ފަހަތުން އަރައި ޓޮޓެންހަމް ބަލިކޮށް، ޗެލްސީގެ މޮޅުވުން ކުރިއަށް

އިނގިރޭސި ޕްރިމިއަރ ލީގުގައި ފަހަތުން އަރައި ޓޮޓެންހަމް ބަލިކޮށް، ޗެލްސީން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ޓޮޓެންހަމްގެ އަމިއްލަ ދަނޑުގައި އާދީއްްތަ ދުވަހުގެ ރޭ ކުޅުނު މެޗު ޗެލްސީން ކާމިޔާބު ކުރީ 4-2 އިންނެވެ. މެޗުގައި ފުރަތަމަ ދެ ލަނޑު ޖަހައި ކުރި ހޯދީ ވެސް ޓޮޓެންހަމް އިންނެވެ. ނަމަވެސް ޗެލްސީން ވަނީ ފަހަތުން އަރައި ހަތަރު ލަނޑު ޖަހައިފަ އެވެ. އޭގެ ފަހުން ޓޮޓެންހަމް އިން އެއް ލަނޑު ޖެހި އެވެ.

މެޗު ފަށައިގެން ފަސް ވަނަ މިނެޓުގައި ޓޮޓެންހަމަށް ލީޑު ނަގައިދިނީ ޑޮމިނިކް ސޮލަންކޭ އެވެ. އޭގެ ހަ މިނެޓު ފަހުން ޑެހާން ކުލުސެވްސްކީ ވަނީ ޓޮޓެންހަމްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. ފުރަތަމަ ހާފުގައި ޗެލްސީން އެއް ލަނޑު ޖަހައި ފަރަގު ކުޑަ ކުރި އެވެ. މެޗުގެ 17 ވަނަ މިނެޓުގައި އެ ލަނޑު ޗެލްސީ އަށް ޖަހައިދިނީ ޖޯޑަން ސަންޗޯ އެވެ.

ދެ ވަނަ ހާފުގައި ޗެލްސީން ނަތީޖާ ހަމަހަމަ ކުރީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ 61 ވަނަ މިނެޓުގައި ޕެނަލްޓީ ކާމިޔާބުކޮށް ޗެލްސީ އަށް ނަތީޖާ ހަމަހަމަ ކޮށްދިނީ ކޯލް ޕާމާ އެވެ. އަދި އޭގެ ފަހުން 73 ވަނަ މިނެޓުގައި އެންޒޯ ފެނާންޑޭޒް ވަނީ ލަނޑު ޖަހައި މެޗުގައި ޗެލްސީ އަށް ލީޑު ހޯދައިދީފަ އެވެ. އޭގެ އެގާރަ މިނެޓު ފަހުން ޗެލްސީ އަށް ލިބުނު ދެ ވަނަ ޕެނަލްޓީ ކާމިޔާބުކޮށް ލީޑު ފުޅާ ކޮށްދިނީ ޕާމާ އެވެ. މެޗުގައި ޓޮޓެންހަމްގެ ފަހު ލަނޑު މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ސޮން ހެއުން މިން އެވެ.

މޮޅާއެކު ޗެލްސީން ވަނީ ދެ ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 15 މެޗުން އެ ޓީމަށް ލިބެނީ 31 ޕޮއިންޓެވެ. ނުވަ މެޗުން ޗެލްސީ މޮޅުވެފައިވާއިރު، ހަތަރު މެޗުން ވަނީ އެއްވަރުވެފަ އެވެ. އަދި ދެ މެޗުން އެ ޓީމު ވަނީ ބަލިވެފަ އެވެ. ޗެލްސީގެ ފަހަތުން ދެ ވަނައިގައި އާސެނަލަށް ލިބެނީ 29 ޕޮއިންޓެވެ. އެއް ވަނައިގައި ލިވަޕޫލް އޮތީ ދެ ޓީމަށް ވުރެ އެއް މެޗު މަދުން ކުޅެގެން 35 ޕޮއިންޓާ އެކު އެވެ.