ގެދޮރުވެރިޔާ ސްކީމަށް ފޯމުލުމުގެ ފުރުސަތު ދެނީ ކަމަށް ބުނެ ސްކޭމެއް ހިންގަނީ، ސަމާލުވޭ: ފުލުހުން
23 ޑިސެމްބަރު 2024 | ހޯމަ 06:49ދައުރުވަމުން ދަނީ ސައްހަ މެސެޖެއް ނޫން
މީހަކު ފޯނު ހިފަހައްޓައިގެން، ގޮތް ނޭނގޭ ލިންކްތަކަށް ނުވަނުމަށް އެދިފައިވޭ
ގެދޮރުވެރިޔާ ސްކީމަށް އަލުން ފޯމުލުމުގެ ފުރުސަތު ދެނީ ކަމަށް ބުނެ, ސްކޭމެއް ހިންގާ ކަމަށާއި، އެއަށް ސަމާލުވުމަށް ފުލުހުން އިލްތިމާސްކޮށްފިއެވެ.
ފުލުހުން ބުނީ ހައުސިންގ މިނިސްޓްރީގެ ލިޔެކިއުންތަކެއް އެނދުމާ ގުޅިގެން ގެދޮރުވެރިޔާ ފްލެޓްތަކަށް އަލުން ފޯމު ލުމުގެ ފުރުސަތު ހުޅުވާލައިފިކަމަށް ބުނެ ލިންކަކާއެކު މެެސެޖެއް ދައުރުކުރުމުންދާ ކަމަށެވެ. އަދި އެ މެސެޖަކީ ސައްހަ މެސެޖެއް ނޫން ކަމަށް ފުލުހުން ބުނެއެވެ.
ތަފާތު ގޮތްތައް ސްކޭމްތައް ހިންގަމުންދާއިރު، މިކަމަށް ސަމާލުވުމަށް ފުލުހުން ވަނީ އިލްތިމާސްކޮށްފައެވެ.
މީގެ އިތުރުން ސްކޭމްތައް ރިޕޯޓުކުރުމަށް ފުލުހުންގެ ހޮޓްލައިން 119އާއި 3322111ށް ގުޅުމަށް ވަނީ އެދިފައެވެ.
ގެދޮރުވެރިޔާ ސްކީމަށް އަލުން ފޯމުލުމުގެ ފުރުސަތު ދެނީ ކަމަށް ބުނެ, ސްކޭމެއް ހިންގަމުންދާއިރު، މިހާދިސާއާއި ގުޅިގެން ހައުސިން މިނިސްޓްރީން ބުނެފައިވަނީ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި، ލިޔުންތަކަކީ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތު ކަމަށެވެ. އަދި މިހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށެވެ. މީގެ އިތުރުން ކޮންސްޓްރަކްޝްނަ މިނިސްޓަރު އަބްދުﷲ މުއްތަލިބު ވެސް ވިދާޅުވީ ބޯހިޔާވަހިކަމާ ގުޅުންހުރި އެއްވެސް އެއްޗެއް ނުގެއްލޭ ކަމަށެވެ. ނަމަވެސް މިފަކަށް އައިސް ސްކޭމްތަކުގައި މީހުންޖެހި، ގިނަ އަދަދެއްގެ ފައިސާ ގެއްލޭ މައްސަލަ ވަނީ ފެންމަތިވެގެން ގޮސްފައެވެ.
12 ޑިސެންބަރު 2024 ވަނަ ދުވަހުގެ ހެނދުނުގެ ވަގުތެއްގައި ހިނގި އަލިފާނުގެ ހާދިސާއާ ގުޅިގެން ހައުސިން މިނިސްޓްރީ ހިންގަމުން އައި އިމާރާތުގައި ރޯވި އަލިފާން ކޮންޓްރޯލް ނުކުރެވި އެ ބްލޮކްގައި ހުންނަ ކޮންސްޓްރަކްޝަން މިނިސްޓްރީއާއި، އެންވަޔަރަމަންޓް މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އައި ލޭންޑް ސެކްޝަން ވަނީ ބޭނުން ނުކުރެވޭ ވަރަށް ހަލާކުވެފައެވެ.
