ނޭޕާލް ބަލިކޮށް، ކުވެއިތުން ފެށުން ރަނގަޅުކޮށްފި

އިންޑިއާގެ ބެންގަލޫރުގައި މިއަދު ފެށި ސާފް ޗެމްޕިއަންޝިޕް ފުޓުބޯޅަ މުބާރާތުގެ ފުރަތަމަ މެޗުގައި ނޭޕާލް ބަލިކޮށް, މުބާރާތުގައި އަލަށް ބައިވެރިވި ކުވެއިތުން ފެށުން ރަނގަޅުކޮށްފިއެވެ.

ބެންގަލޫރުގެ ސްރީ ކަންޓީރަވާ ސްޓޭޑިއަމްގައި ކުޅުނު މި މެޗު ކުވެއިތުން ކާމިޔާބުކުރީ 3-1ގެ ނަތީޖާއަކުންނެވެ. 23 ވަނަ މިނެޓުގައި މެޗުގެ ފުރަތަމަ ލަނޑު ކުވެއިތަށް ކާމިޔާބުކޮށްދިނީ ކެޕްޓަން ޚާލިދު ހަޖީއާއެވެ. މެޗުގެ ފުރަތަމަ ހާފު ނިމުމުގެ ކުރިން 40 ވަނަ މިނެޓުގައި ކުވެއިތަށް ފަރަގު ބޮޑުކޮށްދިނީ ޝަބައިބް އަލްޚަލްދީއެވެ. ކުވެއިތުން ފުރަތަމަ ހާފު ނިންމާލީ ދެ ލަނޑުގެ ފަރަގަކާއެކު ހަމަޖެހިލައިގެން އޮވެއެވެ.

މެޗުގެ 65 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް، ކުވެއިތަށް ލީޑު ފުޅާކޮށްދިނީ މުހައްމަދު ދަހާމްއެވެ. އޭގެ ތިން މިނެޓު ފަހުން ނޭޕާލްގެ ހަމައެކަނި ލަނޑު ކާމިޔާބުކޮށްދިނީ އަންޖަން ބިސްޓާއެވެ.

ކުވެއިތާއި ނޭޕާލް ހިމެނެނީ ގުރޫޕު އޭގައެވެ. މި ދެ ޓީމުގެ އިތުރުން މި ގުރޫޕުގައި ދެން ކުޅޭނީ އިންޑިއާއާއި ޕާކިސްތާނެވެ.