އެއީ މީގެ އެތައް އަހަރެއް ކުރިއެވެ. ފަލަސްޠީނަށް އުފަން ޙަމާދަތު ޤުރައިޝީއަށް އޭނާގެ މާމަކާފަގެ ފަރާތުން ވާރުތަވީ ކުޑަ ފިހާރައެކެވެ. ޤުދުސްގެ ޤަދީމީ ސިޓީގައި ހުންނަ އެ ފިހާރައަކީ ކެސެޓް ރޯލު ނުވަތަ ކެސެޓް ޓޭޕާއި ސީޑީ ވިއްކާ ފިހާރައެކެވެ. މިއަދު އެއީ ކެސެޓްތަކުގެ އަގުބޮޑު ޚަޒާނާއެކެވެ. ޤުރައިޝީގެ އަމިއްލަ އަތުން ބިނާ ކުރި ޚަޒާނާއެކެވެ. މިދިޔަ އަހަރުތައް އޭނާ ހޭދަ ކުރީ، ދުނިޔޭގެ އެކި ކަންކޮޅުތަކުން ކެސެޓް ރޯލުތައް އެއް ކުރުމުގެ މަސައްކަތުގައެވެ.
ފަލަސްޠީނޭ ބުނެފިނަމަ ބޭ އިޚުތިޔާރުގައި ޚިޔާލަށް ގެނެވެނީ ހަނގުރާމައާއި ހަމަނުޖެހުންތަކުގެ މައިދާނެއް ކަމުގައި ވީ ނަމަވެސް، ފަލަސްޠީނަށް ޒިޔާރަތް ކުރާ ފަތުރުވެރިންނާއި ދޭސީންގެ މެދުގައި، ޤުރައިޝީގެ ޚަޒާނާ ބަލައިފި މީހަކަށް ދެން ސިފަވެގެންދާނީ މުޅިން ތަފާތު މަންޒަރެކެވެ. ފަތުރުވެރިންނާއި ދޭސީ މެހެމާނުންނާ ހިސާބުން ނިންމާލެވޭކަށް ނެތެވެ. ޤުރައިޝި ބުނި ގޮތުގައި ނޫސްވެރިންގެ ފަރާތުންނާއި ރޭޑިއޯ ސްޓޭޝަންތަކުންވެސް އޭނާއަށް ހުށަހެޅުންތައް އާދެއެވެ. އެންމެ އިހުގެ ލަވަތަކާއި އެކި ކަހަލަ ރެކޯޑިންގްތައް ހޯދުމަށެވެ.
މި ފިހާރަ ހުޅުވީ 1972 ވަނަ އަހަރު. މީ ހުސް ވަޤުތު ފަޅުފިލުވާލަން ކުރާ ކަމެއް. އެއްވެސް ގޮތަކަށް، މީ ވިޔަފާރިއެއް ނޫން. މީ އަހަރެން ވަރަށް ލޯބިކުރާ ކަމެއް. އަހަރެންގެ ލެއާ ގުޅިފަ އޮތް ކަމެއް. މި ބުނީއްޔޭ، 1972 އިން ފަށައިގެން މިއަދާ ހަމައަށްވެސް އަހަރެން މިދަނީ އެކި ކަހަލަ ކެސެޓް ރޯލުތައް އެއް ކުރަމުން. ޤައުމުތަކަށް ގޮސް، އެކި ފިހާރަތަކަށް ގޮސް، އެކި ސަރަޙައްދުތަކަށް ދަތުރު ކޮށްގެން މި ސާމާނު މި އެއްކުރަނީ. ވީހާވެސް ޒަމާންވީ މުސްކުޅި އެއްޗިހި ލިބޭތޯ އަހަރެން މަސައްކަތް ކުރަން. ވަކިން ޚާއްޞަ ކޮށް، 1900ގެ އަހަރުތަކުގެ އޯޑިއޯތައް ލިބޭތޯ ވަރަށް ބަލަންޙަމާދަތު ޤުރައިޝީ؛ ފަލަސްޠީނު ރައްޔިތެއް
ޤުރައިޝީ ކިޔައިދިން ގޮތުގައި އާ ސާސްކަފަށް ފެށުމުގެ ކުރިން، ޤުދުސްގެ އެކި ހިސާބުތަކުގައި ކެސެޓް ރޯލު ވިއްކާ 53 ފިހާރައެއް ހުއްޓެވެ. ނަމަވެސް އިންޓަރނެޓްއާއި ޑިޖިޓަލް ޓެކްނޮލޮޖީގެ އެހީގައި ލަވަޖަހާ އުޅެވޭ ޑިވައިސްތަކާއި ވަޞީލަތްތައް ތަޢަރާފުވެ، ފެތުރިގެން ދިއުމާއެކު، އެ ހުރިހާ ފިހާރައެއް މިހާރު ވަނީ ބަންދު ކޮށްފައެވެ.
ޙަޤީޤަތަށް ބުނަންޏާ، 2000 ވަނަ އަހަރަށް ފަހު އަހަރެންގެ މަސައްކަތް މަޑުޖެހެން ފަށައިފި. އިންޓަރނެޓް އައިސް، އަހަރެންގެ ވިޔަފާރި ޚަރާބުކޮށްލައިފި. މީ ވަރަށް ހިތްގައިމު މަސައްކަތެއް. މަދުން ނޫނީ ނުލިބޭ އެކި ސާމާނުތަކާއެކީ، ވަރަށް މަޖާ ވަގުތުތަކެއް ހޭދަ ކުރަމުން ދިޔައީ. 2000ގެ ކުރިން ޤުދުސްގަ ހުންނާނެ މިކަހަލަ ކެސެޓް ރޯލު ވިއްކާ 53 ފިހާރަ. މިހާރު، ބާކި މި ހުރީ އަހަރެންގެ ފިހާރަގަނޑު އެކަނިޙަމާދަތު ޤުރައިޝީ؛ ފަލަސްޠީނު ރައްޔިތެއް
ޤުރައިޝީގެ ފިހާރަ ފިޔަވައެވެ. ފިހާރައަކަށް ވުރެ ބޮޑަށް، ޤުރައިޝީ ދެކެނީ އެއީ ދާރުލްއާޘާރެއްގެ ގޮތުގައެވެ. މަދުން ނޫނީ ނުލިބޭ އަޑުތައް ރައްކާ ކުރެވިފައިވާ ތިޖޫރީއެކޭވެސް ބުނެވިދާނެއެވެ.
