ހޯމްސްޓޭ ޓުއަރިޒަމް ނުވަތަ ފަތުރުވެރިން ގޭގޭގައި ބޭތިއްބުމަކީ ވަރަށް ގިނަ ގައުމުތަކުގައި ކުރަމުންގެންދާ ކަމެކެވެ. މިއީ ގައުމުތަކަށް ދާ ފަތުރުވެރިންނަށް ފުރިހަމަ މެހެމާންދާރީއެއް ލިބި، އެ ގެއްގައި އުޅޭ އާއިލާއަކާ އެއްކޮށް ދުވަސްކޮޅެއް ހޭދަކޮށްލުމުގެ ފުރުސަތު ލިބިގެންދާ ކަމެކެވެ.
ގެސްޓްހައުސްފަދަ ތަންތަނުގައި ތިބުމަށްވުރެ، މިގޮތަށް ގެއެއްގައި ތިބެލުމުން އަތުން ދާ އެއްޗެއްވެސް ކުޑަވެއެވެ. އާންމުގޮތެއްގައި "ޓްރެވަލަރސް" ނޫނީ ގައުމުތަކުގައި ހުންނަ ޚާއްސަ ކަންކަން ބަލާލައި، ތަޖުރިބާކޮށްލުމަށް ދަތުރުކުރާ މީހުން މި އުކުޅު ބޭނުންކުރެއެވެ. ސަބަބަކީ ހުންނަ ތަނަށް މާ ބޮޑު އެއްޗެއް ނުގޮސް، އެގައުމެއްގައި ހުންނަ ޚާއްސަ ކަންކަން ތަޖުރިބާ ކޮށްލެވޭތީއެވެ.
ހޯމް ސްޓޭ ފަތުރުވެރިކަން މިހާރު މިވަނީ ރާއްޖެއަށްވެސް ތައާރަފުކޮށްފައެވެ. ދިވެހިރާއްޖެއަކީ ދުނިޔޭގެ ފެންވަރުގައި އެންމެ ފާހަގަކޮށްލެވޭ މަންޒިލަށް މިހާރު ވެފައިވާއިރު، ދުނިޔޭގެ ގިނަ ބައެއްގެ ސަމާލުކަން ރާއްޖެއިން ވަނީ ހޯދާފައެވެ. އަދި ގިނަ ބަޔަކު ޗުއްޓީ ހޭދަކޮށްލުމަށް ރާއްޖެ އަންނަން ބޭނުންވެއެވެ. ރާއްޖެ އަންނަ ގިނަ ފަތުރުވެރިންނަކީ ރިސޯޓުތަކާއި ރަށްރަށުގެ ގެސްޓްހައުސްތަކަށް ދާ މީހުންނެވެ. އަތޮޅުތެރޭގައި ތައާރަފުކުރި ހޯމްސްޓޭ ފަތުރުވެރިކަމާއެކު ކުޑަ ބަޖެޓެއްގައި ރާއްޖޭގައި ޗުއްޓީ ހޭދަކޮށްލެވޭނެއެވެ.
ރާއްޖޭގައި ހޯމްސްޓޭ ޓުއަރިޒަމް ތައާރަފުކޮށްފައިވަނީ މ. ދިއްގަރުންނެވެ. ދިއްގަރުގައި ހޯމްސްޓޭ ފަތުރުވެރިކަމަށް ޚާއްސަކުރި ގޭގައި ހުރުމަށް ސޫދާންގެ ދެމަފަރިންނާއި، އެމެރިކާގެ ދެމަފިރިން ވަނީ ގޮސްފައެވެ. އެމީހުން ވަނީ ހެޔޮ އަގެއްގައި ރާއްޖޭގައި ޗުއްޓީ ހޭދަކޮށްލުމުގެ ފުރުސަތު ލިބުނީތީ އުފާކުރާކަމަށް ބުނެފައެވެ. މިއީ ރާއްޖެ އަންނަ ގިނަ ފަތުރުވެރިން ބޭނުންވާގޮތެވެ. މިހާރު އަތޮޅުތެރޭގެ ގިނަ ރަށްރަށަކީ ފަތުރުވެރިން އެންމެ ބޭނުންވާ ޚިދުމަތްތައް ކަމަށްވާ ވޯޓަރ ސްޕޯޓްސްގެ ޚިދުމަތްތައްވެސް ލިބެން ހުންނަ ތަންތަނެވެ. އެހެންކަމުން ގިނަ ފަތުރުވެރިން ޚިޔާރުކުރަނީ ހެޔޮ އަގެއްގައި ރަށްރަށުގައި ތިބުމަށެވެ. އަދި މިކަން މިވަނީ ފަހިވެގެން ގޮސްފައެވެ.
