ވޯޓަށް ފިއްލަވައިގެން އުޅުއްވި ނަމަވެސް މެންބަރުންގެ އިތުބާރު އޮތް ކަމަކަށް ނުވާނެ: ރޮޒެއިނާ
19 ޖޫން 2023 | ހޯމަ 08:06މަޖިލިސް ކުރިއަށްދަނީ ގަވާއިދާ އެއްގޮތަށް ނޫން
ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ނައިބު ރައީސް އީވާ އަބްދުﷲ ފިއްލަވައިގެން އުޅުއްވި ނަމަވެސް މެންބަރުންގެ އިތުބާރު އޮތްކަމަކަށް ނުވާނެ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
ހޯމަ ދުވަހު ކުރިއަށް ދިޔަ ޖަލްސާގައި ވާހަކަދައްކަވަމުން މެންބަރު ރޮޒެއިނާ ވިދާޅުވީ މަޖިލިސް ކުރިއަށްދަނީ ގަވާއިދާ އެއްގޮތަށް ނޫން ކަމަށާއި، ގަވާއިދަށް ހުރުމަތްތެރިކޮށް ނުހިތާ ކަމަށެވެ. މަޖިލިސް ކުރިއަށް ގެންދަނީ ރިޔާސަތުގައި އިންނަވާ ބޭފުޅަކު ބޭނުންގޮތަކަށް ކަމަށެވެ. ރިޔާސަތުގައި އިންނަވަން ޖެހޭ ބޭފުޅުން ރިޔާސަތުން ފިއްލަވައިގެން އުޅޭކަން ފާހަގަކުރައްވައި ރޮޒެއިނާ ވިދާޅުވީ ވޯޓަށް ފިއްލަވައިގެން އުޅުމަކުން މަޖިލީހުގެ މެންބަރުންގެ އިތުބާރު އޮތް ކަމަކަށްނުވާނެ ކަމަށެވެ.
މިއީ ވަރަށް ހަޑިހުތުރު ޖަރީމާއެއް ކަމަށް ސިފަކުރައްވައި ރޮޒެއިނާ ވަނީ ފިއްލަވައިގެން އުޅޭ ބޭފުޅުންނަށް ފުރުސަތު ދިނުމުގެ ގޮތުން މަޖިލީހުގެ ތަޅުމަށް ވައްދަވަންޖެހެނީ ސިފައިންނާއި ފުލުހުން މެދުވެރިކޮށްގެން ގަދަކަމުންތޯ ސުވާލު އުފައްދަވާފައެވެ. އަދި ވިދާޅުވީ މަޖިލީހުގައި އެބޭފުޅުން ވާހަކަދައްކަވަން ބޭނުންވާނަމަ މަޖިލީހަށް ހާޒިރުވާނެ ކަމަށެވެ.
ވިލިފުށީ ދާއިރާގެ މެމްބަރު ހަސަން އަފީފަށް އިޝާރަތް ކުރައްވައި ރޮޒެއިނާ ވިދާޅުވީ ގަވާއިދުގައިވާ ގޮތުން މިއީ ރިޔާސަތުގައި އިންނެވޭނެ ފަހު ދުވަސް ކަމަށާއި، ރިޔާސަތުގައި އިންނެވޭނީ ތިން ދުވަސް ތިން ޖަލްސާ ވިދިވިދިގެން ކަމަށެވެ. އަދި ކުރިއަށް އޮތްތަނުގައި މަޖިލީހުގެ ޖަލްސާތައް ކުރިއަށް ގެންދާނެ ގޮތް ތަފްސީލް ކޮށްދިނުމަށް ވެސް ރޮޒެއިނާ އެދިވަޑައިގެންނެވިއެވެ.
އިހަވަންދޫ ދާއިރާގެ މެންބަރު މުހައްމަދު ޝިފާޢު ވިދާޅުވީ ބެޖެޓް ބަހުސްއެއް ކަމުގައި ވިޔަސް އެހެން ބަހުސްއެއް ކަމުގައި ވިޔަސް ފުރުސަތަކަށް އެދިފައި އޮންނަ މެންބަރެއް ހިނގަމުންދާ ކަމެއް ނިމޭއިރުގައި މަޖިލީހުގެ ތަޅުމުގައި ނެތް ކަމަށްވާނަމަ އެފުރުސަތު އެހިސާބުން ގެއްލުނީ ކަމަށް ބަލާ ކަމަށެވެ. އެމީހަކަށް ފުރުސަތު ދޭންކަމަށް ވިދާޅުވެ، މައްސަލަ ނުބާއްވާ ކަމަށް ޝިފާޒު ވިދާޅުވިއެވެ.
މީގެ އިތުރުން ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ އަދި ތިނަދޫ އުތުރު ދާއިރާގެ މެންބަރު އަބްދުލްމުޣުނީ ވެސް ވަނީ މަޖިލިސް ކުރިއަށް ދަނީ ގަވާއިދާ ހިލާފަށް ކަން ފާހަގަކުރައްވައި ވާހަކަދައްކަވާފައެވެ.
މެންބަރުން ވިދާޅުވީ އެޖެންޑާ ފުރިހަމަ ނުކޮށް އެހެން އެޖެންޑާގެ އެހެން އެޖެންޑާއަށް ނުދެވޭނެ ކަމަށެވެ. އަދި އެގޮތަށް މަސައްކަތްތައް ކުރިއަށް ގެންދާނަމަ މަޖިލިސް މެދުކަނޑާލުމަށް ވެސް ގޮވާލައްވާފައިވެއެވެ.
