ޒާތީ މައުލޫމާތު ރައްކާތެރިކުރުމަށް ފުލުހުންގެ އިލްތިމާސްއެއް

އަމިއްލަ މައުލޫމާތު ރައްކާތެރިކުރުމަކީ ފަރުދީ ޒިންމާއަކަށް ހެދުމަށް ފުލުހުން އިލްތިމާސްކޮށްފިއެވެ.

ފުލުހުންގެ ޚިދުމަތުން މިކަމަށް އިލްތިމާސްކޮށް ބުނެފައިވަނީ އޮކްޓޫބަރު، ސައިބަރ ސެކިއުރިޓީއަށް ހޭލުންތެރިވުމުގެ މަސް- އިންޓަރނެޓް ބޭނުންކުރުމުގައި ރައްކާތެރި އާދަތައް އަށަގަންނުވައި، އިލެކްޓްރޯނިކް ވަސީލަތްތައް ހިމާޔަތްކޮށް، އަމިއްލަ މައުލޫމާތު ރައްކާތެރިކުރުމަކީ ފަރުދީ ޒިންމާއަކަށް ހެއްދުމަށެވެ.

މިއީ ޑިޖިޓަލް މާހައުލުގައި ހުރިހާ މުއާމަލާތްތަކެއްގެ ރައްކާތެރިކަމާއި ސަލާމަތްތެރިކަން ކަށަވަރުކުރުމަށް ކޮންމެހެން ކުރަންޖެހޭ ކަމެއް ކަމަށްވެސް ފުލުހުން ބުނެއެވެ.

އޮކްޓޫބަރު މަހަކީ އިންޓަނެޓު މެދުވެރިކޮށް ހިންގާ ކުށްތަކަށް ހޭލުންތެރިކަން އިތުރުކުރުމުގެ ބައިނަލްއަގުވާމީ މަހުގެ ގޮތުގައި ފާހަގަކުރާ މަހަށްވާއިރު ދާދި ފަހުން ދިވެހި ފުލުހުންގެ ޚިދުމަތުން ވަނީ ސައިބަރ ކްރައިމް ސެންޓަރުގެ މީސްމީޑިއާ މަންސަތައް ތައާރަފުކޮށްފައެވެ. ސައިބަރ ކްރައިމް ސެންޓަރުން ތައާރަފުކޮށްފައިވަނީ ޔޫޓީއުބް ޗެނަލް، ޓިކްޓޮކް، ފޭސްބުކް އަދި އިންސްޓަގްރާމެވެ.

ދާދި ފަހުންވެސް ފުލުހުންވަނީ ފްލެޓްތަކަށް ފޯމު ލުމުގެ ފުރުސަތު އެޗްޑީސީން އަލުން ހުޅުވާލި ކަމަށް ބުނެ ދައުރުކުރަމުންދާ މެސެޖަކީ ސައްހަ މެސެޖެއް ނޫން ކަމަށް ބުނެ ސަމާލުވާން އެދިފައެވެ. އެގޮތުން ގެދޮރުވެރިޔާ ސްކީމުން ފްލެޓްތަކަށް ފޯމު ލުމުގެ ފުރުސަތު އެޗްޑީސީން އަލުން ހުޅުވާލައިފި ކަމަށާއި ފޯމް ވެބްސައިޓުން ލިބެން ހުންނާނެ ކަމަށް ބުނެ ލިންކު ހިމެނޭގޮތަށް ދައުރުކުރަމުންދާ މެސެޖަކީ ސައްހަ މެސެޖެއް ނޫން ކަމަށް ބުނެފައިވެއެވެ.

މީގެ ކުރިންވެސް ފުލުހުން ވަނީ އީމެއިލް އައިޑީ ބޭނުންކޮށްގެން މަކަރާއި ހީލަތުން އެތައް ބައެއްގެ އަތުން ފައިސާ ހޯދާފައިވާ ގިނަ މައްސަލަތަކެއް ހުށައަޅަމުން އަންނަކަން ހާމަކޮށްފައެވެ. އަދި މިފަދަ ކަންކަމުން ރައްކާތެރިވުމުގެ ގޮތުން އެކި ފަރާތްތަކުން އެކި ނަން ނަމުގައި ގުޅައިގެން އެމީހެއް ޒާތީ މަޢުލޫމާތާއި އީމެއިލް އާއި ކޭޝް ކާޑުގެ މަޢުލޫމާތާއި އެނޫންވެސް މުހިންމު މަޢުލޫމާތު ހޯދަން ގުޅި ނަމަވެސް އެފަދަ މަޢުލޫމާތު ހިއްސާ ނުކުރުމަށް ފުލުހުން ވަނީ އެދިފައެވެ.

އަދި ބޭނުންކުރާ އީމެއިލް އަކީ ބޭންކިންގ ފަދަ ޚިދުމަތްތަކުގައި އާއި އަމިއްލަ އެކި ބޭނުންތަކުގައި ބޭނުންކުރާ އީމެއިލް އެއްނަމަ ސެކިއުރިޓީ ގޮތުން ވަރުގަދަކުރުމާއި ފޯނަށް އަންނަ އޯޓީޕީ ކޯޑު އެއްވެސް ފަރާތަކާ ހިއްސާނުކުރުމަށް ހާއްސަ ސަމާލުކަމެއް ދިނުމަށް ފުލުހުންވަނީ މީގެ ކުރިންވެސް އިލްތިމާސްކޮށްފައެވެ.