ފީފާ "އެންޓި ރޭސިޒަމް" ކޮމިޓީގެ މުގައްރިރަކަށް ރެއާލް މެޑްރިޑްގެ ވިނީޝިއަސް
16 ޖޫން 2023 | ހުކުރު 02:53ނަސްލީ ތަފާތުކުރުމާ ދެކޮޅަށް ބްރެޒިލް އާއި ގިނީ އެކުވެރިކަމުގެ މެޗެއް ކުޅުމަށް ވަނީ ނިންމާފައި
ވިނީޝިއަސް ޖޫނިއަރ ލަނޑުޖެހުމަށްފަހު އުފާ ފާޅުކުރަނީ
ފުޓުބޯޅައިގައި ނަސްލީ ތަފާތުކުރުން ގެންގުޅުމުން ހަރުކަށި އަދަބުދިނުމަށް ލަފާދޭ ކުޅުންތެރިންގެ މައްޗަށް އެކުލެވޭ ފީފާގެ އެންޓި ރޭސިޒަމް ކޮމިޓީގެ އިސްވެރިއަކަށް ހުންނާނީ ރެއާލް މެޑްރިޑްގެ ވިނީޝިއަސް ޖޫނިއާ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.
މިދިޔަ މެއި މަހު ރެއާލް މެޑްރިޑުން ވެލެންސިއާއާ ދެކޮޅަށް ކުޅުނު މެޗުގައި ވިނީޝިއަސްއަށް ސަޕޯޓަރުން ނަސްލީ ގޮތުން ފުރައްސާރަ ކުރި އިރު، މިއީ މި ސީޒަނުގައި ސްޕެނިޝް ލީގުން ކަމާ ގުޅޭ ފަރަތައް ރިޕޯޓްކުރި 22 އަހަރުގެ ވިނީޝިއަސް އާ ގުޅޭ މިފަދަ 10 ވަނަ މައްސަލައެވެ.
ބްރެޒިލް އެފްއޭ އިން އިސްނަގައިގެން ނަސްލީ ތަފާތުކުރުމާ ދެކޮޅަށް ގިނީއާއެކު ބާސެލޯނާގައި އެކުވެރިކަމުގެ މެޗެއް ކުޅުމަށް ވަނީ ނިންމާފައެވެ. މި މެޗަށް ތައްޔާރުވަމުންދާ ބްރެޒިލްގެ ޓީމާއި އަދި ވިނީޝިއަސް އާއި ފީފާގެ ރައީސް އިންފަންޓީނޯ ވަނީ ބުރާސްފަތި ދުވަހު ބައްދަލުކުރައްވާފައެވެ.
އިންފަންޓީނޯ ވިދާޅުވީ ނަސްލީ ތަފާތުކުރުމާއެކު ފުޓުބޯޅަ ނޯންނާން ކަމަށާއި، އެފަދަ ކަމެއް ދިމާވެއްޖެނަމަ ވަގުތުން މެޗު ހުއްޓާލަން ޖެހޭ ކަމަށެވެ. ފީފާގެ ރައީސް އިތުރަށް ވިދާޅުވީ، ނަސްލީ ތަފާތުކުރުމާ ގުޅޭގޮތުން ކުޅުންތެރިންގެ ކަންބޮޑުވުން އަޑުއަހަން ބޭނުންފުޅުވާ ކަމަށާއި، ނަސްލީ ތަފާތު ކުރުމަކީ ބަލައިގަނެވޭނެ ކަމެއް ނޫންކަމަށެވެ. އަދި އެފަދަ އަމަލެއް ހިންގާ މީހަކަށް ނުވަތަ ބަޔަކަށް ހަރުކަށި ފިޔަވަޅު އަޅަން ޖެހޭކަމަށް ވިދާޅުވިއެވެ.
ވިނީޝިއަސް އަކީ ނަސްލީ ތަފާތު ކުރުމާ ދެކޮޅަށް އެންމެ ބާރަށް އަޑުއުފުލި އެއް ކުޅުންތެރިޔާއެވެ. އޭނާގެ ދިފާއުގައި ދުނިޔޭގެ ކުޅިވަރު އާއިލާގެ އެތަކެއް ބައެއް ވަނީ ނުކުމެފައެވެ.
