ލޯނު އެއްބަސްވުމެއްގެ ދަށުން ޓޮޓެންހަމަށް ކުޅެމުން އައި ސްވެޑެންގެ މިޑްފީލްޑަރު ޑެޖާން ކުލުސެވްސްކީ އާއެކު އެ ކުލަބުން ދާއިމީ އެއްބަސްވުމެއް އެކުލަވާލައިފި އެވެ.

އިޓާލިއަން ލީގުގެ ޔުވެންޓަސްގައި ހުރުމަށް ފަހު ކުލުސެވްސްކީ އެންމެ ފުރަތަމަ ޓޮޓެންހަމަށް ކުޅުނީ 2022 ވަނަ އަހަރު ލޯނު އެއްބަސްވުމެއްގެ ދަށުންނެވެ. އެއް އަހަރަށް އެކުލަވާލި އެ އެއްބަސްވުމުގެ މުއްދަތު ހަމަވީ މި ނިމުނު ސީޒަނާ އެކު އެވެ. ނަމަވެސް ދާއިމީ އެއްބަސްވުމެއްގެ ދަށުން ކުލުސެވްސްކީ އެ ޓީމުގައި ބެހެއްޓުމަށް ޓޮޓެންހަމުން ބޭނުންވި އެވެ. އެހެންވެ ޔުވެންޓަސްއާއެކު ކުރިއަށް ގެންދިޔަ މަޝްވަރާތަކަށް ފަހު މިހާރު ވަނީ ދާއިމީ އެއްބަސްވުމެއް އެކުލަވާލެވިފަ އެވެ. ދާއިމީ އެެއްބަސްވުމެއްގައި ކުލުސެވްސްކީ ހޯދުމަށް ޓޮޓެންހަމުން 35 މިލިއަން ޔޫރޯ ދައްކަން ޖެހުނުއިރު، އެ އަދަދު ވަނީ 30 މިލިއަން ޔޫރޯ އަށް ކުޑަކޮށްދީފައި ކަމަށް މީޑިއާތަކުގައި ވަަނީ ބުނެފަ އެވެ.

އުމުރުން 23 އަހަރުގެ ކުޅުންތެރިޔާ ޓޮޓެންހަމާއެކު ހަދާފައި ވަނީ ފަސް އަހަރު ދުވަހުގެ އެއްބަސްވުމެކެވެ. އެހެންކަމުން ދާއިމީ އެއްބަަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. ލޯނު އެއްބަސްވުމުގެ ދަށުން ޓޮޓެންހަމްގައި ހޭދަ ކުރި މުއްދަތުގައި އޭނާ ވަނީ އެ ޓީމަށް 57 މެޗު ކުޅެދީ ހަތް ލަނޑު ޖަހައިފަ އެވެ. އޭގެ ކުރިން ޔުވެންޓަސްގަައި ހޭދަ ކުރި ދެ ސީޒަނުގެ ތެރޭގައި އޭނާ ވަނީ 74 މެޗު ކުޅެދީ ނުވަ ލަނޑު ޖަހައިފަ އެވެ. އެކުލަބާއެކު އޭނާ ވަނީ ދެ ތައްޓެއް ވެސް ކާމިޔާބުކޮށްފަ އެވެ.