ބިންވެރިޔާ ސްކީމްގެ އެއްވެސް މުއާމަލާތެއް ނުކުރާނެ، ސްކޭމް ކޯލްތަކަށް ސަމާލުވޭ: އާބަންކޯ
29 ޖޫން 2023 | ބުރާސްފަތި 06:27އާއްމުންނަށް އޮޅުވާލައިގެން ބޮޑެތި އަދަދުތަކުން ފައިސާ ހޯދާފައިވޭ
އާބަންކޯގެ ހެޑް އޮފީސް
ބިންވެރިޔާ ސްކީމްގެ ގޯތި ނުވަތަ ފުލެޓު ލިސްޓާއި ބެހޭ އެއްވެސް މުއާމަލާތެއް ނުކުރާނެ ކަމަށް އާބަންކޯއިން ބުނެފިއެވެ.
އާބަންކޯއިން މި އިލްތިމާސްކޮށްފައިވަނީ 26 ޖޫން 2023 ގައި ހޯމަ ދުވަހު 5،000 ގޯއްޗަށް ޝަރުތު ހަމަވާ މީހުންގެ ލިސްޓު ހާމަކޮށްފައިވާ ދަނޑިވަޅެއްގައެވެ.
އާބަންކޯއިން ބުނީ ބިންވެރިޔާ ސްކީމްގެ ގޯތި ނުވަތަ ފުލެޓު ލިސްޓާއި ބެހޭ އެއްވެސް މުއާމަލާތެއް ނުކުރާނެ ކަމަށާއި، ސްޕޭމް ކޯލް ނުވަތަ ފައިސާއާއި ޕޭމެންޓާއި ބެހޭ އެއްވެސް ލިންކެއް ނުފޮނުވާނެ ކަމަށެވެ.
ބިންވެރިޔާ ސްކީމްގެ ގޯތި ނުވަތަ ފުލެޓު ލިސްޓާއި ބެހޭ އެއްވެސް މުއާމަލާތެއް ނުކުރާނެ ކަމަށް އާބަންކޯއިން ބުނެފައިވާއިރު، މީގެ ކުރިން ވެސް އެ ކުންފުނީގެ ފަރާތުން ކަމަށް ބުނެ، އާއްމުންނަށް އޮޅުވާލައިގެން ބޮޑެތި އަދަދުތަކުން ފައިސާ ހޯދާފައިވެއެވެ.
ސްކޭމް ކޯލުތަކަށް އާއްމުން ހެލުންތެރިކުރުވުމުގެ ގޮތުން ކަމާބެހޭ ފަރާތްތަކުން ތަފާތު ހަރަކާތްތައް ވެސް ކުރިއަށް ގެންދެއެވެ. އަދި އެހެން ލިބޭ ކޯލުތަކަށް ޖަވާބު ނުދިނުމަށާއި، ފޮނުވާ ލިންކްތަކަށް ނުފިތުމަށް އިލްތިމާސްކޮށްފައިވެއެވެ. ބީއެމްއެލުން ބުނީ އެސްއެމްއެސް މެދުވެރިކޮށް ވެސް މަކަރާއި ހީލަތުން ކަސްޓަމަރުންނަށް އޮޅުވާލައިގެން ކަސްޓަމަރުންގެ އިންޓަރނެޓް ބޭންކިންގ މައުލޫމާތު ހޯދުމަށް މަސައްކަތްކުރަމުންދާ ކަމަށެވެ.
މިފަދަ ބައެއް ކޯލްތަކުގައި އެދޭ މައުލޫމާތު ދީގެންނާއި އޯޓީޕީވެސް ދީގެން ބައެއް ކަސްޓަމަރުން އަތުން ފައިސާ ގެއްލިގެން އެކަމުގެ ޝަކުވާ ލިބިފައިވާކަމަށް ބީއެމްއެލްއިން ބުނެއެވެ. އެގޮތުން މިފަހުން ވެސް ދެ ކަސްޓަމަރެއްގެ އަތުން 50،000 ރުފިޔާ އާއި 75،000 ރުފިޔާ ގެއްލިފައިވާ ކަމުގެ ޝަކުވާ އެ ބޭންކަށް ހުށަހަޅާފައިވެއެވެ.