މިއީ އަތޮޅުތެރޭގެ ރައްޔިތުންގެ ދިރިއުޅުމުގެ ހާލަތުވެސް ރަނގަޅުވެގެންދާނެ ކަމެކެވެ. މާ ބޮޑު ޚަރަދެއް ނުކޮށް، ޓުއަރިޒަމް މިނިސްޓްރީން ކަނޑައަޅާފައިވާ ގައިޑްލައިންތަކާ އެއްގޮތަށް އަމިއްލަ ގޭގައި މިކަން ކުރެވިދާނެއެވެ. މިކަމުގެ ސަބަބުން އަތޮޅުތެރެއަށް އިތުރު އާމްދަނީ އާއި ތަރައްގީގެ މަޝްރޫއުތައް އައުމަށް މަގުފަހިވެގެންދާނެއެވެ. މިކަން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވެސް ވަނީ ފާހަގަކުރައްވާފައެވެ. މިނިސްޓަރ ވަނީ ކުރިއަށް އޮތް ތަނުގައި ރާއްޖޭގެ އެހެން ރަށްތަކުގައި ވެސް ހޯމްސްޓޭ ޓުއަރިޒަމް ތައާރަފުވެގެންދާނެ ކަމަށް ވިދާޅުވެފައެވެ. އަދި އުންމީދަކީ މިއީ ރައްޔިތުންނަށް އިތުރު މަންފާތައް ލިބިގެންދާނެ ސިނާއަތަކަށްވުން ކަމަށާއި، ރައްޔިތުންނަށް އާމްދަނީ އިތުރުވާގޮތަށް މިކަން ބައްޓަންކުރުމަކީ ރައީސް ސާލިހު ގެންގުޅުއްވާ ސިޔާސަތު ކަމަށް މިނިސްޓަރ ވިދާޅުވިއެވެ.
ދިއްގަރުން ތައާރަފުކުރި ހޯމްސްޓޭއާއެކު ރާއްޖޭގެ ގިނަ ރަށްރަށުން މިހާރު ދަނީ ހޯމްސްޓޭ ފަށައިގަތުމަށް ތައްޔާރުވަމުންނެވެ. ހޯމްސްޓޭ ފެށުމަށް ޓުއަރިޒަމް މިނިސްޓްރީން ވަނީ ޚާއްސަ ގައިޑްލައިނެއް އެކުލަވާލާފައެވެ. އެގޮތުން ހޯމްސްޓޭގެ ގޮތުގައި ޓޫރިސްޓް ގެސްޓްހައުސް ހިންގުމުގެ ހުއްދަ ދޫކުރެވޭނީ، ވިޔަފާރި ރަޖިސްޓަރީކުރުމުގެ ގާނޫނުގެ ދަށުން ދިވެހިރާއްޖޭގައި ރަޖިސްޓްރީކޮށްފައިވާ ވިޔަފާރިތަކަށް ކަމަށް ގަވައިދުގައި ވެއެވެ. އަދި އެ ތަނެއްގައި ފުރިހަމަވާންޖެހޭ ވަކި މިންގަނޑުތަކެއް ހުރެއެވެ. އަދި ހޯމްސްޓޭގެ ދަށުން ޓޫރިސްޓް ގެސްޓްހައުސް ހިންގުމުގެ ހުއްދަ ދޫކުރެވޭ ރަށްރަށުގައި އެ ރަށެއްގެ ނުވަތަ ސިޓީއެއްގެ ކައުންސިލް އިދާރާގައި ނުވަތަ ކައުންސިލުން ކަނޑައަޅާ ތަނެއްގައި ޓޫރިޒަމް ޑެސްކެއް ހުންނަންވާނެ ކަމަށް ގަވައިދުގައި ބުނެއެވެ. އެއީ ފަތުރުވެރިންގެ ކަންކަން ބެލުމަށް ޚާއްސަ ޑެސްކެކެވެ.
ކޮވިޑަށްފަހު ރާއްޖޭގެ ފަތުރުވެރިކަން އަންނަނީ ރަނގަޅުވަމުންނެވެ. ހޯމްސްޓޭ ތައާރަފްވުމާއެކު ރާއްޖެގެ ފަތުރުވެރިކަން އިތުރަށް ރަނގަޅުވެ، ރާއްޖޭގައި ޗުއްޓީ ހޭދަކުރުމަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް މީގެ ކުރިން ވެސް ވިދާޅުވެފައިވެއެވެ.
