ރައްޔިތުންގެ މަޖިލީހުގެ މަސައްކަތްތައް ހުއްޓި، މަސައްކަތްތެރިންގެ ޙައްގުތަކާ ގުޅުންހުރި ޤާނޫނުތައް ފާސްކުރުން ލަސްވާތީ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން ކަންބޮޑުވުން ފާޅުކޮށްފިއެވެ.

މަސައްކަތްތެރިންގެ ޙައްގު ކަށަވަރު ކުރުމަށް މަސައްކަތް ކުރަމުން އަންނަ އެ ޖަމިއްޔާއިން މަޖިލީހުގެ މަސައްކަތްތައް ލަސްވާތީ ކަންބޮޑުވުން ފާޅުކޮށްފައިވަނީ ސަރުކާރުގެ ފަރާތުން ހުށަހަޅަފައިވާ އިންޑަސްޓްރިއަލް ރިލޭޝަންސް ބިލު އެޖެންޑާ ނުކުރެވި އެ މަސައްކަތް މަޑުޖެހިފައިވާތީއެވެ. އެގޮތުން، އެމްޓީޔޫސީން ނެރުނު ބަޔާނުގައި ވަނީ އެ ބިލުގެ އިތުރުން މަސައްކަތު މާހައުލުގެ ސަލާމަތާއި ރައްކާތެރިކަމުގެ ބިލު ފާސްކުރުން ލަސްވާތީ ވެސް ކަންބޮޑުވުން ފާޅުކޮށްފައެވެ.

އެމްޓީޔޫސީން ބުނީ ޔޫނިއަން ހަދައި، ހިންގުމަކީ ކޮންމެ މަސައްކަތްތެރިއަކަށް އަދި ވަޒީފާދޭ ފަރާތްތަކަށް ކަށަވަރުކޮށްދޭން ޖެހޭ އަސާސީ އިންސާނީ ޙައްގެއް ކަމަށެވެ. ނަމަވެސް ރާއްޖޭގެ ޤާނޫނީ އޮނިގަނޑުގައި އެކަށީގެންވާ މިންވަރަށް އެކަން ބަޔާންވެފައި ނެތުމުގެ ސަބަބުންނާއި އެފަދަ ޙައްގުތަކަށް ރާއްޖޭގެ ޝަރުއީ ނިޒާމް ބީރައްޓެހިވުމުގެ ސަބަބުން މަސައްކަތްތެރިންގެ ޙައްގުތައް ކަށަވަރުވެ ރައްކާތެރުކަން ހޯދުން ބޮޑު ގޮންޖެހުމަކަށްވެފައިވާ ކަމަށެވެ. އަދި މިފަދަ ޤާނޫނެއްގެ ރައްކާތެރިކަން ހޯދައިދިނުމަށް ބައިނަލްއަގުވާމީ އެކި ޖަމިއްޔާތަކުން ގޮވާލަމުން އަންނަކަން ވެސް އެ ޖަމިއްޔާއިން ވަނީ ފާހަގަކޮށްފައެވެ.

އެ ޖަމިއްޔާއިން ބުނީ އިންޑަސްޓްރިއަލް ރިލޭޝަންސް ބިލު ފާސްކުރުން ލަސްވުމުގެ ސަބަބުން މަސައްކަތްތެރިންނާއި ވަޒީފާދޭ ފަރާތްތަކުގެ ޙައްގުތަކަށް ޤާނޫނީ ރައްކާތެރިކަން ލިބުން އިތުރަށް ލަސްވުމަކީ ކަންބޮޑުވާ ކަމެއް ކަމަށެވެ. އަދި 2022 ވަނަ އަހަރު ހުށަހެޅި މަސައްކަތުގެ މާހައުލުގެ ސަލާމަތާއި ރައްކާތެރިކަމުގެ ބިލް، ކޮމިޓީ މަރުހަލާ ނުނިމި ދިގުލައިގެންގޮސް ފާސްވުން ލަސްވުމަކީ އެތައް މަސައްކަތްތެރިންނަށް ލިބެންވާ ސިއްހީ ސަލާމަތާއި ރައްކާތެރިކަން ކަށަވަރު ކުރުން ލަސްވާނެ ސަބަބެއް ކަމަށް ވެސް ވަނީ ބުނެފައެވެ.

އެމްޓީޔޫސީން ވަނީ ދައުލަތުގެ އެއްބާރުގެ މަސައްކަތް ވަކި ބައެއްގެ ސިޔާސީ މަސްލަހަތު ހިމާޔަތް ކުރުމަށް ހުއްޓުވައި، މަސައްކަތްތެރިންގެ ޙައްގުތަކާ ގުޅިފައިވާ މުހިންމު ޤާނޫނުތައް ފާސްކުރުން ލަސްވާފަދަ އަމަލުތަކުން ދުރުވުމަށް ގޮވާލާފައެވެ. އަދި ތަހުޒީބު މުޖުތަމައެއްގައި ކަންކުރާ ގޮތްތައް ދަސްކޮށް، މަޝްވަރާގެ ރިވެތި އުސޫލު އިސްކޮށް މަޖިލީހުގެ ހަގީގީ މަސައްކަތްތައް ކުރިއަށްގެންގޮސް މަސައްކަތްތެރިންނާ ގުޅުންހުރި ޤާނޫނުތައް ވަގުތުން ވަގުތަށް ފާސްކޮށްދިނުމަށް ވެސް ވަނީ ގޮވާލާފައެވެ.

ރައްޔިތުންގެ މަޖިލީހުގެ މަސައްކަތްތައް ހުއްޓުމަކަށް އައިސްފައިވާއިރު މަޖިލީހުގެ ރައީސް އާއި ނާއިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ވަނީ ހުށަހަޅައިފައެވެ. މީގެ ތެރެއިން ނައިބުގެ އިތުބާރު ނެތްކަމުގެ މައްސަލަ ތިން ފަހަރަށް އެޖެންޑާ ކުރިއިރު އެ މައްސަލަ އަދިވެސް ނުނިމެއެވެ. އެކި ސަބަބުތަކާހުރެ ފާއިތުވި ދުވަސްތަކުގައި މަޖިލީހުގެ ޖަލްސާތައް ވަނީ މެދުކަނޑާލައިފައެވެ.