މާލޭގެ ސްޓޯމް ވޯޓަރ ސިސްޓަމް އަޕްގްރޭޑްކުރުމަށް ކުރަން ޖެހޭ މަސައްކަތްތައް ކުރިއަށްދާ ކަމަށާއި، މިހާރު ކުރިއަށް ދަނީ އެގްރީމެންޓްގައި ހުރި ބައެއް ޤާނޫނީ ކަންކަމާއި ގުޅޭގޮތުން ކުރަން ޖެހޭ މަޝްވަރާތަކުގެ މަސައްކަތް ކަމަށް މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިން ޑިރެކްޓަރު ހަސަން ޝާހް ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ.

އޭނާ ވިދާޅުވީ މާލޭގެ ސްޓޯމް ވޯޓަރ ސިސްޓަމްގެ ޑިޒައިން އިތުރަށް ފުރިހަމަކޮށް ކެޕޭސިޓީ ބިލްޑްކުރުމަށް މަސައްކަތް ކުރަން ޖެހޭ ކަމަށް ޤަބޫލުކުރައްވާ ކަމަށެވެ. އެހެންކަމުން މާލޭގެ ފެންބޮޑުވުން ހައްލުކުރުމަށްޓަކައި, ސްޓޯމް ވޯޓަރ ސިސްޓަމްގެ އެއްބަސްވުން އައުކުރުމުގެ މަސައްކަތް އަވަސް ކުރުމަށް އެމްޑަބްލިއުއެސްސީ އާއި ޕްލޭނިން މިނިސްޓްރީން ވެސް ވަރަށް ބޮޑަށް އިސްކަން ދޭ ކަމަށް އޭނާ ވިދާޅުވިއެވެ. އެ މަސައްކަތުގެ ތެރެއިން މިހާރު ކުރިއަށް ދަނީ ލީގަލް ޓީމުން ކުރަން ޖެހޭ މަސައްކަތްތައް ކަމަށް ވެސް ޝާހު ވިދާޅުވިއެވެ.

އެގޮތުން މިހާރު އެއްބަސްވުމާއި މެދު ވަކިގޮތަކަށް ނުނިމި ވަނީ ދެ ކަންތައް ކަމަށް ޝާހް ވިދާޅުވިއެވެ. އޭގެ ތެރޭގައި ހިމެނޭ އެއް ކަމަކީ އެމްޑަބްލިއުއެސްސީގެ ފަރާތުން ސްޓޯމް ވޯޓަރ ސިސްޓަމް އަހަރަކު ދެ ފަހަރު ސާފުކުރަން ޕްލޭނިން މިނިސްޓްރީން އެދިފައިވުން ކަމަށް ޝާހު ވިދާޅުވިއެވެ. އެހެންނަމަވެސް އެއީ އެމްޑަބްލިއުއެސްސީ އަށް ގެއްލުން ވާނެ ކަމެއް ކަމަށް އެ ކުންފުނީގެ ޓެކްނިކަލް ބޭފުޅުން ލަފާ ދެއްވާފައި ވާތީ، އެ ކަމާއި މެދު މަޝްވަރާ ކުރަމުންދާ ކަމަށް ޝާހު ވިދާޅުވިއެވެ. އަދި ދެ ވަނަ ކަމަކީ އެ ސިސްޓަމާއި މެދު އެމްޑަބްލިއުއެސްސީން ހުށަހަޅާ ރިޕޯޓް 30 ދުވަސް ތެރޭގައި ހުށަނާޅައިފި ނަމަ ޕޭމެންޓް ނުލިބޭ ގޮތަށް އެއްބަސްވުމުގައި ހިމަނާފައިވުން ކަމަށް ޝާހު ވިދާޅުވިއެވެ. އެހެންކަމުން ދެ ފަރާތުގެ ލީގަލް ޓީމާއި އެކު އެ ދެ ނުކުތާ އާާއި މެދު ގޮތެއް ނިންމުމަށް މަޝްވަރާކުރަމުންދާ ކަމަށް އޭނާ ވިދާޅުވިއެވެ.

މާލޭގެ ސްޓޯމް ވޯޓަރ ސިސްޓަމްގެ މަސައްކަތްތައް ކުރިއަށް ގެންދިއުމަށް އެކުލަވާލާފަައިވާ އެއްބަސްވުން މިދިޔަ އަހަރުގެ ފަހުކޮޅު ވަނީ ހަމަވެފައެވެ. އެހެންނަމަވެސް އެ ނިޒާމް ބެލެހެއްޓުމުގެ މަސައްކަތް އެމްޑަބްލިއުއެސްސީން ދަނީ އަދިވެސް ކުރަމުންނެވެ. އަދި މި މަސައްކަތުގެ އެއްބަސްވުން އަވަސް ކުރުމަށް ޕްލޭނިން މިނިސްޓްރީން ވެސް ވަރަށް ޚާއްސަ ސަމާލުކަމެއް ދެއްވައެވެ.

މާލޭގެ ސްޓޯމް ވޯޓަރ ސިސްޓަމް އަޕްގްރޭޑްކޮށްފައި ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އަމީނީ މަގުގެ މާފަންނުކޮޅާ ވީ ދިމާއިން ފެންބޮޑުވާ މަައްސަލައަށް ވަގުތީގޮތުން ހައްލެއް ހޯދުމުގެ ގޮތުން ކަމަށް އެމްޑަބްލިއުއެސްސީން ބުނެއެވެެ. އަދި އޭރު އެމްޑަބްލިއުއެސްސީން ޑިޒައިން އެންޑް ބިލްޑް އުސޫލުން އެ މަސައްކަތްކޮށްދިނީ ހައުސިން މިނިސްޓްރީން އެޕްރޫވްކޮށް ތަންފީޒްކުރާ ގޮތަށް ކަމަށް އެމްޑަބްލިއުއެސްސީން ވަނީ ބުނެފައެވެ، އެހެންނަމަވެސް އެ ޑިޒައިން ކުރި އިރާއި މިހާރާއި އަޅާ ބަލާއިރު ގިނަ ބަދަލުތަކެއް މާލެ އަށް އައިސްފައިވާ ކަމަށް އެ ކުންފުނިން ބުނެއެވެ.

އޭރު އެ ނިޒާމުގެ ދަށުން އެކުލަވާލާފައިވާ ޕަމްޕްތައް މިހާރުވެސް މަސައްކަތް ކުރަމުންދެއެވެ. ނަމަބެސް އެ ނިޒާމް އެކުލަވާލީ ފެންބޮޑުވާތާ ދެ ގަޑިއިރު ތެރޭގައި ފެން ހިންދާ ގޮތަށެވެ. އެ ޕަމްޕުތަކަކީ އޮޓޮމެޓިކް ޕަމްޕްތަކެއް ކަަމަށް ވީނަމަވެސް އެއީ 9 ކިލޯވޯޓުގެ ޕަމްޕުތަކެކެވެ.