ޤުދުސްގައި ހުރި ޤުރައިޝީ ޚަޒާނާ ވަރަށްވެސް ތަފާތު!

އެއީ މީގެ އެތައް އަހަރެއް ކުރިއެވެ. ފަލަސްޠީނަށް އުފަން ޙަމާދަތު ޤުރައިޝީއަށް އޭނާގެ މާމަކާފަގެ ފަރާތުން ވާރުތަވީ ކުޑަ ފިހާރައެކެވެ. ޤުދުސްގެ ޤަދީމީ ސިޓީގައި ހުންނަ އެ ފިހާރައަކީ ކެސެޓް ރޯލު ނުވަތަ ކެސެޓް ޓޭޕާއި ސީޑީ ވިއްކާ ފިހާރައެކެވެ. މިއަދު އެއީ ކެސެޓްތަކުގެ އަގުބޮޑު ޚަޒާނާއެކެވެ. ޤުރައިޝީގެ އަމިއްލަ އަތުން ބިނާ ކުރި ޚަޒާނާއެކެވެ. މިދިޔަ އަހަރުތައް އޭނާ ހޭދަ ކުރީ، ދުނިޔޭގެ އެކި ކަންކޮޅުތަކުން ކެސެޓް ރޯލުތައް އެއް ކުރުމުގެ މަސައްކަތުގައެވެ.

ފަލަސްޠީނޭ ބުނެފިނަމަ ބޭ އިޚުތިޔާރުގައި ޚިޔާލަށް ގެނެވެނީ ހަނގުރާމައާއި ހަމަނުޖެހުންތަކުގެ މައިދާނެއް ކަމުގައި ވީ ނަމަވެސް، ފަލަސްޠީނަށް ޒިޔާރަތް ކުރާ ފަތުރުވެރިންނާއި ދޭސީންގެ މެދުގައި، ޤުރައިޝީގެ ޚަޒާނާ ބަލައިފި މީހަކަށް ދެން ސިފަވެގެންދާނީ މުޅިން ތަފާތު މަންޒަރެކެވެ. ފަތުރުވެރިންނާއި ދޭސީ މެހެމާނުންނާ ހިސާބުން ނިންމާލެވޭކަށް ނެތެވެ. ޤުރައިޝި ބުނި ގޮތުގައި ނޫސްވެރިންގެ ފަރާތުންނާއި ރޭޑިއޯ ސްޓޭޝަންތަކުންވެސް އޭނާއަށް ހުށަހެޅުންތައް އާދެއެވެ. އެންމެ އިހުގެ ލަވަތަކާއި އެކި ކަހަލަ ރެކޯޑިންގްތައް ހޯދުމަށެވެ.

ޤުރައިޝީ ކިޔައިދިން ގޮތުގައި އާ ސާސްކަފަށް ފެށުމުގެ ކުރިން، ޤުދުސްގެ އެކި ހިސާބުތަކުގައި ކެސެޓް ރޯލު ވިއްކާ 53 ފިހާރައެއް ހުއްޓެވެ. ނަމަވެސް އިންޓަރނެޓްއާއި ޑިޖިޓަލް ޓެކްނޮލޮޖީގެ އެހީގައި ލަވަޖަހާ އުޅެވޭ ޑިވައިސްތަކާއި ވަޞީލަތްތައް ތަޢަރާފުވެ، ފެތުރިގެން ދިއުމާއެކު، އެ ހުރިހާ ފިހާރައެއް މިހާރު ވަނީ ބަންދު ކޮށްފައެވެ.

ޤުރައިޝީގެ ފިހާރަ ފިޔަވައެވެ. ފިހާރައަކަށް ވުރެ ބޮޑަށް، ޤުރައިޝީ ދެކެނީ އެއީ ދާރުލްއާޘާރެއްގެ ގޮތުގައެވެ. މަދުން ނޫނީ ނުލިބޭ އަޑުތައް ރައްކާ ކުރެވިފައިވާ ތިޖޫރީއެކޭވެސް ބުނެވިދާނެއެވެ.