ރާއްޖޭގައި ފުރަތަމަ ފަހަރަށް ހޯމް ސްޓޭ ޓުއަރިޒަމް ފަށައިފި
ޖުމްލަ 4 ފަތުރުވެރިން ވަނީ ހޯމް ސްޓޭ ޓުއަރިޒަމްގެ ދަށުން ދިއްގަރަށް ގޮސްފައި
ހޯމް ސްޓޭ ޓޫރިޒަމް ފެށުމަށްޓަކައި ބޭއްވި މަރުހަބާ ކިޔުމުގެ ހަރަކާތްތަކުގެ ތެރެއިން
ރާއްޖޭގައި ފުރަތަމަ ފަހަރަށް ހޯމްސްޓޭ ޓުއަރިޒަމް ފަށައިފިއެވެ.
ހޯމް ސްޓޭ ޓުއަރިޒަމް ފަށާފައިވަނީ މ. ދިއްގަރުންނެވެ. ހޯމްސްޓޭ ޓުއަރިޒަމް ފެށުމަށްޓަކައި ހޮނިހިރު ދުވަހު އެ ރަށުގައި ވަނީ ޚާއްސަ ރަސްމިއްޔާތެއް ބާއްވާފައެވެ. އެ ރަށު ކައުންސިލުން ބޭއްވި މި ރަސްމިއްޔާތުގައި ޓުއަރިޒަމް މިނިސްޓަރ ޑރ.އަބްދުﷲ މައުސޫމާއި ސަރުކާރުގެ އިސްވެރިން ވަނީ ބައިވެރިވެވަޑައިގެންފައެވެ.
އދ. އިން ރާއްޖެއަށް ކަނޑައަޅާފައިވާ މަންދޫބު ކެތުރިން ހެސްވެލް ހިމެނިވަޑައިގަންނަވާ ގޮތަށް ޖުމްލަ ފަސް ފަތުރުވެރިން ވަނީ ދިއްގަރަށް ގޮސްފައެވެ. ހޯމްސްޓޭ ފަތުރުވެރިންނަށް ވޯޓާ ސެލިއުޓާއި ސަގާފީ ހަރަކާތްތަކާއެކު ރަށުން ވަނީ ހޫނު މަރުހަބާއެއް ކިޔާފައެވެ. އަދި ފަތުރުވެރިންގެ ފުޓްޕްރިންޓް ވެސް ވަނީ ނަގާފައެވެ. ހޯމް ސްޓޭއަށް އެ ރަށަށް ގޮސްފައިވަނީ ސޫދާނަށް ނިސްބަތްވާ ދެމަފިރިންނާއި އެމެރިކާއަށް ނިސްބަތްވާ ދެމަފިރިންނެވެ..
މީޑިއާތަކަށް މައުލޫމާތު ދެމުން ސޫދާންގެ ދެމަފަރިން ބުނީ ހޯމްސްޓޭ ޓުއަރިޒަމްގައި ރާއްޖެ އަންނަ ބޭނުންވި ކަމަށާއި މިއީ ލިބުނު ވަރަށް ބޮޑު އުފަލެއް ކަމަށެވެ. އަދި އެެމެރިކާގެ ދެމެފަރިން ބުނީ ރާއްޖޭގައި ހެޔޮ އަގެއްގައި ޗުއްޓީ ހޭދަކޮށްލަން އަބަދުވެސް ބޭނުންވި ކަމަށެވެ.
ހޯމް ސްޓޭ ފެށުމަށް އެންމެ ފުރަތަމަ ރަޖިސްޓްރީކޮށްފައި ވަނީ މ. ދިއްގަރުގެ "މޫރިތި" ގެއެވެ. އެ ގޭގެ ތިން ކޮޓަރީގައި ޓޫރިސްޓުން ބޭތިއްބުމުގެ ލައިސެންސް، ޑރ. މައުސޫމް ވަނީ އެ ގޭގެ ވެރިފަރާތާ ހަވާލުކުރައްވާފައެވެ. މީގެ އިތުރުން ޓުއަރިޒަމް މިނިސްޓަރ އަބްދުﷲ މައޫސުމް ވަނީ ހޯމްސްޓޭ ޓުއަރިޒަމް ރަސްމީކޮށް ދިއްގަރުގައި ފެށުމުގެ ހުއްދަ އެ ރަށު ކައުންސިލްގެ ރައީސް އަހްމަދު ނިޝާނާއި ހަވާލުކުރައްވާފައެވެ.
