ހައްޖާބެހޭ ބިލް ގާނޫނަކަށް ވެގެން ދިއުމުން، ގިނަ މައްސަލަތަކަށް ހައްލު ލިބޭނެ: އިސްލާމިކް މިނިސްޓްރީ

ހައްޖާބެހޭ ބިލް ގާނޫނަކަށް ވެގެން ދިއުމުން މިހާރު ދިމާވާ ގިނަ މައްސަލަތަކަށް ހައްލު ލިބޭނެކަމަށް އިސްލާމިކް މިނިސްޓްރީން ބުނެފިއެވެ.

ރާއްޖެޓީވީގައި ވާހަކަފުޅުދައްކަވަމުން އިސްލާމިކް މިނިސްޓްރީގެ ޕަރމަނަންޓް ސެކްރެޓަރީ އަހްމަދު އަދީލް ވިދާޅުވީ، ހައްޖާބެހޭ ބިލް މިހާރު އެކުލަވައިލެވި، އެޓަރނީ ޖެނަރަލްގެ އޮފީސް (އޭޖީ)އަށް ހުށަހަޅާފައިވާކަމަށެވެ.

އަދީލް ވިދާޅުވީ، މި ސަރުކާރުގައި އެބިލް ގާނޫނަކަށް ވެގެންދާނެ ކަމަށް އުންމީދުކުރައްވާ ކަމަށާއި، ހައްޖާބެހޭ ގާނޫނެއް އެކުލެވިގެން ދިއުމުން ގާނޫނީ ފްރޭމް ވޯރކް ހަރުދަނާ ވެގެންދާނެ ކަމަށެވެ. މި ބިލް ތަސްދީގު ކުރެވުމުން ހައްޖާއި އުމްރާއަށް މީހުން ގެންދިއުމުގައި ހަރަކާތްތެރިވާ ކުންފުނިތަކުގައި މަސައްކަތްކުރާ މީހުން އިތުރަށް ޒިންމާދާރުކުރުވޭނެ ކަމަށެވެ. އަދި މިހާރު ދިމާވާ މައްސަލަތަކަށް ހައްލު ލިބޭނެކަމަށް އޭނާ ވިދާޅުވިއެވެ.

އަމިއްލަ ކުންފުނިތަކުން މީހުން ހައްޖަށް ގެންދިއުމަށް ބޮޑެތި އަގު ނަގާ މައްސަލަ ސޯޝަލް މީޑިއާގެ ޒަރީއާއިން ސަމާލުކަމަށް އައިސްފައިވާކަމަށް އިސްލާމިކް މިނިސްޓްރީން ބުނެއެވެ. ނަމަވެސް އެ މައްސަލަ ރަސްމީ ސިފައެއްގައި ހުށަހަޅާފައި ނުވުމާއި، އެއްވެސް ހެއްކެތް ނެތުމުން އެމައްސަލަ ބެލެން ނެތްކަމަށް މިނިސްޓްރީން ބުނެއެވެ. ނަމަވެސް އެ މައްސަލަ ހުށަހަޅައިފިނަމަ އުސޫލުގެ ތެރެއިން ބަލާނެކަމަށާއި، އަޅަންޖެހޭ ފިޔަވަޅުތަކުގެ އަޅާނެކަމުގެ ޔަގީންކަން މިނިސްޓްރީން ދީފައިވެއެވެ.

އިތުބާރުހުރި ފަރާތަކުން ރާއްޖެއެމްވީއަށް މައުލޫމާތު ދިންގޮތުގައި، އަމިއްލަ ކުންފުނިތަކުން މީހުން ހައްޖަށް ގެންދިއުމަށް 135،000 ރުފިޔާ ނަގައެވެ. މި ގޮތަށް ހައްޖަށް ގެންދަނީ ދެފަރާތުން އެއްބަސްވެގެން ކަމަށާއި، ފައިސާ ދައްކަނީވެސް ކޭޝްއިން ކަމަށް އޭނާ ބުންޏެވެ. ގިނައިން މިގޮތަށް ފުރުސަތު ހޯދަމުންދަނީ ފައިސާވެރި، މުއްސަނދިން ކަަމަށް އޭނާ ބުންޏެވެ. ބައެއް މީހުން މި ގޮތަށް ހައްޖުގެ އަޅުކަމަށް ދަނީ ހައްޖު ކޯޕަރޭޝަންގެ ދިގު ކިޔުގައި މަޑުކުރަން ބޭނުންނުވާތީއެވެ.

މީގެ އިތުރުން އުމްރާއަށް މީހުން ގެންދިއުމުގައި ގިނަ ކުންފުނިތަކުން މަސައްކަތް ކުރަމުންދާއިރު، ފައިސާ އިތުރަށް ނަގާ މައްސަލަ ދޭތެރެއަކުން ބޮޑުވެއެވެ. އަދި ރަނގަޅު އިންތިޒާމްތަކެއް އުމްރާއަށް ދާ ފަރާތްތަކަށް ހަމަޖައްސައިނުދޭ މައްސަލަވެސް ބޮޑުވެގެންދެއެވެ.