ދެ ލަނޑުން ލެބަނަންއިން ބަންގްލަދޭޝް ބަލިކޮށްފި

ސާފް ޗެމްޕިއަންޝިޕް ފުޓްބޯޅަ މުބާރާތުގައި ބަންގްލަދޭޝްގެ މައްޗަށް 2-0ން ލެބަނަން ކާމިޔާބު ހޯދައިފިއެވެ.

ލެބަނަންއަކީ ސާކް ސަރަހައްދުން ބޭރުން، މި މުބާރާތަށް ދައުވަތުދީގެން ބައިވެރިވި ގައުމެކެވެ. އެގައުމުގެ ފުރަތަމަ މެޗުގައި ބަންގްލަދޭޝް ކޮޅަށް ފުރަތަމަ ލަނޑު ޖެހީ މެޗު ނިމެން 12 މިނިޓަށް ވެފައިވަނިކޮށް ހަސަން މާތޫކްއެވެ. ފަހު ލަނޑު ޖެހީ އިތުރު ވަގުތުގެ ފަސްވަނަ މިނިޓްގައި ހަލީލް ބަދުރެވެ.

ދެ ޓީމުންވެސް ހަމަހަމަ ކުޅުމެއް ދެއްކި މެޗުގައި ލަނޑު ޖަހަން ބަންގްލަދޭޝްއަށްވެސް ރަނގަޅު ފުރުސަތުތަކެއް ލިބިގެންދިޔައެވެ. އެކަމަކު އެ ހަމަލާތަކުގެ ދިފާއަކަށްވީ ލެބަނަންގެ ކީޕަރު އަލީ ސަބާހެވެ.

މި މެޗަށް ބަނގްލަދޭޝް ނުކުތީ ޕޮއިންޓެއް ހޯދުމުގެ އަޒުމުގައެވެ. އެ ޓީމުގެ ކޯޗު ހާވިއާ ކަބްރޭރާ މެޗުގެ ކުރިން ބުނީ، މުބާރާތުގެ ސެމީ ފައިނަލަށް ދިއުމަށް އެންމެ މުހިންމު އެއް ކަމަކީ ލެބަނަން މެޗުން ޕޮއިންޓެއް ހޯދުން ކަމަށެވެ. މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުންވެސް އެންމެ ގިނަ ޕޮއިންޓް ހޯދާ ދެ ޓީމެވެ.

ގްރޫޕް ބީގައި މި ދެ ޓީމުގެ އިތުރުން ހިމެނެނީ މިރޭ އިރާކޮޅު ބައްދަލުކުރާ ދިވެހިރާއްޖެއާއި ބޫޓާނެވެ. އިންޑިޔާގެ ބެންގަލޫރުގައި އިއްޔެއިން ފެށިގެން ޖުލައި ހަތަރަކަށް ކުރިއަށްދާ މުބާރާތުގެ ފުރަތަމަ މެޗުގައި 3-1ން ނޭޕާލް ބަލިކޮށް، ކާމިޔާބު ހޯދީ ކުވޭތެވެ. ދެވަނަ މެޗުގައި ޕާކިސްތާން 4-0ން ބަލިކުރީ, ދިފާއީ ޗެމްޕިއަން އިންޑިޔާއެވެ.