އީ.އައި.އޭ ނުހަދައި މުރަކަ އާލާކުރުމުގެ މަސައްކަތް ފެށުމާ ގުޅިގެން 20،000 ރުފިޔާއިން ޖޫރިމަނާކޮށްފި

އީ.އައި.އޭ މަރުހަލާ ފުރިހަމަނުކޮށް ބ. ކުންފުނަދޫ (ސޮނޭވާފުށި) ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމުގެ މަސައްކަތް ފެށުމާ ގުޅިގެން، ބަނީ ހޯލްޑިންގްސް (ބީ.ވީ.އައި) ލިމިޓެޑް ޖޫރިމަނާކޮށްފިއެވެ.

އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)އިން ބުނީ، ބީ.ވީ.އައިގެ ފަރާތުން އީ.އައި.އޭ މަރުހަލާ ފުރިހަމަނުކޮށް ސޮނޭވާފުށީ ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމުގެ މަސައްކަތް ފެށުމާ ގުޅިގެން، އެ މައްސަލަ އެ އެޖެންސީން ބަލާފައިވާކަމަށެވެ. އެ މައްސަލައާ ގުޅިގެން އެއްކުރެވުނު މައުލޫމާތުންނާއި، ދެފަރާތުގެ މެދުގައި ބަދަލުކުރެވިފައިވާ ލިޔެކިޔުންތަކަށް ރިއާޔަތްކުރުމުން، އީ.އައި.އޭ މަރުހަލާ ފުރިހަމަކުރުމަކާނުލައި ސޮނޭވާފުށީ ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމުގެ މަސައްކަތް އެ ކުންފުނިން ފަށާފައިވާކަން ޔަގީންކުރެވިފައި ވާކަމަށް އީޕީއޭއިން ބުނެއެވެ.

އީޕީއޭއިން ބުނީ، މިކަމާގުޅިގެން ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދުގެ 20 ވަނަ މާއްދާގެ (ހ) އަށް ރިއާޔަތްކޮށް، އެ ގަވާއިދުގެ ޖަދުވަލު (ޖ)ގެ ދަށުން 20,000ރ. (ވިހިހާސް ދިވެހި ރުފިޔާ)އިން 12 ޖޫން 2023ގައި ބީ.ވީ.އައި ޖޫރިމަނާކޮށްފައިވާކަމަށެވެ. އަދި 30 ދުވަހުގެ ތެރޭގައި ޖޫރިމަނާ ފައިސާ ދެއްކުމަށް އީޕީއޭއިން ވަނީ އަންގާފައެވެ.

މީގެ އިތުރުން ސޮނެވާފުށީ ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމަށް މިހާރު ކުރެވިފައިވާ މަސައްކަތްތަކާއި އެ މަސައްކަތްތަކާއި ގުޅިގެން މިހާރު ރަށުގެ ތިމާވެށީގެ ހާލަތު އީ.އައި.އޭ ކޮންސަލްޓަންޓެއް މެދުވެރިކޮށް ވަޒަންކުރުމަށްފަހު، އެކަމާގުޅޭ ރިޕޯޓެއް 30 ދުވަހުގެ ތެރޭގައި ހުށަހެޅުމަށްވެސް އީޕީއޭއިން ވަނީ އަންގާފައެވެ.