ ބަލިކަށި، ގައުމީ ލޯބި ކުޑަ ބަޔަކީތޯއެވެ. ޒަމާނުއްސުރެ ރާއްޖޭގައި ހޯމްސްޓޭ ޓޫރިޒަމާ ގުޅުންހުރި އެކި ބާވަތްތައް އެކި މާނައިގައި ޕްރެކްޓިސް ކުރަމުން އަންނަ ކަމަށެވެ. ދިވެހިންގެ އާދަކާދައާއި ސަގާފަތް އެމީހުންނަށް ދަސްވުމަކީވެސް ހަމަ ވެދާނެ ކަމެއްނޫންތޯއޭވެސް ބައެއް މީހުން ދިޔައީ ބުނަމުންނެވެ.
ކޮންމެއަކަސް، އާ އަހަރުގެ ފުރަތަމަ ދުވަހު ރަސްމީކޮށް ތައާރަފް ކުރެވިގެން ދިޔަ ހޯމްސްޓޭ ޓޫރިޒަމް މިވަނީ ރާއްޖޭގެ ފަތުރުވެރިކަމަށް އައު ބޮޅެއް އިތުރުކޮށްދީފައެވެ. މ ދިއްގަރު މޫރިތިގެއިން ހޯމްސްޓޭގެ ކުލަ ދިވެހި ފަތުރުވެރިކަމުގެ ނަވުގައި ޖައްސަން ފަށާފައިވާއިރު، ހޯމްސްޓޭއާ ގުޅިގެން ތަފާތު ވާހަކަތަކެއް މިދަނީ އިވެމުންނެވެ.
ފަތުރުވެރިންގެ ތެރެއިން އެއް ބަޔަކު ބޯވަޅުއެޅި ރަތް ލިބާހުގައި ފޮޓޯޝޫޓު ޖައްސަމުންދާއިރު، އަނެއް ބަޔަކު ދިވެހި އަންހެނުން ބުރުގާ އަޅާގޮތަށް ބުރުގާ އަޅަން ދަސްކުރަނީއެވެ. އެ ފޮޓޯތަކާއި މަންޒަރުތައް އެމީހުންގެ ސޯޝަލް މީޑިއާގައި ހިއްސާކޮށް، މުޅި ދުނިޔެއަށް ރާއްޖޭގެ ސަގާފީ ކުލަތައް ދައްކަނީއެވެ. ދިއްގަރުގެ މަޝްހޫރު ދިއްގަރު ރިހާކުރު ހަދާ މަންޒަރު ބަލަން ފަތުރުވެރިން މަޑުކޮށްލައިގެން ތިބި މަންޒަރުތައްވެސް މިފަހުން އާންމުވެފައިވާއިރު، ދިވެހި ކާނާއާއި ކެއުންތަކުގެ ތަފާތު މީރު ރަހަތަކުގެ އަޖުމަބަލަމުންދާ މީހުންވެސް މަދެއް ނޫނެވެ.
ފެންނަމުން މިދާ މަންޒަރުތަކާއެކު، ހޯމްސްޓޭ ފަތުރުވެރިކަމަކީ ރާއްޖޭގެ ސަގާފަތާއި ރީތި ޒަަމާންވީ އާދަކާދަތައް ދުނިޔެއަށް ދައްކާލުމަށް ލިބިގެންދާނެ ރަނުގެ ފުރުސަތެއްކަން މިދަނީ ފެންނަމުންނެވެ. ލިޔެލާ ޖެހުމާއި، ދިވެހިވަންތަ ފަންނުވެރިކަން ދައްކުވައިދޭ އެކިއެކި ތާރީޚީ މަސައްކަތްތައް އެމީހުންނަށް ދައްކާލެވިއްޖެނަމަ، ސަގާފީ ފަތުރުވެރިކަމަށްވެސް އިތުރު ބާރެއް ލިބިގެންދާނެއެވެ. ދިވެހި ކެއުންތަކާއި ދިވެހި ރަހަތަކުގެ އިތުރުން، ދިވެހިންގެ ތެރޭގައި ޚާއްސަ ކާބޯތަކެތީގެ އުފެއްދުންތައް ފަތުރުވެރިންގެ މެދުގައިވެސް މަގްބޫލު އެއްޗަކަށް ހެދިދާނެއެވެ. ދިވެހި އިސްލާމީ ރިވެތި އުޅުންތަކާއި ރީތި އަޚުލާގު ފެނި އެމީހުން އާސޯޚުވާ ވަރަށް ދިވެހިންގެ އުޅުމާއި ގުޅުންތައް ދައްކާލެވިދާނެއެވެ. ދުނިޔޭގެ ފަތުރުވެރިކަމުގެ މަގްބޫލު މަންޒިލަކަށް ރާއްޖެ ވަނީ ހަމައެކަނި ހުދު ގޮނޑުދޮށްތަކާއި، ޗާލު މޫދާއި ފަރުތަކުން އެކަނި ނޫންކަން ދައްކާލެވިދާނެއެވެ. ދިވެހި ރާއްޖެއަކީ ހުރިހާ ގޮތަކުންވެސް މަގްބޫލު، ހިތްގައިމު، ތަފާތު މަންޒިލެއްކަން ދައްކާލެވިދާނެއެވެ. ގައިމު ހޯމްސްޓޭއާއެކު ދިވެހި ލިބާހާއި ދިއްގަރު ރިހާކުރާއި، މީރު ދިޔާހަކުރުވެސް އާންމުވަނީ ނޫންތޯއެވެ؟
