މެޑިސަން ޓޮޓެންހަމްއާ އެކު ސޮއިކޮށްފި

އިންގްލެންޑުގެ މިޑްފީލްޑަރު ޖޭމްސް މެޑިސަން ފަސް އަހަރުގެ އެއްބަސްވުމެއްގެ ދަށުން ޓޮޓެންހަމްއާ ގުޅިއްޖެއެވެ.

ލެސްޓާ ސިޓީން ޓޮޓެންހަމްއަށް އޭނާ ބަދަލުވީ 40 މިލިއަން ޕައުންޑަށެވެ. އުމުރުން 26 އަހަރުގެ މެޑިސަން ވަނީ އިންގްލެންޑަށް ތިން މެޗު ކުޅެދީ، 2021 ވަނަ އަހަރު ލެސްޓާގެ ތާރީޚުގައި ފުރަތަމަ ފަހަރަށް އެފްއޭ ކަޕް ކާމިޔާބު ކޮށްދީފައެވެ.

20 މިލިއަން ޕައުންޑުގެ ފީއަކަށް 2018 ވަނަ އަހަރު ނޯވިޗްއިން ގުޅުމަށްފަހު އޭނާ ވަނީ ލެސްޓާއަށް 203 މެޗު ކުޅެދީފައެވެ. އޭނާ މިދިޔަ ސީޒަނުގައި ޕްރިމިއާ ލީގުގައި 10 ލަނޑު ޖެހި ނަމަވެސް އެ ކުލަބު ވަނީ ރެލިގޭޓްވެފައެވެ.

ކޮވެންޓްރީއަށް އުފަން މެޑިސަން ވަނީ، 55 ލަނޑު ޖަހައި ލެސްޓާއަށް 41 އެސިސްޓް ކޮށްދީފައެވެ. އޭނާގެ އުފެއްދުންތެރިކަމަކީ، 2020 ވަނަ އަހަރު ކްރިސްޓިއަން އެރިކްސަން ވަކިވި ފަހުން ޓޮޕް ކްލާސް ޕްލޭމޭކަރެއް ނެތް ސްޕާސް ސްކޮޑަށް މަރުހަބާ ކިޔާނެ ކަމެކެވެ.

ނިއުކާސަލްއިން މީގެ ކުރިން މެޑިސަން ހޯދުމަށް މަސައްކަތްކުރި ނަމަވެސް މި އަހަރުގެ ހޫނު މޫސުމުގައި އެ ޓީމުގެ ސަމާލުކަން އޭސީ މިލާނުގެ ސެންޑްރޯ ޓޮނާލީއަށް ބަދަލުވިއެވެ.

ޓޮޓެންހަމްއިން އިޓާލިއަން ލީގުގެ އެމްޕޯލީގެ ގޯލްކީޕަރު ވިކަރިއޯ ސޮއިކޮށްފައިވާއިރު، އާ ކޯޗު ޕޯސްޓެކޮގްލޫ ގެނައި ފަހުން ސްވިޑަންގެ މިޑްފީލްޑަރު ޑެޖާން ކުލުސެވްސްކީ ވެސް ވަނީ ދާއިމީކޮށްފައެވެ.

ރެލިގޭޝަނަށްފަހު ލެސްޓާއިން މެޑިސަން ވަކިވެފައިވާއިރު، ހިލޭ ޓްރާންސްފާއެއްގައި އެސްޓަން ވިލާއާ ގުޅުމަށް ޔޫރީ ޓިލެމަންސް މިހާރު ވަނީ އެއްބަސްވެފައެވެ.