މި ފަތުރުވެރިންނަށް ދިއްގަރުން ހޫނު މަރުހަބާއެއް ކިޔާފައިވާއިރު މިނިސްޓްރީން ބުނީ ހޯމްސްޓޭގެ ގޮތުގައި ޓޫރިސްޓް ގެސްޓްހައުސް ހިންގުމުގެ ހުއްދަ ދޫކުރާނީ ފަސް އަހަރުގެ މުއްދަތަށް ކަމުގައެވެ. 5 އަހަރަށްވުރެ ކުރު މުއްދަތެއްނަމަ ހޯމްސްޓޭގެ ގޮތުގައި ޓޫރިސްޓް ގެސްޓްހައުސް ހިންގުމުގެ ހުއްދަ ދެވޭނީ، އެ އެގްރީމަންޓުގެ މުއްދަތު ހަމަވާ ދުވަހަށްވުރެ ހުއްދައިގެ މުއްދަތު އިތުރު ނުވާ ގޮތަށް ކަމަށެވެ.
ހޯމްސްޓޭގެ ގޮތުގައި ހިންގާ ޓޫރިސްޓް ގެސްޓްހައުސްއެއް ހިންގުމުގައި ރަށު ޓޫރިޒަމް ޑެސްކުގެ ދައުރުގެ ގޮތުގައި ކަނޑައަޅާފައިވަނީ ރަށު ޓޫރިޒަމް ޑެސްކަކީ އެ ރަށެއްގައި ރަޖިސްޓަރީކޮށްގެން ހިންގާ ހޯމްސްޓޭތަކާއި، ފަތުރުވެރީންނަށް ކެއިންބުއިމާއި، ދަތުރުފަތުރާއި، އެކިއެކި ހަރަކާތްތައް ރާވައި ހިންގުމާއި، މިފަދަ އެހެނިހެން ޚިދުމަތްތައް އެ ރަށެއްގައި ފޯރުކޮށްދޭ ހަރަކާތްތަކާއި، ރަށަށް ފަތުރުވެރީންގެ ގޮތުގައި އައިސްގޮސްވާ ފަރާތްތަކުގެ އެންމެހައި ކަންކަން ރަށުފެންވަރުގައި ބަލަހައްޓާ މަސްއޫލުވެރި ފަރާތުގެ ގޮތުގައެވެ.
ރަށު ޓޫރިޒަމް ޑެސްކުން ކަނޑައަޅާ ތަނެއްގައި ޓޫރިސްޓް އިންފޮމޭޝަން ޑެސްކް ގާއިމުކުރަންވާނެއެވެ. އަދި ޓޫރިސްޓް އިންފޮމޭޝަން ޑެސްކަކީ، ފަތުރުވެރީންނަށް ފަސޭހައިން ޚިދުމަތް ލިބިގަނެވޭނެ ފަދަ ތަނެއްގައި ހުންނަ ތަނަކަށް ވެފައި، ރަށުގައި ފަތުރުވެރީން އުޅޭ ހުރިހާ ވަގުތެއްގައި ޚިދުމަތް ދޭންވާނެއެވެ. މިގޮތުން، ސީދާ ޑެސްކުގައި މީހަކު ހުރެގެން ޚިދުމަތްދޭނެ ވަގުތުތަކާއި، ވާޗުއަލްކޮށް ޚިދުމަތްދޭނެ ވަގުތުތައް ކަނޑައެޅިދާނެއެވެ. އެހެންނަމަވެސް، 24 ގަޑިއިރު ގުޅޭނެ ހޮޓްލައިނެއް އޮންނަންވާނެއެވެ.
ޓޫރިޒަމް ޑެސްކުގެ މަސައްކަތުގެ ތެރެއިން އެ ރަށެއްގައި ފަތުރުވެރިކަމުގެ ހަރަކާތްތައް ހިންގޭ މިންވަރަކުން މިކަމާ ގުޅުންހުރި ވަކިވަކި ދާއިރާތަކަށް ފޯކަލް ޕޮއިންޓުންގެ ގޮތުގައި މީހުން ހަމަޖެއްސިދާނެއެވެ
